Accident I కొరిటికల్ సమీపంలో ఘోర రోడ్డు ప్రమాదం

Accident I నిర్మల్ నుంచి స్వగ్రామానికి వస్తుండగా విషాదం
ట్రాక్టర్ ఢీకొని అక్కడికక్కడే మృతి
కుటుంబంలో తీవ్ర విషాదం.. కన్నీరుమున్నీరైన బంధువులు
కేసు నమోదు చేసి దర్యాప్తు చేపట్టిన పోలీసులు

Accident I మామడ, ఆంధ్ర ప్రభ : నిర్మల్ జిల్లా మామడ మండలంలోని కొరిటికల్ గ్రామ సమీపంలో సోమవారం రాత్రి చోటుచేసుకున్న ఘోర రోడ్డు ప్రమాదం గ్రామంలో తీవ్ర విషాదాన్ని నింపింది. కొరిటికల్ గ్రామానికి చెందిన ప్రైవేట్ ఆర్టీసీ డ్రైవర్ కొండ్ర భూమేష్ (42) దురదృష్టవశాత్తూ ప్రమాదంలో అక్కడికక్కడే మృతిచెందాడు. నిత్యం కుటుంబ పోషణ కోసం శ్రమిస్తూ జీవనం సాగిస్తున్న భూమేష్ అకస్మాత్తుగా ప్రాణాలు కోల్పోవడంతో కుటుంబ సభ్యులు, బంధువులు, గ్రామస్తులు కన్నీరుమున్నీరవుతున్నారు.

స్థానికులు తెలిపిన వివరాల ప్రకారం.. భూమేష్ నిర్మల్ నుంచి తన స్వగ్రామమైన కొరిటికల్‌కు ద్విచక్ర వాహనంపై తిరిగి వస్తున్నాడు. అదే సమయంలో కొరిటికల్ నుంచి నిర్మల్ వైపు వెళ్తున్న ట్రాక్టర్ అతని వాహనాన్ని బలంగా ఢీకొట్టినట్లు సమాచారం. ఢీకొన్న వేగం తీవ్రంగా ఉండటంతో భూమేష్‌కు తీవ్ర గాయాలు కాగా, ఘటనాస్థలంలోనే ప్రాణాలు విడిచాడు. రోడ్డు పక్కనే రక్తపు మడుగులో పడిఉన్న దృశ్యం చూసిన స్థానికులు షాక్‌కు గురయ్యారు.

ఈ విషాద వార్త తెలియగానే కుటుంబ సభ్యులు ఘటనాస్థలానికి చేరుకుని కన్నీరుమున్నీరయ్యారు. ఎప్పుడూ కుటుంబ బాధ్యతల కోసం కష్టపడే భూమేష్ ఇక లేడన్న నిజాన్ని వారు జీర్ణించుకోలేక విలపించారు. మృతుడు భూమేష్‌కు ఇద్దరు కుమారులు ఉన్నారు. తండ్రి మృతితో ఆ చిన్నారులు తీవ్ర విషాదంలో మునిగిపోయారు. కుటుంబానికి అండగా నిలిచిన వ్యక్తి ఒక్కసారిగా దూరం కావడంతో గ్రామంలో విషాద ఛాయలు అలుముకున్నాయి.

సమాచారం అందుకున్న పోలీసులు వెంటనే ఘటనాస్థలానికి చేరుకుని పరిస్థితిని పరిశీలించారు. మృతదేహాన్ని పోస్టుమార్టం నిమిత్తం ఆసుపత్రికి తరలించిన పోలీసులు కేసు నమోదు చేసి దర్యాప్తు చేపట్టారు. ప్రమాదానికి గల పూర్తి కారణాలు తెలియాల్సి ఉంది.