Green Energy | పరుగులు తీసేందుకు రెడీ

Green Energy | ఆంధ్ర‌ప్ర‌భ వెబ్‌డెస్క్ : భారత రైల్వే రంగం మరో కీలక పర్యావరణహిత దిశగా అడుగులు వేస్తోంది. దేశంలోనే తొలి స్వదేశీ హైడ్రోజన్ ఫ్యూయెల్ సెల్ రైలు త్వరలో ప్రయోగాత్మకంగా పట్టాలెక్కనుంది. ఈ ప్రాజెక్టు పూర్తిగా శూన్య కార్బన్ ఉద్గారాల లక్ష్యంతో అభివృద్ధి చేయబడుతోంది. ఈ రైలు పూర్తిగా హైడ్రోజన్ ఇంధనంతో నడిచేలా రూపొందించబడింది. హైడ్రోజన్ ఫ్యూయెల్ సెల్ రైలు కేవలం ఒక కొత్త రవాణా వ్యవస్థ మాత్రమే కాదు, ఇది భారత రైల్వేలో పర్యావరణహిత భవిష్యత్తుకు ప్రారంభ సూచికగా భావిస్తున్నారు. విజయవంతమైతే, ఇది దేశ రవాణా రంగాన్ని పూర్తిగా గ్రీన్ ఎనర్జీ వైపు మార్చే కీలక సాంకేతిక విప్లవంగా నిలవనుంది. ఈ ప్రాజెక్టు విజయవంతమైతే, భారతదేశం ప్రపంచంలోనే హైడ్రోజన్ రైలు టెక్నాలజీని వేగంగా అమలు చేసే దేశాల్లో ఒకటిగా నిలిచే అవకాశం ఉంది.

ప్ర‌త్యేక‌త ఏమిటి?
హైడ్రోజన్ ఫ్యూయెల్ సెల్ రైలు అనేది డీజిల్ లేదా విద్యుత్ లైన్లపై ఆధారపడకుండా, హైడ్రోజన్ వాయువును ఇంధనంగా ఉపయోగించే ఆధునిక రైలు వ్యవస్థ. ఈ రైలులో హైడ్రోజన్ + ఆక్సిజన్ రసాయన చర్య ద్వారా విద్యుత్ ఉత్పత్తి అవుతుంది. ఆ విద్యుత్‌తో మోటార్లు పనిచేసి రైలు నడుస్తుంది. ఈ ప్రక్రియలో ఉప ఉత్పత్తిగా కేవలం నీటి ఆవిరి మాత్రమే విడుదల అవుతుంది. కాలుష్యం విడుదల చేయదు (కేవలం నీటి ఆవిరి మాత్రమే). ఫాసిల్ ఇంధనాలపై ఆధారపడదు. దీర్ఘకాలంలో పర్యావరణానికి అనుకూలం. ఎలక్ట్రిక్ రైళ్లకు నిరంతర విద్యుత్ లైన్లు (OHE) అవసరం. మౌలిక సదుపాయాల ఖర్చు ఎక్కువ. కానీ హైడ్రోజన్ రైలుకు ఓవర్‌హెడ్ వైర్లు అవసరం లేదు.
దూర ప్రాంతాల్లో కూడా నడపవచ్చు. ఇంధన నిల్వతో స్వతంత్రంగా పనిచేస్తుంది.

10 బోగీలతో…
10 బోగీలతో తొలి స్వదేశీ హైడ్రోజన్ రైలు రూపకల్పన చేశారు. 1200 కిలోవాట్ల సామర్థ్యం గల ఫ్యూయల్ సెల్ సిస్టమ్ ఉంటుంది. గరిష్టంగా గంటకు 75 కిలోమీటర్ల వేగంతో వెళ్తుంది. డీజిల్ రైళ్లలాగా కాలుష్యం వెలువ‌డ‌దు. నిర్వహణ ఖర్చులు కూడా త‌క్కువ‌గా ఉంటుంది.

ప్రయోగ మార్గం
జింద్–సోనీ పట్ (Jind–Sonipat) రూట్‌లో పరీక్షాత్మక నడిపేందుకు అనుమతి లభించింది. పనితీరు, భద్రత, ఇంధన సామర్థ్యం వంటి అంశాలపై పరీక్షలు నిర్వహించనున్నారు.