Mount Everest | ఎవరెస్ట్ పై మానవ వికృత రూపం..
Mount Everest | ఎవరెస్ట్ పై మానవ వికృత రూపం..
- మానవ నిర్లక్ష్యానికి ఇదే నిదర్శనం
ఆంధ్రప్రభ : ప్రపంచంలోనే అత్యంత ఎత్తైన శిఖరంగా, స్వచ్ఛతకు ప్రతీకగా భావించే ఎవరెస్ట్ పర్వతం (Mount Everest) నేడు తీవ్ర పర్యావరణ సంక్షోభాన్ని ఎదుర్కొంటోంది. సముద్ర మట్టానికి సుమారు 7,900 మీటర్లకు పైగా ఎత్తులో ఉన్న ఈ మహా శిఖరం ప్రస్తుతం చెత్తకుప్పలా మారుతున్న దృశ్యాలు ఆందోళన కలిగిస్తున్నాయి. ప్రపంచంలోనే అత్యంత పవిత్రంగా, స్వచ్ఛంగా భావించే ఎవరెస్ట్ శిఖరం కూడా నేడు మానవ నిర్లక్ష్యానికి, పెరుగుతున్న కమర్షియల్ టూరిజానికి బలైపోతోందెమో అనిపిస్తుంది.
మనిషి ఎక్కడుంటే.. మురికి అక్కడుంటుంది… ఈ మాట వినడానికి కాస్త కఠినంగా అనిపించినా, ప్రస్తుత పరిస్థితులకు అద్దం పడుతోంది. మనిషి తన స్వార్థం, నిర్లక్ష్యంతో భూమిపై దేనినీ వదలడం లేదు. నదులు, సముద్రాలు, అడవులను కలుషితం చేసింది చాలదన్నట్లు.. ఇప్పుడు ప్రపంచంలోనే అత్యంత ఎత్తైన, పవిత్రమైన ఎవరెస్ట్ శిఖరాన్ని కూడా ఒక అత్యంత ఖరీదైన చెత్తకుప్పగా మార్చేస్తున్నాడు.
సముద్ర మట్టానికి దాదాపు 7,900 మీటర్ల ఎత్తులో ఉన్న మౌంట్ ఎవరెస్ట్ క్యాంప్-IV (సౌత్ కోల్) భూమిపైనే అత్యంత ఎత్తైన క్యాంపింగ్ సైట్గా గుర్తింపు పొందింది. ఎవరెస్ట్ శిఖరాన్ని అధిరోహించే పర్వతారోహకులు చివరి దశకు ముందు ఇక్కడే బస చేస్తారు. ప్రాణాలను పణంగా పెట్టి ప్రపంచ శిఖరాన్ని చేరాలనుకునే వారికి ఇది అత్యంత కీలకమైన స్థావరం.
అయితే, ఇటీవల సౌత్ కోల్ నుంచి వెలువడుతున్న దృశ్యాలు పర్యావరణ ప్రేమికులను తీవ్ర ఆందోళనకు గురిచేస్తున్నాయి. అక్కడ ప్రకృతి వైభవానికి బదులుగా మానవ నిర్లక్ష్యానికి నిదర్శనాలు కనిపిస్తున్నాయి. పాత టెంట్లు, ఖాళీ ఆక్సిజన్ సిలిండర్లు, ప్లాస్టిక్ ఫుడ్ ప్యాకెట్లు, చిరిగిపోయిన క్లైంబింగ్ గేర్లు, మానవ వ్యర్థాలు గుట్టలుగా పేరుకుపోయి కనిపిస్తున్నాయి. ఒకప్పుడు మంచు, నిశ్శబ్దం, ప్రకృతి మహోన్నతత్వానికి ప్రతీకగా నిలిచిన ఈ ప్రాంతం ఇప్పుడు చెత్తతో నిండిపోవడం ప్రకృతి ప్రేమికులను కలవరపెడుతోంది.
ఈ దృశ్యాలపై సోషల్ మీడియాలో విస్తృత చర్చ సాగుతోంది. మనిషి ఎక్కడికి వెళ్లినా తన మురికిని వెంట తీసుకెళ్లడమే కాదు, అక్కడే వదిలేసి వస్తున్నాడు అంటూ నెటిజన్లు ఆవేదన వ్యక్తం చేస్తున్నారు. సాంకేతికంగా, శారీరకంగా ఎంత ఎత్తుకు ఎదిగినా ప్రకృతి పట్ల బాధ్యత, సంస్కారం కూడా అంతే స్థాయిలో ఉండాలని పలువురు అభిప్రాయపడుతున్నారు. ప్రపంచంలోనే అత్యున్నత శిఖరమైన ఎవరెస్ట్పై పేరుకుపోతున్న చెత్తను చూసి ప్రకృతి ప్రేమికులు తీవ్ర ఆందోళన వ్యక్తం చేస్తున్నారు.
పర్వతారోహణ అనేది కేవలం సాహసయాత్ర మాత్రమే కాదని, ప్రకృతిని కాపాడే బాధ్యత కూడా అని గుర్తుచేస్తున్నారు. ఎవరెస్ట్ను స్వచ్ఛంగా ఉంచేందుకు కఠిన నిబంధనలు అమలు చేయాలని, పర్యావరణ పరిరక్షణపై మరింత అవగాహన పెంచాలని నెటిజన్లు కోరుతున్నారు. “శిఖరాలను జయించడం గొప్ప విషయమే.. కానీ ప్రకృతిని గౌరవించడం అంతకంటే గొప్పది” అంటూ పలువురు సోషల్ మీడియా వేదికగా తమ అభిప్రాయాలను పంచుకుంటున్నారు.
కమర్షియల్ క్రేజ్.. పర్యావరణ వినాశనం
ఒకప్పుడు ఎవరెస్ట్ ఎక్కడం అంటే ఒక తపస్సు. ఎంతో అనుభవం, ప్రకృతిపై గౌరవం ఉన్నవారే ఆ సాహసానికి పూనుకునేవారు. కానీ ఇప్పుడు ఎవరెస్ట్ అధిరోహణ ఒక భారీ కమర్షియల్ బిజినెస్ గా మారిపోయిందనే విమర్శలు వినిపిస్తున్నాయి. లక్షల రూపాయలు ఖర్చు చేసి, సోషల్ మీడియాలో గుర్తింపు, లైక్స్, రికార్డుల కోసం ఎవరెస్ట్ ఎక్కే వారి సంఖ్య గణనీయంగా పెరిగింది.
ఈ పెరుగుతున్న రద్దీతో పాటు పర్యావరణ సమస్యలు కూడా తీవ్రరూపం దాల్చుతున్నాయి. ఎత్తైన ప్రాంతాల్లోని కఠిన వాతావరణ పరిస్థితులు, ఆక్సిజన్ కొరత, ప్రాణాపాయ పరిస్థితుల మధ్య క్లైంబర్లు తమతో తీసుకెళ్లిన కొన్ని వస్తువులు, పరికరాలు, ఇతర వ్యర్థాలను అక్కడే వదిలేసి దిగివస్తున్నారని పర్యావరణవేత్తలు చెబుతున్నారు. మైనస్ డిగ్రీల ఉష్ణోగ్రతల కారణంగా ఆ చెత్త సహజంగా కుళ్లిపోకుండా మంచులోనే గడ్డకట్టుకుపోయి సంవత్సరాల తరబడి అలాగే ఉండిపోతోంది.
దీంతో ఒకప్పుడు స్వచ్ఛతకు, ప్రకృతి వైభవానికి ప్రతీకగా నిలిచిన ఎవరెస్ట్ శిఖరం నేడు మానవ నిర్లక్ష్యానికి నిదర్శనంగా మారుతోందనే ఆందోళన వ్యక్తమవుతోంది. ప్రకృతిని ఆస్వాదించేందుకు వెళ్లాల్సిన యాత్ర, ప్రదర్శన కోసం చేసే పోటీగా మారుతోందని ప్రకృతి ప్రేమికులు వ్యాఖ్యానిస్తున్నారు. ఎవరెస్ట్ను జయించడం కంటే, దాన్ని యథాతథంగా భవిష్యత్ తరాలకు అందించడం గొప్ప బాధ్యత అని సోషల్ మీడియాలో అనేక మంది తమ అభిప్రాయాలను వెల్లడిస్తున్నారు.
ఎవరెస్ట్ అందాలు మసకబారుతున్నాయా..
ఎవరెస్ట్పై పేరుకుపోతున్న ఈ చెత్త కేవలం ప్రపంచంలోని అత్యున్నత శిఖరం అందాన్ని దెబ్బతీయడానికే పరిమితం కావడం లేదు. ఇది క్రమంగా కింద ఉన్న నదులు, పర్యావరణ వ్యవస్థలను కూడా కలుషితం చేస్తోందని పర్యావరణ నిపుణులు హెచ్చరిస్తున్నారు. వాతావరణ మార్పుల ప్రభావంతో హిమాలయాల్లో మంచు కరుగుతున్న కొద్దీ అక్కడ పేరుకుపోయిన ప్లాస్టిక్ వ్యర్థాలు, రసాయన అవశేషాలు క్రమంగా కిందికి చేరుతున్నాయి. దీంతో హిమాలయాల నుంచి పుట్టే నదుల స్వచ్ఛతకు ముప్పు ఏర్పడటమే కాకుండా, వాటిపై ఆధారపడి జీవిస్తున్న కోట్లాది మంది ప్రజల ఆరోగ్యం, జీవనాధారాలపై కూడా ప్రతికూల ప్రభావం పడే ప్రమాదం ఉందని ఆందోళనలు వ్యక్తమవుతున్నాయి.
ఎవరెస్ట్ను నేపాలీయులు భక్తిపూర్వకంగా ‘సాగర్మాత’ గా పిలుస్తారు. అయితే నేడు అదే సాగర్మాత మానవ నిర్లక్ష్యం, మితిమీరిన అహంకారం వల్ల గాయపడుతోందని ప్రకృతి ప్రేమికులు వ్యాఖ్యానిస్తున్నారు. ప్రపంచ శిఖరాన్ని జయించడం గొప్ప విషయమే అయినా, దానిని కలుషితం చేయడం మానవ నాగరికతకు మచ్చగా మిగిలిపోతుందని హెచ్చరిస్తున్నారు. ఇప్పటికైనా అంతర్జాతీయ సమాజం, పర్వతారోహణ సంస్థలు, క్లైంబర్లు కఠినమైన పర్యావరణ నిబంధనలు పాటిస్తూ ‘తీసుకెళ్లింది తిరిగి తీసుకురావాలి’ అనే బాధ్యతను అలవర్చుకోకపోతే, భవిష్యత్తులో ఊహించని మూల్యం చెల్లించక తప్పదని పర్యావరణవేత్తలు, ప్రకృతి ప్రేమికులు హెచ్చరిస్తున్నారు.
