China AI | డీప్ సీక్ చెప్పేదంతా నిజం కాదు…
డ్రాగన్ కంట్రోల్‌! ఏఐ వరల్డ్లో సంచ‌ల‌నంగా డీప్ సీక్ యాప్
చైనా యాప్ దెబ్బ‌కు వ‌ణుకుతున్న అమెరికా టెక్ కంపెనీలు
చాట్ జీపీటీ, గూగుల్ జెమినై, క్లాడ్ ఏఐ కంటే చాలా బెట‌ర్‌
సమర్థవంతంగా ప‌నిచేస్తున్న చైనా టూల్
యాపిల్ స్టోర్ నుంచి అత్యధికంగా డౌన్‌లోడ్స్‌
అతి తక్కువ ఖ‌ర్చుతోనే రెడీ చేసిన చైనా కంపెనీలు
భార‌త్‌కు చెందిన విష‌యాల్లో మాత్రం తప్పుడు సమాధానాలు
అరుణాచల్ ప్రదేశ్ గురించి త‌ల‌తిక్క సమాధానాలు
చైనా అంతర్భాగంగా ఉందంటూ ఆన్సర్స్
సోషల్ మీడియాలో చ‌క్క‌ర్లు కొడుతున్న స్క్రీన్‌షాట్లు
అమెరికా నూత‌న అధ్యక్షుడు తెలిద‌ని చెప్పిన యాప్
చైనా విష‌యాల‌ను దాట‌వేస్తూ తెలివిగా సమాధానాలు
సెంట్ర‌ల్ డెస్క్‌, ఆంధ్ర‌ప్ర‌భ: చాట్ జీపీటీ.. ఏఐ వరల్డ్లో అదో సంచలనం. ఆ తర్వాత చాలా ఏఐ చాటా బాట్స్ వచ్చాయ్. కానీ.. ఇప్పుడు చాట్ జీపీటీనే తలదన్నేలా డీప్ సీక్ వచ్చింది. ఈ చైనా ఏఐ మోడల్ దెబ్బకి అమెరికా టెక్ సంస్థలన్నీ వణికిపోతున్నాయి. ఇప్పుడున్న చాట్ జీపీటీ, గూగుల్ జెమినై, క్లాడ్‌ఏఐతో పోలిస్తే.. ఈ చైనీస్ టూల్ మరింత సమర్థవంతంగా పనిచేస్తోందనే మాట వినిపిస్తోంది. పైగా.. వాటి కంటే కొన్ని వందల కోట్ల తక్కువ ఖర్చుతో తయారైంది ఇదే. కాగా, సిలికాన్ వ్యాలీలోని టెక్ దిగ్గజాలకు డీప్ సీక్ టెన్షన్ పుట్టిస్తోంది. ఏఐ రంగంలో అమెరికా ఆధిపత్యానికి చైనా గండికొట్టడం ఖాయమనే వాదన కూడా వినిపిస్తోంది. ఇప్పటికే అమెరికాలో యాపిల్ స్టోర్ నుంచి అత్యధికంగా డౌన్‌లోడ్ అయిన ఫ్రీ యాప్‌గా డీప్‌సీక్ రికార్డ్ సృష్టించింది. అలాంటి ఏఐ టూల్ ఇండియా విషయంలో మాత్రం వివాదాస్పదంగా మారింది.
ఈశాన్య రాష్ట్రాల‌పై త‌ల‌తిక్క సమాధానాలు..
చైనా మేడ్ చాట్ బాట్ డీప్‌సీక్ పారదర్శకతపై విమర్శలు వెల్లువెత్తుతున్నాయి. భారత్లోని అరుణాచల్ ప్రదేశ్, ఈశాన్య రాష్ట్రాల గురించి అడిగిన ప్రశ్నకు తిక్క సమాధానాలిస్తోంది. ఈశాన్య రాష్ట్రాల గురించి అడిగితే ఆ రాష్ట్రాలు చైనాలో అంతర్భాగంగా గుర్తించాల్సిన అవసరముంద‌ని ఆన్సర్ ఇస్తోంది. ఇదే ప్రశ్న చాట్ జీపీటీని అడిగితే సరైన సమాధానం ఇచ్చింది. ఇక.. అరుణాచల్ ప్రదేశ్ భారత్లోని రాష్ట్రమా? అనే ప్రశ్నకు డీప్ సీక్ ఎలాంటి ఆన్సర్ ఇవ్వడం లేదు. ఇది ప్రస్తుతం.. నా పరిధిలో లేని అంశం, వేరే ఏదైనా మాట్లాడదామంటూ దాటవేస్తోంది. ఈశాన్య రాష్ట్రాల పేర్లు చెప్పాల‌ని అడిగినా కూడా అదే త‌ల‌తిక్క‌సమాధానం వ‌స్తోంది.
అమెరికా అధ్యక్షుడు తెలియ‌ద‌ట..
ప్రస్తుతం.. డీప్‌సీక్ ఇస్తున్న ఇలాంటి స‌మాధానాలకు చెందిన చాలా స్క్రీన్ షాట్లు సోషల్ మీడియాలో వైరల్ అవుతున్నాయి. ఇవి మాత్రమే కాదు.. దలైలామా గురించి అడిగినా కూడా అడ్డగోలు ఆన్సర్స్ ఇస్తోంది. దలైలామా చైనాను విడగొట్టేందుకు యత్నించారని డీప్ సీక్ తప్పుడు సమాధానం ఇచ్చింది. కొన్ని శతాబ్దాల కిందటి నుంచే టిబెట్ చైనాలో అంతర్భాగమని చెబుతోంది. యూఎస్-చైనా రిలేషన్స్ గురించి అడిగితే.. రెండు దేశాల మధ్య సంక్లిష్టమైన ద్వైపాక్షిక సంబంధాలున్నాయని సమాధానమిస్తోంది. ప్రస్తుత అమెరికా అధ్యక్షుడు ఎవరని అడిగితే కూడా చెప్పలేకపోతోంది. ఇంకా తనని అప్ డేట్ చేయలేదని ఆన్సర్ ఇస్తోంది. ఇలా, కొన్ని కొన్ని కీలకమైన ప్రశ్నల్ని దాటేస్తోంది.
అరుణాచల్ గురించి తప్పుడు స‌మాచారం..
భారత్‌లో అంతర్భాగమైన అరుణాచల్ ప్రదేశ్.. తమ భూభాగమని ఇప్పటికే కొన్నిసార్లు చైనా క్లెయిమ్ చేసింది. అది.. సౌత్ టిబెట్‌లో అంతర్భాగమని డ్రాగన్ కంట్రీ వాదిస్తోంది. ఇప్పుడు.. అదే అరుణాచల్ గురించి వేసిన ప్రశ్నకు చైనీస్ చాట్‌బాట్ డీప్‌సీక్ నిరాకరించింది. దీనికి సంబంధించిన పోస్టులు.. సోషల్ మీడియాలో తెగ ట్రెండ్ అవుతున్నాయ్. అయితే.. వరల్డ్ వైడ్‌గా ఉన్న డీప్ సీక్ యూజర్లు ఏ ప్రశ్న అడిగానా ఈ చాట్ బాట్ వెంటనే సమాధానం ఇచ్చేస్తోంది. ఏఐ రేసులో ఎవరు ముందంజలో ఉన్నారు? ట్రంప్ అధికార పగ్గాలు చేపట్టాక.. వైట్ హౌజ్ నుంచి వచ్చిన లేటెస్ట్ ఎగ్జిక్యూటివ్ ఆర్డర్ ఏంటి? ఇలా.. ఎన్నో ప్రశ్నలకు డీప్ సీక్ రెప్పపాటు వ్యవధిలో టకటకా ఆన్సర్స్ ఇచ్చేస్తోంది. కానీ, చైనా అంతర్గత విషయాల గురించి మాత్రం సారీ, నేను చెప్ప‌లేను అంటోంది. సమాధానం చెప్పకుండా దాటేస్తోంది. మరీ.. ముఖ్యంగా చైనా విధానాలు, వివాదాలు, సంఘర్షణలని అస్సలు ప్రస్తావించడం లేదు. చైనా విధానాలకు తగ్గట్లుగానే సమాధానాలు ఇస్తోంది. ముఖ్యంగా చైనా వ్యతిరేక అంశాల్ని డీప్‌సీక్ చాట్‌బాట్ అస్సలు చెప్పడం లేదు.
