హిందీ నేర్చుకుంటూనే మాతృభాష‌తో ప‌య‌నిద్దాం
భాష నేర్చుకోవడానికి ఆటంకాలు దేనికి
మరో భాషను అంగీకరించడం ఓటమి కాదు
రాజ్య‌భాష స్వ‌ర్ణోత్స‌వాల్లో ఉపముఖ్యమంత్రి పవన్
హైదరాబాద్, ఆంధ్ర‌ప్ర‌భ :
ఐటీ రంగంలో (IT ) విజయం సాధించడానికి ఆంగ్లం ఎంత ముఖ్యమో, దేశంలో ఎక్కువ మంది మాట్లాడే హిందీ (Hindi ) నేర్చుకోవడం వల్ల కూడా అంతే ప్రయోజనం ఉంటుందని ఉపముఖ్యమంత్రి పవన్ కల్యాణ్ (Deputy CM pawan kalyan ) అన్నారు. హైదరాబాద్ గచ్చిబౌలి బాలయోగి స్టేడియంలో (balayogi stadium) ఏర్పాటు చేసిన రాజ్య భాషా విభాగ స్వర్ణోత్సవ వేడుకల్లో ప్ర‌సంగిస్తూ.. దక్షిణ భారతీయ సినిమాల్లో 31 శాతం హిందీ డబ్బింగ్ ద్వారానే ఆదాయం వస్తుందని గుర్తు చేశారు. వ్యాపారానికి హిందీ అవసరమైనప్పుడు, నేర్చుకోవడానికి వచ్చిన ఇబ్బంది ఏంటని ప్రశ్నించారు.
భాష నేర్చుకోవడం ఓటమి కాదు..
తన సినిమాలో “ఏ మేరా జహా” అనే హిందీ పాట పెట్టడానికి గల కారణాన్ని వివరిస్తూ.. మాతృభాష తెలుగు అయినప్పటికీ, హిందీ దేశ భాష అని చెప్పడానికే అలా చేశానని తెలిపారు. హిందీ నేర్చుకోవడం అంటే మన ఉనికిని కోల్పోవడం కాదని, మరింత బలపడటమని పవన్ స్పష్టం చేశారు. మరో భాషను అంగీకరించడం ఓటమి కాదని, కలిసి ప్రయాణించడమని ఉద్ఘాటించారు.
అడ్డుగోడ‌గా భావించొద్దు..
విద్య, వైద్యం, వ్యాపారం, ఉపాధి వంటి రంగాల్లో భాషా అవధులు చెరిగిపోతున్న ఈ సమయంలో హిందీని వ్యతిరేకించడం రాబోయే తరాల అభివృద్ధిని అడ్డుకోవడమేనని పవన్ అభిప్రాయపడ్డారు. తెలుగు, తమిళం, కన్నడ, మలయాళం వంటి మాతృభాషలపై గౌరవం ఉండాలని చెబుతూనే, హిందీని పెద్దమ్మ భాషగా అభివర్ణించారు. ఇంట్లో మాట్లాడుకోవడానికి మాతృభాష ఉండగా, దేశ సరిహద్దులు దాటితే హిందీ రాజ్య భాషగా ఉపయోగపడుతుందని పేర్కొన్నారు. ప్రపంచం విడిపోవడానికి కారణాలు వెతుకుతుంటే, భారతదేశం మాత్రం ఒకే భాషతో ఏకం కావాలని చూస్తోందని, అది హిందీతో సాధ్యమవుతుందని అన్నారు.
అన్ని భాష‌ల‌కు స‌మున్న‌త గౌరవం
ఒక బెంగాలీ గీతం జాతీయ గీతమైందని, ఒక పంజాబీ దేశం కోసం పోరాడారని, రాజస్థాన్‌కు చెందిన రాణప్రతాప్ శౌర్యానికి చిహ్నంగా నిలిచారని, తమిళనాడుకు చెందిన అబ్దుల్ కలాం మిస్సైల్ మ్యాన్ అయ్యారని, మద్రాస్ ప్రెసిడెన్సీకి చెందిన వ్యక్తి రూపొందించిన మువ్వన్నెల జెండా దేశానికి తిరంగా అయిందని ఉప ముఖ్య‌మంత్రి పవన్ గుర్తు చేశారు. ప్రతి భాషా జీవ భాష, మాతృ భాష అయినప్పటికీ, రాజ్య భాష మాత్రం హిందీయేనని స్పష్టం చేశారు. కార్య‌క్ర‌మంలో కేంద్ర మంత్రి కిష‌న్ రెడ్డి పాల్గొన్నారు..
