సంతోషానికి కేరాఫ్‌గా ఫిన్లాండ్‌ మరోసారి అగ్రస్థానాన నిలిచింది. వరుసగా ఎనిమిదోసారి ప్రపంచంలోనే అత్యంత సంతోషకరమైన దేశంగా గుర్తింపు పొందింది. అంతర్జాతీయ ఆనంద దినోత్సవాన్ని పురస్కరించుకొని ఆక్స్‌ఫర్డ్‌ యూనివర్సిటీలోని వెల్‌బీయింగ్‌ రీసెర్చ్‌ సెంటర్‌ సంతోషకర దేశాల జాబితాను విడుదల చేసింది.
సంపద, వృద్ధి, మానవ సంబంధాలు, మనుషుల మధ్య విశ్వాసం, ఆత్మ సంతృప్తి, సామాజిక మద్దతు, జీవితకాలం, స్వేచ్ఛ, దాతృత్వం, అవినీతి వంటి అంశాలను ప్రామాణికంగా తీసుకుని ఈ సర్వే చేపట్టింది. దాని ఫలితాల ఆధారంగా ఈ జాబితాను రూపొందించారు. ఇందులో మరోసారి ఫిన్లాండ్‌ అగ్రస్థానంలో నిలవగా, తర్వాతి స్థానాల్లో డెన్మార్క్‌, ఐస్‌లాండ్‌, స్వీడెన్‌ ఉన్నాయి.
ప్రపంచంలో ఐదో అతిపెద్ద ఆర్థిక వ్యవస్థను కలిగి ఉన్న భారత్‌ ఈ జాబితాలో వెనుకపడింది. 147 దేశాల సరసన 118వ స్థానంలో నిలిచింది. అయితే, గతేడాదితో పోలిస్తే ఈ ర్యాంక్‌ కాస్త మెరుగవడం ఊరటనిచ్చే విషయం. గతేడాది ఈ జాబితాలో భారత్‌ 126వ స్థానంలో నిలవగా, ఈసారి 8 ర్యాంకులు మెరుగై, 118వ ప్లేస్‌కు చేరుకుంది.
అమెరికా, యూకే, ఫ్రాన్స్‌ వరుసగా 24, 23, 33వ స్థానాల్లో నిలిచాయి. గతేడాది 23వ స్థానంలో నిలిచిన యూఎస్‌ ఈ సారి ఒక ర్యాంకు దిగజారింది. 2012లో 11వ స్థానంలో నిలిచిన అమెరికా, ఇప్పుడు 24వ స్థానానికి పడిపోవడం గమనార్హం. గత రెండు దశాబ్దాలుగా అమెరికాలో ఒంటరిగా భోజనం చేసే వారిసంఖ్య 53 శాతం పెరిగిందని ఈ నివేదిక పేర్కొంది.
మరోవైపు తీవ్ర అంతర్యుద్ధంతో కొట్టిమిట్టాడుతున్న ఆఫ్ఘానిస్థాన్‌ అట్టడుగు స్థానం (147)లో నిలిచింది. పశ్చిమ ఆఫ్రికాలోని సియెర్రా లియోన్‌ (146), లెబనాన్‌(145) చివరి వరసలో నిలిచాయి. ఇజ్రాయెల్‌ (8), కోస్టారికా (6), మెక్సికో (10) దేశాలు టాప్‌-10లో చోటుదక్కించుకున్నాయి.
