2friends | అతివేగం… రెండు కుటుంబాల్లో అంతులేని విషాదం
2friends | అతివేగం… రెండు కుటుంబాల్లో అంతులేని విషాదం
2friends | కారును తప్పించబోయి డివైడర్ను ఢీకొన్న బైక్
చికిత్సకు తరలిస్తుండగా మరో యువకుడి మృతి
పాత పాలువాయి గ్రామంలో కన్నీటి వాతావరణం
యువతలో అతివేగంపై మళ్లీ ఆందోళన
2friends గురజాల, మే 22 (ఆంధ్రప్రభ) : ఇంట్లో నుంచి నవ్వుకుంటూ బయలుదేరిన ముగ్గురు యువకులు… కొన్ని నిమిషాల్లోనే రక్తపు మడుగులో పడి కనిపిస్తారని వారి కుటుంబాలు ఊహించి ఉండవు. జీవితంపై ఎన్నో ఆశలు, భవిష్యత్తుపై ఎన్నో కలలు కంటున్న ఆ యువకుల ప్రయాణం… ఒక్క క్షణం అతివేగం కారణంగా విషాదాంతమైంది. పల్నాడు జిల్లా గురజాలలో జరిగిన ఈ ఘోర రోడ్డు ప్రమాదం రెండు కుటుంబాల్లో తీరని శోకాన్ని మిగిల్చింది.
శుక్రవారం గురజాల పట్టణంలోని కారంపూడి రహదారిపై ఉన్న ఓ ప్రైవేట్ ఆసుపత్రి సమీపంలో ఈ దుర్ఘటన చోటుచేసుకుంది. పోలీసులు తెలిపిన వివరాల ప్రకారం… రెంటచింతల మండలం పాత పాలువాయి గ్రామానికి చెందిన ముగ్గురు యువకులు పల్సర్ బైక్పై గురజాల వైపు వస్తున్నారు. అయితే అతివేగంగా వెళ్తున్న సమయంలో ముందుగా వెళ్తున్న కారును తప్పించబోయే క్రమంలో బైక్ అదుపుతప్పి డివైడర్ యూటర్న్ను బలంగా ఢీకొట్టింది.
ఈ ప్రమాదం తీవ్రత ఎంత భయంకరంగా ఉందంటే… బైక్పై ఉన్న యువకులు ఎగిరి పడిపోయారు. దేరంగుల బంగారు (20) అనే యువకుడు అక్కడికక్కడే ప్రాణాలు కోల్పోయాడు. మరో ఇద్దరు యువకులు తీవ్ర గాయాలతో రోడ్డుపై కొట్టుమిట్టాడారు. ప్రమాదాన్ని గమనించిన స్థానికులు వెంటనే స్పందించి క్షతగాత్రులను గురజాల సామాజిక ఆరోగ్య కేంద్రానికి తరలించారు.
అయితే అప్పటికే పరిస్థితి విషమంగా ఉన్న దేరంగుల భాస్కరరావు (20)ను మెరుగైన చికిత్స కోసం తరలిస్తుండగా మార్గమధ్యలోనే మృతి చెందాడు. మరో యువకుడు ఉప్పుతోళ్ల వెంకయ్య (19) తీవ్ర గాయాలతో చికిత్స పొందుతున్నాడు. ఈ ముగ్గురు యువకులూ అవివాహితులేనని తెలిసి గ్రామంలో విషాదం మరింత ముదిరింది.
ఈ వార్త తెలిసిన వెంటనే పాత పాలువాయి గ్రామంలో కన్నీటి వాతావరణం నెలకొంది. కొద్ది గంటల క్రితం వరకు కలిసి తిరిగిన యువకులు… ఇలా ఒక్కసారిగా మృత్యువాత పడటాన్ని కుటుంబ సభ్యులు జీర్ణించుకోలేకపోతున్నారు. కుమారుల మృతదేహాలను చూసి తల్లిదండ్రులు కన్నీరుమున్నీరుగా విలపించడం అక్కడున్న వారిని కలచివేసింది.
ప్రమాదానికి కారణమైన కారును గురజాల మండలం పులిపాడు గ్రామానికి చెందినదిగా పోలీసులు గుర్తించారు. ఘటనపై కేసు నమోదు చేసి దర్యాప్తు చేపట్టినట్లు తెలిపారు.
ఈ ప్రమాదం మరోసారి రోడ్డు భద్రతపై ఆందోళన రేకెత్తిస్తోంది. ముఖ్యంగా యువతలో అతివేగం ప్రాణాలను ఎలా బలి తీసుకుంటోందో ఈ ఘటన కళ్లకు కట్టినట్టు చూపించింది. ఒక క్షణం నిర్లక్ష్యం… రెండు కుటుంబాల్లో జీవితాంతం తీరని విషాదాన్ని మిగిల్చింది.
