పెట్టుబడిదారులకు సహకరిస్తాం
సీఎం రేవంత్తో దక్షిణాఫ్రికా ఉపాధ్యక్షుడు పాల్ మషాటిలే బృందం భేటీ
హైదరాబాద్, ఆంధ్రప్రభ: తెలంగాణ రాష్ట్రంతో దక్షిణాఫ్రికా మధ్య వాణిజ్య, పారిశ్రామిక సంబంధాలను మరింత బలోపేతం చేసే దిశగా కీలక చర్చలు జరిగాయి. హైదరాబాద్లోని ఎంసీఆర్హెచ్ఆర్డీలో దక్షిణాఫ్రికా ఉపాధ్యక్షుడు పాల్ మషాటిలే బృందం ముఖ్యమంత్రి రేవంత్ రెడ్డిని కలిసి పలు అంశాలపై చర్చించింది. ఈ భేటీలో తెలంగాణలో పెట్టుబడుల అవకాశాలు, పరిశ్రమల స్థాపన, వాణిజ్య భాగస్వామ్యం, పరస్పర సహకారం వంటి అంశాలపై ఇరు వర్గాలు చర్చించినట్లు సమాచారం. తెలంగాణలో పెట్టుబడులు పెట్టేందుకు ఆసక్తి చూపే దక్షిణాఫ్రికా పారిశ్రామికవేత్తలకు రాష్ట్ర ప్రభుత్వం పూర్తి సహకారం అందిస్తుందని సీఎం రేవంత్ రెడ్డి హామీ ఇచ్చారు.
తెలంగాణలో పారిశ్రామిక అభివృద్ధికి అనుకూల వాతావరణం ఉందని, పెట్టుబడిదారులకు అవసరమైన మౌలిక సదుపాయాలు, విధానపరమైన సహకారం అందించేందుకు ప్రభుత్వం సిద్ధంగా ఉందని సీఎం పేర్కొన్నారు. రాష్ట్రంలో ఐటీ, ఫార్మా, లైఫ్ సైన్సెస్, గ్రీన్ ఎనర్జీ, తయారీ రంగాలు, మౌలిక వసతుల అభివృద్ధి వంటి విభాగాల్లో పెట్టుబడులకు విస్తృత అవకాశాలు ఉన్నాయని వివరించినట్లు తెలుస్తోంది. దక్షిణాఫ్రికా ప్రతినిధి బృందం కూడా తెలంగాణతో ఆర్థిక, వాణిజ్య సంబంధాలను మరింత విస్తరించేందుకు ఆసక్తి వ్యక్తం చేసింది. ఇరు ప్రాంతాల మధ్య వ్యాపార భాగస్వామ్యాలు పెరిగితే పెట్టుబడులు, ఉపాధి అవకాశాలు, సాంకేతిక సహకారం మరింత బలోపేతం అవుతాయని అభిప్రాయపడింది.
ఈ సమావేశం తెలంగాణకు అంతర్జాతీయ పెట్టుబడులను ఆకర్షించే ప్రయత్నాల్లో మరో కీలక అడుగుగా మారనుంది. దక్షిణాఫ్రికా పారిశ్రామికవేత్తలతో భవిష్యత్తులో మరిన్ని చర్చలు జరిగే అవకాశముంది.
