మూడు మార్పుల‌తో టీమ్ ఇండియా
అన్షుల్ కాంబోజ్ టెస్ట్ లో అరంగేట్రం
క‌రుణ్ కు ఉద్వాస‌న .. సాయి సుదర్శన్ కు ఛాన్స్
మాంచెస్టర్ – ఆండర్సన్-టెండూల్కర్ ట్రోఫీ 2025లో భాగంగా భారత్-ఇంగ్లాండ్ మధ్య జరుగుతున్న ఐదు టెస్టుల సిరీస్‌లో నాలుగో మ్యాచ్ కీలకంగా మారింది. ఇప్పటికే ఇంగ్లాండ్ 2-1 ఆధిక్యంలో ఉండటంతో… భారత్‌కు నాలుగో టెస్ట్ తప్పనిసరి గెలుపు మ్యాచ్‌గా మారింది. లార్డ్స్‌లో జరిగిన మూడో టెస్టులో భారత్ కేవలం 22 పరుగుల తేడాతో ఓటమి పాలవడంతో శుభ్‌మన్ గిల్ నేతృత్వంలోని జట్టు తప్పనిసరిగా ఈ మ్యాచ్‌లో విజయం సాధించాలనే సంకల్పంతో ఉంది. దాంతో సిరీస్‌ను 2-2తో సమం చేసి, చివరి మ్యాచ్‌ను నిర్ణయాత్మకంగా మార్చాలన్నది టీమిండియా లక్ష్యం.
కాగా ఈ మ్యాచ్ లో ఇంగ్లండ్ టాస్ గెలిచి ఫీల్డింగ్ ఎంచుకుంది.. ఇక ఇండియా మూడు మార్పుల‌తో బ‌రిలోకి దిగ‌నుంది.. క‌రుణ్ నాయ‌ర్ ప్లేస్ లో సాయి సుదర్శన్, నితీష్ రెడ్డి స్థానంలో శార్దూల్ ఠాకూర్, అకాశ్ దీప్ ప్లేస్ లో అన్షుల్ కాంబోజ్ జ‌ట్టులోకి వ‌చ్చారు.
కాగా, నేటి నుంచి 27 వరకు మాంచెస్టర్‌లోని ఓల్డ్ ట్రాఫోర్డ్ స్టేడియంలో ఈ నాలుగో టెస్ట్ జరగనుంది. ఇక ఇంగ్లాండ్ ఈ మ్యాచ్‌లో గెలిచి సిరీస్ ను ముందే ఖాయంచేసుకోవాలని చూస్తున్నది. మరోవైపు, సిరీస్ పై భారీ ఆశలతో టీమిండియా నాల్గవ టెస్ట్ మ్యాచ్ లోకి అడుగుపెడుతుంది. ఈ నాల్గవ టెస్ట్ మ్యాచ్ లో టీమిండియా గెలిస్తే, ఓవల్ లో జరిగే నిర్ణయాత్మక మ్యాచ్ మరింత ఉత్కంఠభరితంగా మారుతుంది.
వేదిక చరిత్ర, పిచ్ పరిస్థితులు..
మాంచెస్టర్‌లోని ఓల్డ్ ట్రాఫోర్డ్ స్టేడియంలో భారత్ కు మంచి రికార్డులు లేవు. ఇప్పటివరకు ఓల్డ్ ట్రాఫోర్డ్ స్టేడియంలో భారత్ 9 టెస్టులు ఆడ‌గా.. ఒక్కటి కూడా గెలవలేదు. 4 సార్లు ఓడి, 5 మ్యాచ్‌లు డ్రా అయ్యాయి. భారత్ ఇక్కడ చివరిసారిగా 2014లో టెస్టు ఆడి, పెద్ద పరాజయం ఎదుర్కుంది. ఓల్డ్ ట్రాఫోర్డ్ పిచ్ సాంప్రదాయకంగా పేసర్లకు అనుకూలంగా ఉంటుంది. ముఖ్యంగా మేఘావృత వాతావరణంలో బౌన్స్, కదలికను అందిస్తుంది. ఇక్కడ పిచ్ సాధారణంగా పేసర్లకు సౌకర్యంగా ఉంటుంది. వాతావరణం మేఘావృతంగా ఉంటే బౌన్స్, స్వింగ్ ఎక్కువగా లభిస్తుంది. అయితే, రోజులు గడుస్తూ పిచ్ నెమ్మదీ అవుతుంది కాబట్టి స్పిన్నర్లు కూడా చివర్లో ప్రభావం చూపిస్తారు.
భారత్ జట్టు : శుభ్‌మన్ గిల్ (కెప్టెన్), రిషబ్ పంత్ (వైస్-కెప్టెన్ & వికెట్ కీపర్), యశస్వి జైస్వాల్, కెఎల్ రాహుల్, సాయి సుదర్శన్, , రవీంద్ర జడేజా, ధృవ్ జురెల్ (వికెట్ కీపర్), వాషింగ్టన్ సుందర్, శార్దూల్ ఠాకూర్, బుమ్రా, సిరాజ్ , అన్షుల్ కంబోజ్.
ఇంగ్లాండ్ : జాక్ క్రాలీ, బెన్ డకెట్, ఒల్లీ పోప్, జో రూట్, హ్యారీ బ్రూక్, బెన్ స్టోక్స్ (కెప్టెన్), జేమీ స్మిత్ (వికెట్ కీపర్), లియామ్ డాసన్, క్రిస్ వోక్స్, బ్రైడన్ కార్స్, జోఫ్రా ఆర్చర్.
