గాంధీజీ సాక్షిగా.. మువ్వన్నెల జెండా రెపరెపలు

• దేశభక్తితో మురిసిన చిన్నారులు.. జాతీయ పతాకాలతో సందడి

నల్లబెల్లి, ఆంధ్రప్రభ : స్వాతంత్ర్య దినోత్సవం సందర్భంగా నర్సంపేట ప్రాంతంలో దేశభక్తి వెల్లివిరిసింది. జాతిపిత మహాత్మాగాంధీ విగ్రహం సమక్షంలో జాతీయ పతాకాన్ని ఆవిష్కరించి స్వాతంత్ర్య సమరయోధుల త్యాగాలను స్మరించుకున్నారు. ఈ కార్యక్రమంలో మహిళలు, చిన్నారులు, గ్రామస్థులు పెద్ద సంఖ్యలో పాల్గొన్నారు. మువ్వన్నెల జెండాలను చేతబూని జాతీయ గీతాలు, దేశభక్తి నినాదాలతో సందడి చేశారు. చిన్నారులు త్రివర్ణ పతాక రంగులతో అలంకరించుకుని ఉత్సాహంగా వేడుకల్లో పాల్గొన్నారు. మహిళలు సంప్రదాయ దుస్తుల్లో హాజరై జాతీయ జెండాకు సెల్యూట్‌ చేస్తూ దేశభక్తిని చాటుకున్నారు.

అనంతరం గాంధీజీ విగ్రహానికి పూలమాలలు వేసి నివాళులర్పించారు. స్వాతంత్ర్యం కోసం మహాత్మాగాంధీతో పాటు ఎందరో మహనీయులు చేసిన త్యాగాలను ఈ సందర్భంగా పలువురు గుర్తుచేశారు. వారి పోరాట ఫలితంగానే నేడు మనం స్వేచ్ఛా వాయువులు పీలుస్తున్నామని పేర్కొన్నారు. దేశ ఐక్యత, సమగ్రతను కాపాడాల్సిన బాధ్యత ప్రతి ఒక్కరిపై ఉందన్నారు. విద్యార్థులు దేశభక్తి, క్రమశిక్షణ, సామాజిక బాధ్యతను అలవర్చుకుని దేశ ప్రగతిలో భాగస్వాములు కావాలని పిలుపునిచ్చారు. మువ్వన్నెల జెండాలు రెపరెపలాడుతుండగా చిన్నారులు, మహిళలు ఉత్సాహంగా పాల్గొనడం వేడుకలకు ప్రత్యేక ఆకర్షణగా నిలిచింది. గాంధీజీ విగ్రహం ఎదుట జాతీయ పతాక ఆవిష్కరణతో ఆ ప్రాంతమంతా దేశభక్తి భావంతో నిండిపోయింది.