అమీర్ ఖాన్ మూడో పెళ్లి..

గౌరీ స్ప్రాట్‌తో రిజిస్టర్డ్ వివాహం
ముంబైలోని నివాసంలో అత్యంత సన్నిహితుల సమక్షంలో నిరాడంబరంగా వివాహం
25 ఏళ్ల స్నేహం.. రెండేళ్ల ప్రేమకు పెళ్లితో ముగింపు..
అమీర్ జీవితంలో కొత్త అధ్యాయం

ఆంధ్ర‌ప్ర‌భ వెబ్‌డెస్క్ : బాలీవుడ్ స్టార్ హీరో అమీర్ ఖాన్ కొత్త జీవితాన్ని ప్రారంభించారు. తన చిరకాల స్నేహితురాలు, భాగస్వామి గౌరీ స్ప్రాట్‌ను ఆదివారం ముంబైలోని బాంద్రా నివాసంలో అత్యంత సన్నిహితులు, కుటుంబ సభ్యుల సమక్షంలో రిజిస్టర్డ్ వివాహం చేసుకున్నారు. ఎలాంటి ఆర్భాటం లేకుండా జరిగిన ఈ వేడుకకు కుటుంబ సభ్యులు, కొద్దిమంది సన్నిహితులు మాత్రమే హాజరయ్యారు.

బాలీవుడ్ ప్రముఖ నటుడు అమీర్ ఖాన్ (61) ఆదివారం తన జీవితంలో మరో కొత్త అధ్యాయానికి శ్రీకారం చుట్టారు. తన చిరకాల స్నేహితురాలు గౌరీ స్ప్రాట్‌తో ముంబైలోని బాంద్రాలో ఉన్న తన నివాసంలో రిజిస్టర్డ్ వివాహం చేసుకున్నారు. ప్రత్యేక వివాహ చట్టం ప్రకారం జరిగిన ఈ వేడుక పూర్తిగా వ్యక్తిగతంగా, కుటుంబ సభ్యులు, అత్యంత సన్నిహితుల సమక్షంలో జరిగింది.

ముంబైలో భారీ వర్షాలు కురుస్తున్నప్పటికీ వివాహ కార్యక్రమం నిర్ణయించిన షెడ్యూల్ ప్రకారమే నిర్వహించారు. వివాహ రిజిస్ట్రేషన్‌కు సంబంధించిన పత్రాలపై అమీర్ ఖాన్, గౌరీ స్ప్రాట్ సంతకాలు చేసి తమ బంధాన్ని అధికారికంగా నమోదు చేసుకున్నారు.

ఈ ప్రైవేట్ వేడుకకు అమీర్ ఖాన్ పిల్లలు జునైద్ ఖాన్, ఐరా ఖాన్, ఆజాద్ రావ్ ఖాన్‌తో పాటు గౌరీ కుమారుడు కూడా హాజరయ్యారు. అలాగే ప్రముఖ పారిశ్రామికవేత్త ముఖేష్ అంబానీ, దర్శకుడు అశుతోష్ గోవారికర్, నటుడు వీర్ దాస్ తదితరులు కూడా ఈ వివాహ వేడుకలో పాల్గొన్నట్లు సమాచారం.

అమీర్ ఖాన్, గౌరీ స్ప్రాట్‌ల పరిచయం దాదాపు 25 సంవత్సరాల క్రితం బెంగళూరులో ప్రారంభమైంది. అనంతరం చాలా కాలం తర్వాత ఇద్దరూ మళ్లీ దగ్గరై గత రెండేళ్లుగా ప్రేమలో ఉన్నారు. ఇటీవల తన 60వ జన్మదిన వేడుక సందర్భంగా గౌరీ స్ప్రాట్‌ను మీడియాకు పరిచయం చేసిన అమీర్, తమ బంధాన్ని బహిరంగంగా ప్రకటించారు. అనంతరం జూలై 5న వివాహం చేసుకోనున్నట్లు కూడా స్వయంగా వెల్లడించారు.

అమీర్ ఖాన్‌కు ఇది మూడో వివాహం. గతంలో రీనా దత్తాను వివాహం చేసుకుని అనంతరం విడాకులు తీసుకున్నారు. తర్వాత దర్శకురాలు కిరణ్ రావ్‌ను వివాహం చేసుకున్న ఆయన, ఆమెతో కూడా విడిపోయారు. అయితే ఇద్దరితోనూ స్నేహపూర్వక సంబంధాలు కొనసాగిస్తూ, పిల్లల బాధ్యతలను కలిసి నిర్వర్తిస్తున్నారు.

ఎలాంటి హంగూ ఆర్భాటాలకు తావివ్వకుండా, అత్యంత నిరాడంబరంగా జరిగిన ఈ వివాహం బాలీవుడ్‌లో చర్చనీయాంశంగా మారింది. అభిమానులు, సినీ ప్రముఖులు ఈ కొత్త దంపతులకు శుభాకాంక్షలు తెలియజేస్తున్నారు