Sensex | మార్కెట్లకు స్వల్ప ఊరట..!

43 పాయింట్లు పెరిగిన సెన్సెక్స్.. 13 పాయింట్లు లాభపడ్డ నిఫ్టీ

Sensex | ఆంధ్రప్రభ, వెబ్ డెస్క్ : దేశీయ స్టాక్ మార్కెట్లు తీవ్ర హెచ్చుతగ్గుల మధ్య చివరకు స్వల్ప లాభాలతో ముగిశాయి. రోజంతా ఒడిదుడుకులకు లోనైన సూచీలు ట్రేడింగ్ ముగిసే సమయానికి స్థిరపడ్డాయి. సెన్సెక్స్ 43 పాయింట్లు పెరిగి 78,542 వద్ద, నిఫ్టీ 13 పాయింట్లు లాభపడి 24,583 వద్ద స్థిరపడ్డాయి.

పశ్చిమాసియాలో నెలకొన్న పరిణామాలు మార్కెట్లపై ప్రభావం చూపాయి. వాణిజ్య నావిగేషన్‌కు కీలకమైన హార్మూజ్ జలసంధి ప్రతిష్ఠంభన కారణంగా ముడిచమురు ధరలు బ్యారెల్‌కు సుమారు 79 డాలర్ల వద్ద హెచ్చుతగ్గులకు లోనయ్యాయి. దీంతో కొంతమంది ఇన్వెస్టర్లు ముందస్తు లాభాల స్వీకరణకు మొగ్గుచూపారు.

మరోవైపు అమెరికా కార్మిక మార్కెట్‌ గణాంకాలు, వడ్డీ రేట్లపై అంచనాల నేపథ్యంలో ఆసియా ప్రధాన మార్కెట్లు సానుకూలంగా స్పందించాయి. జపాన్‌కు చెందిన నిక్కీ, దక్షిణ కొరియాకు చెందిన కోస్పి సూచీలు లాభాల్లో కదలాడటం దేశీయ మార్కెట్లకు కొంత మద్దతునిచ్చింది.

సాంకేతిక విశ్లేషణ ప్రకారం నిఫ్టీకి 24,350 వద్ద బలమైన మద్దతు ఉందని నిపుణులు భావిస్తున్నారు. అదే సమయంలో 25,000 స్థాయి వద్ద నిరోధం ఎదురయ్యే అవకాశం ఉందని అంచనా వేస్తున్నారు. అంతర్జాతీయ భౌగోళిక పరిణామాలపై స్పష్టత వచ్చే వరకు దేశీయ మార్కెట్లు పరిమిత శ్రేణిలోనే కదలాడే అవకాశం ఉందని సాంకేతిక విశ్లేషకులు పేర్కొంటున్నారు.