China Q2 GDP | డ్రాగన్‌కు గ్రోత్ షాక్!

• చైనా ఎకానమీకి బ్రేకులు
• రెండో త్రైమాసికంలో 4.3 శాతానికే జీడీపీ వృద్ధి
• అత్యంత కనిష్ట స్థాయికి పడిపోయిన జీడీపీ
• మూడున్నరేళ్లలో అత్యంత బలహీన జీడీపీ వృద్ధి
• రిటైల్ అమ్మకాల్లో ఒక శాతం వృద్ధి.. పెట్టుబడుల్లో 5.7 శాతం పతనం
• జూన్‌లో ఎగుమతులు 27 శాతం పెరిగినా.. దేశీయ డిమాండ్ నీరసం

ఆంధ్రప్రభ, బీజింగ్ : ప్రపంచంలో రెండో అతిపెద్ద ఆర్థిక వ్యవస్థ చైనాకు వృద్ధి కష్టాలు మరింత తీవ్రమయ్యాయి. వినియోగదారుల డిమాండ్ బలహీనపడటం, పెట్టుబడులు భారీగా తగ్గడం, దీర్ఘకాలంగా కొనసాగుతున్న ఆస్తి సంక్షోభం కారణంగా చైనా ఆర్థిక వృద్ధి దశాబ్దాలలోనే అత్యంత కనిష్ట స్థాయికి పడిపోయింది. ఆస్తి రంగ సంక్షోభానికి ఇరాన్ యుద్ధంతో తలెత్తిన చమురు ధరల ప్రభావం తోడవడంతో 2026 రెండో త్రైమాసికంలో చైనా స్థూల దేశీయోత్పత్తి వృద్ధి 4.3 శాతానికే పరిమితమైంది. మూడున్నరేళ్లలో ఇదే అత్యంత బలహీన వృద్ధి రేటుగా నమోదైంది.

చైనా జాతీయ గణాంకాల బ్యూరో… బుధవారం విడుదల చేసిన వివరాల ప్రకారం.. గత ఏడాది ఇదే కాలంతో పోలిస్తే ఏప్రిల్-జూన్ త్రైమాసికంలో జీడీపీ 4.3 శాతం వృద్ధి చెందింది. కొవిడ్ ఆంక్షలు అమల్లో ఉన్న మూడేళ్ల కాలాన్ని మినహాయిస్తే.. 1990వ దశకం ప్రారంభంలో చైనా అధికారికంగా జీడీపీ గణాంకాలను వెల్లడించడం ప్రారంభించిన తర్వాత నమోదైన అత్యల్ప త్రైమాసిక వృద్ధి రేట్లలో ఇది ఒకటిగా నిలిచింది.

బీజింగ్ ప్రభుత్వం 2026 నాటికి 4.5 నుంచి 5 శాతం వృద్ధి లక్ష్యాన్ని నిర్దేశించుకుంది. అయితే, వాస్తవ గణాంకాలు అంచనాలను అందుకోలేకపోయాయి. రెండో త్రైమాసికంలో వృద్ధి ఆ లక్ష్యం కంటే దిగువకు పడిపోయింది. తొలి త్రైమాసికం వృద్ధితో పోలిస్తే.. రెండో త్రైమాసికంలో భారీ మందగమనం కనిపించింది. తొలి త్రైమాసికంలో చైనా ఆర్థిక వ్యవస్థ 5 శాతం వృద్ధి సాధించగా, కేవలం మూడు నెలల్లోనే వృద్ధి రేటు 4.3 శాతానికి మందగించడంతో, ఆర్థిక వర్గాల్లో ఆందోళనలు పెరిగాయి.

త్రైమాసిక ప్రాతిపదికన చూస్తే చైనా జీడీపీ 0.9 శాతం పెరిగింది. తొలి త్రైమాసికంలో ఈ వృద్ధి 1.3 శాతంగా నమోదైంది. కొవిడ్ మహమ్మారి ప్రభావంతో చైనా ఆర్థిక వ్యవస్థ తీవ్ర ఒత్తిడిని ఎదుర్కొన్న 2022 నాలుగో త్రైమాసికం తర్వాత ఇదే అత్యంత బలహీన వార్షిక వృద్ధి వేగం కావడం గమనార్హం.

పెట్టుబడుల్లో 5.7 శాతం పతనం.. రియల్ ఎస్టేట్ రంగం కుదేలు..

చైనా ఆర్థిక వ్యవస్థపై ఉన్న ఒత్తిడిని.. నెలవారీ గణాంకాలు కూడా స్పష్టం చేస్తున్నాయి. గతేడాదితో పోలిస్తే జూన్‌లో రిటైల్ అమ్మకాలు కేవలం 1 శాతం మాత్రమే పెరిగాయి. ప్రజల్లో కొనుగోలు ఆసక్తి తగ్గడం, వినియోగదారుల విశ్వాసం బలహీనపడటానికి ఇది సంకేతంగా ఆర్థికవేత్తలు భావిస్తున్నారు.

మరోవైపు, పెట్టుబడుల‌ పరిస్థితిలో డ్రాగ‌న్ మరింత దిగజారింది. 2026 మొదటి ఆరు నెలల్లో స్థిరాస్తి పెట్టుబడి వార్షిక ప్రాతిపదికన 5.7 శాతం తగ్గింది. మొదటి ఐదు నెలల్లో ఈ తగ్గుదల 4.1 శాతంగా ఉండగా, జూన్ నాటికి ఈ పతనం మరింత వేగవంతమైంది. అయితే, పారిశ్రామిక ఉత్పత్తి కొంత ఉపశమనం కలిగించింది. గత ఏడాదితో పోలిస్తే జూన్‌లో పారిశ్రామిక ఉత్పత్తి 5.3 శాతం వృద్ధిని నమోదు చేసింది.

అయితే, చైనా ఆర్థిక వ్యవస్థకు ఆస్తి రంగ సంక్షోభం అతిపెద్ద భారంగా మారింది. 2026 తొలి ఆరు నెలల్లో రియల్ ఎస్టేట్ రంగ పెట్టుబడులు గత ఏడాదితో పోలిస్తే ఏకంగా 18 శాతం పడిపోయాయి. తొలి ఐదు నెలల్లో ఈ పతనం 16.2 శాతంగా ఉండగా.. జూన్ నాటికి పరిస్థితి మరింత దిగజారింది.

ఇళ్ల విక్రయ విస్తీర్ణం 11.6 శాతం తగ్గింది. కొత్త నిర్మాణాల ప్రారంభం ఏకంగా 23.4 శాతం క్షీణించింది. ఆస్తి అభివృద్ధి సంస్థలు సమీకరించిన నిధులు కూడా 20.2 శాతం పడిపోయాయి. జూన్‌లో కొత్త ఇళ్ల ధరలు మరోసారి తగ్గాయి. ప్రధాన నగరాల్లో అక్కడక్కడా స్వల్ప మెరుగుదల కనిపించినా.. దేశవ్యాప్తంగా గృహాలకు డిమాండ్ బలహీనంగానే ఉంది.

పరిశ్రమలే డ్రాగన్‌కు అండ.. కొనుగోళ్లలో స్వల్ప ఊరట !

వినియోగ రంగంలో మాత్రం జూన్ గణాంకాలు కొంత ఊరటనిచ్చాయి. రిటైల్ అమ్మకాలు గత ఏడాదితో పోలిస్తే 1 శాతం పెరిగాయి. మే నెలలో 0.6 శాతం క్షీణించిన అమ్మకాలు జూన్‌లో తిరిగి వృద్ధి బాట పట్టాయి. ఆర్థికవేత్తలు 0.1 శాతం తగ్గుదల ఉంటుందని అంచనా వేసిన నేపథ్యంలో తాజా గణాంకాలు అంచనాల కంటే మెరుగ్గా నమోదయ్యాయి. అయితే చైనా వంటి భారీ ఆర్థిక వ్యవస్థలో ఒక శాతం రిటైల్ అమ్మకాల వృద్ధి దేశీయ డిమాండ్ పూర్తిగా పుంజుకుందని చెప్పేందుకు సరిపోదని విశ్లేషకులు అభిప్రాయపడుతున్నారు.

ఓవైపు పెట్టుబడులు, ఆస్తి రంగం కుదేలవుతుంటే.. పారిశ్రామిక ఉత్పత్తి మాత్రం చైనా ఆర్థిక వ్యవస్థకు అండగా నిలుస్తోంది. జూన్‌లో పారిశ్రామిక ఉత్పత్తి 5.3 శాతం పెరిగింది. మే నెలలో నమోదైన 4.5 శాతం వృద్ధితో పోలిస్తే ఇది మెరుగైన ప్రదర్శన. ఆర్థికవేత్తలు 4.7 శాతం పారిశ్రామిక వృద్ధిని అంచనా వేయగా.. వాస్తవ గణాంకాలు అంచనాలను అధిగమించాయి. కృత్రిమ మేధకు సంబంధించిన ఉత్పత్తుల ఎగుమతులు సహా తయారీ రంగం బలంగా ఉండటం పారిశ్రామిక ఉత్పత్తికి ఊతమిస్తున్నట్లు విశ్లేషకులు చెబుతున్నారు.

ఆస్తి రంగ సంక్షోభం.. వినియోగంపై దెబ్బ

చైనా ఆర్థిక వ్యవస్థ గత కొన్నేళ్లుగా కొనసాగుతున్న స్థిరాస్తి రంగ మందగమనంతో సతమతమవుతోంది. గృహ నిర్మాణ రంగంలోని అనిశ్చితి… ప్రజల విశ్వాసాన్ని దెబ్బతీస్తోంది. దీని ఫలితంగా, కుటుంబాలు ఖర్చులను తగ్గించుకుంటుండగా, దేశీయ వినియోగం ఆశించినంతగా పుంజుకోవడం లేదు. అదే సమయంలో చైనా ఎగుమతులు భారీగా పెరుగుతుండటంతో… వాణిజ్య భాగస్వామ్య దేశాలతో ఉద్రిక్తతలు కూడా పెరుగుతున్నాయి. దేశీయ డిమాండ్ బలహీనంగా ఉన్న తరుణంలో చైనా ఆర్థిక వ్యవస్థ విదేశీ వాణిజ్యంపై ఆధారపడుతోందా అనే దానిపై చర్చ మొదలైంది.

ఐఎన్‌జి గ్రేటర్ చైనా ముఖ్య ఆర్థికవేత్త లిన్ సాంగ్ విశ్లేషణ ప్రకారం.. మొదటి త్రైమాసికంతో పోలిస్తే రెండవ త్రైమాసికంలో ఆర్థిక వృద్ధి గణనీయంగా మందగించింది. స్థిరాస్తి పెట్టుబడులు ప్రతికూల వృద్ధిలోకి జారిపోగా, రిటైల్ అమ్మకాలు స్వల్ప వృద్ధికే పరిమితమయ్యాయి. ఇది ఆర్థిక పరిస్థితిపై నిరాశాజనక సంకేతాలను ఇస్తోందని ఆయ‌న‌ పేర్కొన్నారు.

జీడీపీ లెక్కలపై సందేహాలు..

ఇతర ప్రధాన ఆర్థిక వ్యవస్థల మాదిరిగా… చైనా తన త్రైమాసిక జీడీపీని పెట్టుబడులు, వినియోగం, నికర ఎగుమతుల పూర్తి వివరాలతో విడుదల చేయదు. దీంతో ఆర్థికవేత్తలు నెలవారీ పారిశ్రామిక ఉత్పత్తి, రిటైల్ అమ్మకాలు, పెట్టుబడులు, ప్రభుత్వ వ్యయాల గణాంకాలను పరిశీలిస్తూ వాస్తవ ఆర్థిక పరిస్థితిని అంచనా వేస్తుంటారు.

మొదటి ఐదు నెలల్లో ప్రభుత్వ వ్యయం తగ్గిందని యూరేషియా గ్రూప్ చైనా విభాగాధిపతి అయిన డాన్ వాంగ్ నివేదిక పేర్కొంది. పారిశ్రామిక, ఆర్థిక, ప్రభుత్వ వ్యయ గణాంకాలు ఒకదానితో మరొకటి సరిపోతున్నప్పటికీ.. అవి అధికారిక జీడీపీ వృద్ధి సంఖ్యతో పూర్తిగా సరిపోలడం లేదని అభిప్రాయపడ్డారు. ఈ వ్యత్యాసాన్ని విదేశీ డిమాండ్ మాత్రమే పాక్షికంగా వివరించగలదని పేర్కొన్నారు.

చైనా అధికారిక జీడీపీ గణాంకాల విశ్వసనీయతపై 1990వ దశకం నుంచే కొందరు ఆర్థికవేత్తలు సందేహాలు వ్యక్తం చేస్తున్నారు. దీంతో పలు అంతర్జాతీయ ఆర్థిక సంస్థలు ప్రత్యామ్నాయ సూచీల ఆధారంగా చైనా వాస్తవ ఆర్థిక కార్యకలాపాలను అంచనా వేస్తున్నాయి.

క్యాపిటల్ ఎకనామిక్స్ ప్రత్యామ్నాయ అంచనా ప్రకారం చైనా వృద్ధి సుమారు 3 శాతంగా ఉంటుందని ఆ సంస్థ చైనా ఆర్థికశాస్త్ర విభాగాధిపతి జూలియన్ ఇవాన్స్-ప్రిట్చార్డ్ తెలిపారు. తాజా అధికారిక జీడీపీ గణాంకాలు తమ అంచనాలకు కొంత దగ్గరగా ఉన్నాయని ఆయన అన్నారు.

ఎగుమతుల్లో 27 శాతం జంప్

దేశీయ ఆర్థిక సూచీలు బలహీనంగా ఉన్నప్పటికీ చైనా ఎగుమతులు మాత్రం భారీగా పెరిగాయి. జూన్‌లో ఎగుమతులు గత ఏడాదితో పోలిస్తే ఏకంగా 27 శాతం పెరిగాయి. దీంతో విదేశీ డిమాండ్ చైనా ఆర్థిక కార్యకలాపాలకు కీలక మద్దతుగా నిలుస్తున్నట్లు కనిపిస్తోంది. అయితే దిగుమతులు కూడా భారీగా పెరగడంతో నికర ఎగుమతుల వృద్ధి వార్షిక ప్రాతిపదికన ఇంకా ప్రతికూలంగానే ఉందని ఆర్థికవేత్త లిన్ సాంగ్ పేర్కొన్నారు. తొలి త్రైమాసిక జీడీపీ గణాంకాల్లో పెద్దగా కనిపించని నెలవారీ సూచీల బలహీనత.. రెండో త్రైమాసికంలో స్పష్టంగా బయటపడిందని విశ్లేషించారు.

2026 రెండో త్రైమాసికంలో చైనా 4.5 శాతం వృద్ధి సాధిస్తుందని ఆర్థిక విశ్లేషకులు అంచనా వేశారు. అయితే వాస్తవ వృద్ధి 4.3 శాతానికే పరిమితమైంది. తొలి ఆరు నెలల్లో చైనా జీడీపీ వృద్ధి 4.7 శాతంగా నమోదైంది. దేశీయ వినియోగాన్ని పెంచడం, పెట్టుబడులను పునరుద్ధరించడం, ఆస్తి రంగ సంక్షోభాన్ని పరిష్కరించడం ఇప్పుడు బీజింగ్ పాలకుల ముందున్న ప్రధాన సవాళ్లుగా మారాయి.

ఒకవైపు పరిశ్రమల జోరు.. మరోవైపు పెట్టుబడుల పతనం

చైనా ఆర్థిక వ్యవస్థలో ఇప్పుడు స్పష్టమైన అసమతుల్యత కనిపిస్తోంది. పారిశ్రామిక ఉత్పత్తి, ఎగుమతులు బలంగా కొనసాగుతుండగా.. వినియోగం, పెట్టుబడులు మాత్రం వెనుకబడుతున్నాయి. ఆస్తి రంగ సంక్షోభాన్ని నేరుగా పరిష్కరించకుండా వృద్ధిని స్థిరీకరించడం బీజింగ్ పాలకులకు కష్టమైన సవాలుగా మారుతోందని ఆర్థిక నిపుణులు విశ్లేషిస్తున్నారు. దీనికి ఇరాన్ యుద్ధంతో తలెత్తిన చమురు ధరల షాక్ కొత్త సమస్యగా మారింది. ఇప్పటికే రియల్ ఎస్టేట్ సంక్షోభంతో సతమతమవుతున్న చైనా ఆర్థిక వ్యవస్థపై ఇంధన వ్యయాల ఒత్తిడి అదనపు భారాన్ని మోపినట్లు అంచనా వేస్తున్నారు.

బీజింగ్ ఏం చేయబోతోంది?

జూలై చివరిలో జరిగే అవకాశం ఉన్న చైనా కమ్యూనిస్టు పార్టీ పొలిట్‌బ్యూరో సమావేశంపై ఇప్పుడు పెట్టుబడిదారుల దృష్టి పడింది. ఏడాది మిగిలిన కాలానికి ఆర్థిక విధానాన్ని ప్రభావితం చేసే కొత్త ఉద్దీపన చర్యలపై ఈ సమావేశంలో సంకేతాలు వెలువడవచ్చని భావిస్తున్నారు. అయితే భారీగా వడ్డీ రేట్ల తగ్గింపు వంటి దూకుడు ద్రవ్య విధాన చర్యలకు బదులుగా.. ప్రభుత్వ వ్యయాలను పెంచడం ద్వారా ఆర్థిక వ్యవస్థకు ఊతమిచ్చే అవకాశాలే ఎక్కువగా ఉన్నాయని విశ్లేషకులు అంచనా వేస్తున్నారు.

ఆర్థిక మందగమనాన్ని ఎదుర్కొనేందుకు ప్రతిచక్ర చర్యలను మరింత బలోపేతం చేయాల్సిన అవసరం ఉందని చైనా ప్రధాని లీ చియాంగ్ ఇప్పటికే సంకేతాలిచ్చారు. దేశీయ వినియోగాన్ని పెంచడం, ఆస్తి రంగాన్ని సంక్షోభం నుంచి బయటపడేయడం, పెట్టుబడులను పునరుద్ధరించడం ఇప్పుడు చైనా పాలకుల ముందున్న అతిపెద్ద సవాళ్లు. పరిశ్రమలు పరుగులు తీస్తున్నా.. పెట్టుబడులు కూలిపోతున్న ఈ అసమతుల్యతను బీజింగ్ ఎంత త్వరగా సరిచేస్తుందన్నదే డ్రాగన్ ఆర్థిక భవిష్యత్తును నిర్ణయించనుంది.