iplmay3 | ఉప్ప‌ల్ స్టేడియం వ‌ద్ద సంద‌డి

ఉప్ప‌ల్‌లో ట్రాఫిక్ ఆంక్ష‌లు
ట్రాఫిక్ జామ్ కాకుండా చ‌ర్య‌లు
వాహ‌నాల‌ను దారి మ‌ళ్లిస్తున్న పోలీసులు
ప్ర‌త్యామ్నాయ మార్గాల్లో ప్ర‌యాణం

ఆంధ్ర‌ప్ర‌భ వెబ్‌డెస్క్ : ఐపీఎల్ 2026లో భాగంగా ఇవాళ మ‌ధ్యాహ్నం 3.30గంట‌ల‌కు కోల్‌క‌తా, స‌న్‌రైజ‌ర్స్ మ‌ధ్య ఉప్ప‌ల్ స్టేడియంలో మ్యాచ్ జ‌ర‌గ‌నుంది. ఉప్పల్ రాజీవ్ గాంధీ ఇంటర్నేషనల్ క్రికెట్ స్టేడియంలో మ్యాచ్‌ జరుగుతుండటంతో అభిమానుల సందడి మొద‌లైంది. ఇప్ప‌టికే అభిమానుల రాక మొద‌లైంది. సన్‌రైజర్స్ హైదరాబాద్ (SRH) జట్టుకు మద్దతుగా నగరంలో ఐపీఎల్ జెర్సీలు, బ్యానర్లు సందడి చేస్తున్నాయి. ప్రేక్ష‌కుల ర‌ద్దీని దృష్టిలో ఉంచుకొని ఉప్పల్ పరిసర ప్రాంతాల్లో ట్రాఫిక్ పోలీసులు కఠిన ఆంక్షలు విధించారు. స్టేడియం పరిసరాల్లోని ప్రతి ప్రధాన కూడలి వద్ద అదనపు పోలీసు బలగాలను మోహరించారు.

ఆదివారం మధ్యాహ్నం నుంచే కీలక ప్రాంతాల్లో ట్రాఫిక్ మళ్లింపులు అమల్లోకి వస్తాయి. మల్లాపూర్ నుంచి వచ్చే భారీ వాహనాలను ఉప్పల్ మెయిన్ రోడ్డులోకి అనుమతించరు. తార్నాక వైపు నుంచి వచ్చే వారు తమ గమ్యస్థానాలకు చేరుకోవడానికి ప్రత్యామ్నాయ మార్గాలను చూసుకోవాలి. చిన్న కార్లు ఉన్నవారు కేటాయించిన పార్కింగ్ స్థలాల్లోనే వాహనాలను నిలపాలి. దీనివల్ల ప్రధాన రోడ్లపై ట్రాఫిక్ జామ్ కాకుండా ఉంటుంది. స్థానిక నివాసితులు కూడా తమ సమయాన్ని ఆదా చేసుకునేందుకు వేరే రూట్లలో వెళ్లడం మంచిది. స్థానిక ప్రయాణికులకు ఇబ్బంది కలగకుండా పోలీసులు వాహనాల రాకపోకలను పర్యవేక్షిస్తారు. స్టేడియం దగ్గర సాధారణ ప్రజల కోసం పార్కింగ్ సౌకర్యం చాలా పరిమితంగా ఉంది. అందుకే సొంత వాహనాల కంటే హైదరాబాద్ మెట్రో సర్వీసులను వాడుకోవాలని అధికారులు గట్టిగా సిఫార్సు చేస్తున్నారు. మెట్రో ద్వారా స్టేడియం ఎంట్రీ గేట్ల వరకు వేగంగా చేరుకోవచ్చు. అత్యవసర సేవల వాహనాలకు దారి క్లియర్ గా ఉంచేందుకే ఈ ఏర్పాట్లు చేశారు.