ఇంద్రకీలాద్రికి పోటెత్తిన భక్తులు..
- రెండు రోజుల వరుస సెలవులతో దుర్గమ్మ సన్నిధిలో భక్తుల రద్దీ
- తెలుగు రాష్ట్రాల నలుమూలల నుంచి వేలాదిగా తరలివచ్చిన భక్తులు
- సామాన్య భక్తులకే పెద్దపేట..
- వీఐపీ, అంతరాలయ దర్శనాలకు బ్రేక్..
- క్యూ లైన్లలో తాగునీరు, పాలు, మజ్జిగ పంపిణీ..
- వృద్ధులు, దివ్యాంగులకు బ్యాటరీ వాహనాలు, వీల్చైర్ల ఏర్పాటు
- క్యూ లైన్లను స్వయంగా పరిశీలించిన చైర్మన్ రాధాకృష్ణ గాంధీ, ఈఓ శీనా నాయక్
ఇంద్రకీలాద్రి, ఆంధ్రప్రభ : స్వాతంత్ర్య దినోత్సవం, ఆదివారం వరుసగా రెండు రోజుల సెలవులు రావడంతో విజయవాడ ఇంద్రకీలాద్రిపై కొలువైన శ్రీ కనకదుర్గమ్మవారి సన్నిధికి భక్తులు పోటెత్తారు. తెలుగు రాష్ట్రాల నలుమూలల నుంచి వేలాదిగా తరలివచ్చిన భక్తులతో ఇంద్రకీలాద్రి పరిసరాలు కిటకిటలాడాయి. ఘాట్రోడ్, దర్శనం క్యూ లైన్లు భక్తులతో నిండిపోయాయి.
వరుస సెలవుల నేపథ్యంలో భక్తుల రద్దీ మరింత పెరిగే అవకాశం ఉండటంతో శ్రీ దుర్గా మల్లేశ్వర స్వామివారి దేవస్థానం అధికారులు ముందస్తు చర్యలు చేపట్టారు. భక్తులకు సులభంగా, వేగంగా దర్శనం కల్పించడంపై ప్రత్యేక దృష్టి సారించారు. రద్దీని నియంత్రించేందుకు అవసరమైన మేరకు దర్శన ఏర్పాట్లను పర్యవేక్షిస్తూ భక్తులకు ఎక్కడా ఇబ్బందులు తలెత్తకుండా చర్యలు చేపట్టారు.
వీఐపీ దర్శనాలకు కాస్త విరామం..
భక్తుల రద్దీని దృష్టిలో ఉంచుకుని ఉదయం 10 గంటల నుంచి మధ్యాహ్నం 3 గంటల వరకు వీఐపీ దర్శనాలు, అంతరాలయ దర్శనాలను నిలుపుదల చేశారు. సాధారణ భక్తులకు అధిక ప్రాధాన్యం ఇస్తూ దర్శన ప్రక్రియను కొనసాగించారు. దర్శన సమయాన్ని కూడా అవసరానికి అనుగుణంగా పొడిగించి ఎక్కువ సంఖ్యలో భక్తులకు అమ్మవారి దర్శనం కల్పించేలా అధికారులు చర్యలు చేపట్టారు.
వృద్ధులు, దివ్యాంగులకు ప్రత్యేక సౌకర్యాలు..
ఇంద్రకీలాద్రిపైకి వచ్చే వృద్ధులు, దివ్యాంగ భక్తుల ఇబ్బందులను దృష్టిలో ఉంచుకుని ప్రత్యేక ఏర్పాట్లు చేశారు. బ్యాటరీ వాహనాలు, వీల్చైర్లను అందుబాటులో ఉంచారు. కొండపైకి చేరుకునే క్రమంలో ఇబ్బందులు ఎదుర్కొనే భక్తులకు సిబ్బంది సహాయాన్ని అందించారు. క్యూ లైన్లలో గంటల తరబడి వేచి ఉండే భక్తుల కోసం నిరంతరాయంగా తాగునీరు, పాలు, మజ్జిగ పంపిణీ చేశారు. భక్తుల అవసరాలను ఎప్పటికప్పుడు గుర్తిస్తూ సేవలను అందుబాటులో ఉంచారు.
క్యూ లైన్లను పరిశీలించిన చైర్మన్, ఈఓ..
భక్తుల రద్దీ నేపథ్యంలో ఆలయ పాలకమండలి చైర్మన్ రాధాకృష్ణ గాంధీ, దేవస్థానం కార్యనిర్వహణాధికారి శీనా నాయక్ స్వయంగా క్యూ లైన్లను పరిశీలించారు. భక్తులతో నేరుగా మాట్లాడి దర్శనానికి ఎంత సమయం పడుతోంది, క్యూ లైన్లలో తాగునీరు, పాలు, మజ్జిగ సక్రమంగా అందుతున్నాయా లేదా అనే వివరాలను అడిగి తెలుసుకున్నారు. భక్తుల నుంచి వచ్చిన సూచనలు, ఇబ్బందులను పరిశీలించిన అనంతరం అధికారులు, సిబ్బందికి పలు సూచనలు చేశారు. భక్తులకు ఎక్కడా అసౌకర్యం కలగకుండా, వీలైనంత వేగంగా దర్శనం పూర్తయ్యేలా చర్యలు తీసుకోవాలని ఆదేశించారు.
ట్రాఫిక్పై పోలీసుల ప్రత్యేక దృష్టి..
ఇంద్రకీలాద్రికి భారీ సంఖ్యలో భక్తులు తరలిరావడంతో ట్రాఫిక్ ఇబ్బందులు తలెత్తకుండా విజయవాడ పోలీసులు కూడా ప్రత్యేక చర్యలు చేపట్టారు. ఘాట్రోడ్, ఆలయ పరిసరాల్లో అదనపు భద్రతా సిబ్బందిని మోహరించి వాహనాల రాకపోకలను పర్యవేక్షించారు. భక్తుల రద్దీకి అనుగుణంగా ట్రాఫిక్ను క్రమబద్ధీకరిస్తూ ఎలాంటి అవాంఛనీయ ఘటనలు చోటుచేసుకోకుండా భద్రతా చర్యలు చేపట్టారు. వరుస సెలవుల కారణంగా ఇంద్రకీలాద్రిపై భక్తుల రద్దీ భారీగా పెరిగినప్పటికీ ఆలయ అధికారులు, సిబ్బంది, పోలీసులు సమన్వయంతో పనిచేస్తూ భక్తులకు సౌకర్యవంతమైన దర్శనం కల్పించేందుకు చర్యలు కొనసాగించారు.
