major theft | రూ.8 లక్షల విలువైన బంగారం, వెండి ఆభరణాలు మాయం

major theft | ఆంధ్రప్రభ, వెబ్ డెస్క్ : అల్లూరి సీతారామరాజు జిల్లా పాడేరులోని దుర్గాదేవి ఆలయంలో భారీ చోరీ చోటుచేసుకుంది. అర్ధరాత్రి సమయంలో ఆలయంలోకి చొరబడిన దొంగలు తలుపులు విరగగొట్టి లోపలికి ప్రవేశించి, అమ్మవారికి చెందిన బంగారు, వెండి ఆభరణాలను ఎత్తుకెళ్లారు. ఈ ఘటన స్థానికంగా తీవ్ర కలకలం రేపింది.

ఆంధ్రప్రదేశ్ రాష్ట్రంలోని అల్లూరి సీతారామరాజు జిల్లా పాడేరు పట్టణంలోని ప్రసిద్ధ దుర్గాదేవి ఆలయం భక్తులతో ఎప్పుడూ రద్దీగా ఉంటుంది. అయితే శుక్రవారం అర్ధరాత్రి సమయంలో గుర్తుతెలియని దుండగులు ఆలయాన్ని లక్ష్యంగా చేసుకున్నారు. ప్రధాన ద్వారం తాళాలు పగులగొట్టి లోపలికి ప్రవేశించిన దొంగలు, ఆలయంలోని హుండీతో పాటు అమ్మవారికి అలంకరించే బంగారు, వెండి నగలను అపహరించినట్లు సమాచారం.

ప్రాథమిక అంచనాల ప్రకారం… సుమారు రూ.8 లక్షల విలువైన ఆభరణాలు చోరీకి గురైనట్లు ఆలయ నిర్వాహకులు తెలిపారు. ఉదయం ఆలయాన్ని తెరవడానికి వచ్చిన సిబ్బంది తలుపులు పగిలి ఉండటం గమనించి వెంటనే పోలీసులకు సమాచారం అందించారు.

ఘటన స్థలానికి చేరుకున్న పోలీసులు క్లూస్‌ టీమ్‌తో కలిసి పరిశీలించారు. సీసీటీవీ ఫుటేజీల ఆధారంగా దొంగలను గుర్తించే ప్రయత్నం చేస్తున్నారు. భక్తులు, స్థానికులు ఈ ఘటనపై ఆగ్రహం వ్యక్తం చేస్తూ, ఆలయాల భద్రతను మరింత కట్టుదిట్టం చేయాలని డిమాండ్ చేస్తున్నారు.