3persons2days | డోర్నకల్ను కలిచివేసిన వరుస విషాదాలు..
3persons2days | డోర్నకల్ను కలిచివేసిన వరుస విషాదాలు..
3persons2days | చేపల వేటకు వెళ్లి ప్రాణాలు కోల్పోయిన వ్యక్తి
మంచినీటి కోసం వెళ్లి విషాదాంతం
కనిపించకుండా పోయిన మహిళ బావిలో మృతదేహంగా
వరుస మరణాలతో దిగ్భ్రాంతిలో మండల ప్రజలు
కుటుంబాల రోదనతో విషాద వాతావరణం
కేసులు నమోదు చేసి దర్యాప్తు ప్రారంభించిన పోలీసులు
3persons2days | డోర్నకల్, ఆంధ్రప్రభ : డోర్నకల్ మండలంలో వరుసగా చోటుచేసుకున్న మూడు విషాద ఘటనలు ప్రజలను తీవ్ర దిగ్భ్రాంతికి గురిచేశాయి. రెండు రోజుల వ్యవధిలో ముగ్గురు ప్రాణాలు కోల్పోవడంతో మండలమంతా విషాదఛాయలు అలుముకున్నాయి. ఉదయం ఇంటి నుంచి సాధారణంగా బయటకు వెళ్లిన వారు… తిరిగి శవాలుగా ఇంటికొచ్చిన తీరు కుటుంబాలను కన్నీరుమున్నీరు చేస్తోంది.
బూరుపాడు గ్రామానికి చెందిన ఓ వ్యక్తి జీవనోపాధి కోసం చేపల వేటకు వెళ్లి ప్రమాదవశాత్తు ప్రాణాలు కోల్పోవడం గ్రామస్థులను కలిచివేసింది. ఇంటి అవసరాల కోసం, కుటుంబం కోసం సాధారణంగా వెళ్లిన ఆ వ్యక్తి ఇక తిరిగి రాకపోవడంతో కుటుంబ సభ్యుల రోదనలు హృదయాలను కదిలిస్తున్నాయి. “వెళ్లి వస్తా” అని ఇంటి నుంచి బయటకు వెళ్లిన మనిషి… మృతదేహంగా మారిపోవడాన్ని కుటుంబ సభ్యులు జీర్ణించుకోలేకపోతున్నారు.
మరో ఘటనలో గొర్రెలు మేపడానికి వెళ్లిన వ్యక్తి… దాహం తీర్చుకోవడానికి మంచినీటి కోసం ప్రయత్నించే క్రమంలోనే ప్రాణాలు కోల్పోవడం మరింత విషాదాన్ని నింపింది. మండుతున్న ఎండల్లో జీవన పోరాటం సాగిస్తున్న సాధారణ ప్రజల పరిస్థితి ఎంత దుర్భరంగా ఉందో ఈ ఘటన మరోసారి గుర్తుచేసింది. కుటుంబ పోషణ కోసం కష్టపడుతున్న వ్యక్తి… చివరకు దాహార్తికే బలవ్వడం స్థానికులను తీవ్రంగా కలచివేసింది.
ఇక మల్లయ్యకుంట తండాకు చెందిన తేజావత్ సేవిరి ఘటన మరింత బాధను మిగిల్చింది. బుధవారం సాయంత్రం నుంచి ఆమె కనిపించకుండా పోవడంతో కుటుంబ సభ్యులు ఆందోళన చెందారు. రాత్రంతా బంధువులు, గ్రామస్థులు వెతికినా ఆచూకీ లభించలేదు. చివరకు గురువారం బొడ్రా తండా సమీపంలోని బావిలో ఆమె మృతదేహం కనిపించడంతో కుటుంబ సభ్యులు శోకసంద్రంలో మునిగిపోయారు. సేవిరికి మతిస్థిమితం సరిగా లేదని స్థానికులు చెబుతున్నారు. ఆమె మృతితో తండాలో విషాద వాతావరణం నెలకొంది.
వరుసగా చోటుచేసుకున్న ఈ మూడు ఘటనలు డోర్నకల్ మండల ప్రజలను తీవ్ర దిగ్భ్రాంతికి గురిచేశాయి. ఒక్కో కుటుంబంలో వినిపిస్తున్న రోదనలు… గ్రామాల్లో నెలకొన్న విషాద నిశ్శబ్దం… అక్కడి ప్రజల హృదయాలను కలచివేస్తున్నాయి. పోలీసులు కేసులు నమోదు చేసి దర్యాప్తు చేపట్టారు.
click here to read నాగుర్లపల్లిలో ఆస్తి వివాదం.. వృద్ధురాలిపై దాడి
