ఉపాధి హామీ పనులను పరిశీలించిన జగత్ జయదేవ్ ఆర్య

బెజ్జంకి, ఆంధ్రప్రభ : జిల్లా గ్రామీణ అభివృద్ధి సంస్థ (DRDA) పిడి శ్రీ జగత్ జయదేవ్ ఆర్య ఉపాధి హామీ పథకం కింద జరుగుతున్న పనుల పర్యవేక్షణలో భాగంగా గుండారం గ్రామాన్ని సందర్శించారు. ఈ సందర్భంగా గ్రామ పరిధిలో కొనసాగుతున్న ఫీడర్ ఛానల్ పనులను స్వయంగా పరిశీలించి, పనుల నాణ్యత, పురోగతి, మరియు కార్మికుల పరిస్థితులపై సమగ్రంగా ఆరా తీశారు.

ప్రస్తుతం ఉన్న లోతు సరిపోదని గుర్తించి, నీటి పారుదల సమర్థవంతంగా సాగేందుకు ఛానల్ లోతును మరింత పెంచాలని సంబంధిత ఇంజినీరింగ్ సిబ్బందికి మరియు ఫీల్డ్ అధికారులకు సూచనలు ఇచ్చారు.అనంతరం గుండారం గ్రామంలోని ప్యాడి సెంటర్‌ను సందర్శించి కూలీలకు అవసరమైన మౌలిక సదుపాయాలపై ప్రత్యేక దృష్టి సారిస్తూ, తాగునీటి సరఫరా సక్రమంగా ఉండేలా చూడాలని అధికారులకు సూచించారు.

అలాగే ఎండ తీవ్రతను దృష్టిలో ఉంచుకుని కూలీలు విశ్రాంతి తీసుకునేందుకు తగిన టెంటు ఏర్పాటు చేయాలని ఆదేశించారు. కూలీల సంక్షేమం మరియు పనుల సమర్థ నిర్వహణ ప్రభుత్వ ప్రధాన లక్ష్యమని ఆయన పేర్కొన్నారు. ఉపాధి హామీ పథకం ద్వారా గ్రామీణ ప్రాంతాల్లో ఉపాధి అవకాశాలు పెంపొందడంతో పాటు మౌలిక వసతుల అభివృద్ధి కూడా సాధ్యమవుతుందని ఆయన అభిప్రాయపడ్డారు. ఈ కార్యక్రమంలో గ్రామ సర్పంచ్, ఎంపీడీవో ప్రవీణ్, ఏపీవో, సీసీలు మరియు ఇతర సంబంధిత అధికారులు పాల్గొన్నారు.