కక్షతోనే కత్తులతో దాడి..

• శ్రీకాళహస్తి హత్య కేసు ఛేదించిన పోలీసులు
• అంతర్రాష్ట్ర నేరచరిత్ర ఉన్న నలుగురు అరెస్ట్
• థొప్పై గణేశన్ గ్యాంగ్‌తో సంబంధాలు ఉన్నట్లు పోలీసుల గుర్తింపు
• సాంకేతిక ఆధారాలతో నిందితుల కదలికలపై నిఘా
• ద్విచక్ర వాహనం, రెండు కత్తులు, రెండు సెల్‌ఫోన్లు స్వాధీనం
• పరారీలో ఉన్న మరో నిందితుడి కోసం గాలింపు
• నిందితులపై పీడీ యాక్ట్‌కు చర్యలు

తిరుపతి, ఆంధ్రప్రభ : శ్రీకాళహస్తి పట్టణంలో సంచలనం సృష్టించిన హత్య కేసును తిరుపతి జిల్లా పోలీసులు ఛేదించారు. ఈ కేసులో అంతర్రాష్ట్ర నేరచరిత్ర ఉన్న నలుగురు నిందితులను అరెస్ట్ చేసినట్లు జిల్లా ఎస్పీ ఎల్. సుబ్బరాయుడు తెలిపారు. తమిళనాడు రాష్ట్రానికి చెందిన ముగ్గురితో పాటు పుత్తూరుకు చెందిన ఒకరిని అరెస్ట్ చేశామని చెప్పారు. నిందితులందరికీ తమిళనాడు రాష్ట్రంలో గతంలో పలు క్రిమినల్ కేసులు ఉన్నట్లు దర్యాప్తులో గుర్తించినట్లు వెల్లడించారు. చెన్నై నగరానికి చెందిన థొప్పై గణేశన్ గ్యాంగ్‌తో వీరికి సంబంధాలు ఉన్నట్లు గుర్తించామని తెలిపారు.

స్వర్ణముఖి నది కట్టపై దారుణ హత్య

ఈ నెల 2న రాత్రి సుమారు 7.30 గంటల సమయంలో శ్రీకాళహస్తి పట్టణంలోని పీఆర్ గెస్ట్‌హౌస్ సమీపంలోని స్వర్ణముఖి నది కట్టపై మగలంపాటి శివకుమార్ అలియాస్ శివ హత్యకు గురయ్యాడు. గుర్తుతెలియని వ్యక్తులు కత్తులతో అతడిపై దాడి చేశారు. తలతో పాటు శరీరంపై తీవ్రంగా కత్తులతో దాడి చేయడంతో శివకుమార్ మృతి చెందాడు.

ఘటనపై శ్రీకాళహస్తి వన్‌టౌన్ పోలీస్‌స్టేషన్‌లో కేసు నమోదు చేసి పోలీసులు దర్యాప్తు ప్రారంభించారు. శ్రీకాళహస్తి ప్రముఖ పుణ్యక్షేత్రం కావడంతో ఈ హత్య కేసును పోలీసులు అత్యంత ప్రాధాన్యతతో తీసుకున్నారు. కేసును త్వరగా ఛేదించేందుకు జిల్లా ఎస్పీ ఎల్. సుబ్బరాయుడు ప్రత్యేక దర్యాప్తు బృందాలను ఏర్పాటు చేశారు. అదనపు ఎస్పీ (ఎల్‌అండ్‌ఓ) రవి మనోహరాచారి పర్యవేక్షణలో, శ్రీకాళహస్తి డీఎస్పీ కె. నరసింహమూర్తి ఆధ్వర్యంలో ప్రత్యేక బృందాలు రంగంలోకి దిగాయి.

సాంకేతిక ఆధారాలతో నిందితుల గుర్తింపు

శ్రీకాళహస్తి వన్‌టౌన్, టూటౌన్, రూరల్, బీఎన్ కండ్రిగ పోలీస్ అధికారులతో ప్రత్యేక బృందాలను ఏర్పాటు చేసి దర్యాప్తు చేపట్టారు. ఘటనకు సంబంధించిన వివిధ సాంకేతిక ఆధారాలను సేకరించి విశ్లేషించారు. నిందితుల కదలికలు, వారి మధ్య జరిగిన సంబంధాలను పరిశీలిస్తూ దర్యాప్తు కొనసాగించారు. ఈ క్రమంలో వెంకటేషన్ కార్తీక్, వేలు గోపీనాథ్ అలియాస్ గుండు గోపి, బి. శ్రీధర్ అలియాస్ రెడ్డి, మునస్వామి సూర్యలను గుర్తించినట్లు పోలీసులు తెలిపారు.

పోలీసుల దర్యాప్తు ప్రకారం.. కార్తీక్, గోపీనాథ్, శ్రీధర్ శ్రీకాళహస్తికి వచ్చి శివకుమార్‌పై కత్తులతో దాడి చేసి హత్య చేసినట్లు ఆధారాలు లభించాయి. హత్యకు అవసరమైన మోటార్‌సైకిల్, కత్తులను సమకూర్చడంలో పుత్తూరుకు చెందిన మునస్వామి సూర్యతో పాటు తమిళనాడుకు చెందిన మరో నిందితుడు సహకరించినట్లు దర్యాప్తులో వెల్లడైనట్లు పోలీసులు తెలిపారు.

థొప్పై గణేశన్ వ్యవహారంతో కక్ష
శివకుమార్ హత్యకు దారితీసిన కారణాలను కూడా పోలీసులు వెల్లడించారు. తమిళనాడు పోలీసులకు కావాల్సిన నేరస్థుడు థొప్పై గణేశన్‌కు శివకుమార్ గతంలో శ్రీకాళహస్తిలో ఆశ్రయం కల్పించినట్లు నిందితులు భావించినట్లు తెలిపారు. అనంతరం ఈ ఏడాది మార్చి 16న చెన్నైలో జరిగిన పోలీసుల కాల్పుల్లో గణేశన్ మృతి చెందాడు. శివకుమార్ చెన్నై పోలీసులకు గణేశన్‌కు సంబంధించిన సమాచారం అందించడం వల్లే అతడు పోలీసుల కాల్పుల్లో మృతి చెందాడని నిందితులు అనుమానించినట్లు పోలీసులు తెలిపారు. దీంతో శివకుమార్‌పై కక్ష పెంచుకుని ప్రతీకార చర్యగా హత్యకు పాల్పడినట్లు దర్యాప్తులో తేలిందని ఎస్పీ వెల్లడించారు.

నలుగురు అరెస్ట్.. ఆయుధాలు స్వాధీనం

దర్యాప్తులో లభించిన ఆధారాల మేరకు నలుగురు నిందితులను ఆగస్టు 11న అరెస్ట్ చేశారు. వారి వద్ద నుంచి హత్యకు ఉపయోగించినట్లు భావిస్తున్న Yamaha R15 మోటార్‌సైకిల్, రెండు కత్తులు, రెండు సెల్‌ఫోన్లను స్వాధీనం చేసుకున్నారు. ఈ కేసులో మరో నిందితుడు పరారీలో ఉన్నట్లు పోలీసులు తెలిపారు. అతడిని కూడా అరెస్ట్ చేసేందుకు ప్రత్యేక పోలీసు బృందాలు గాలింపు చర్యలు కొనసాగిస్తున్నాయి.
అరెస్టయిన వారిలో తమిళనాడు తిరువళ్లూరు జిల్లా తిరుత్తణి తాలూకా తాలవేడు గ్రామానికి చెందిన వెంకటేషన్ కార్తీక్ (32)పై నాలుగు పాత కేసులు ఉన్నట్లు పోలీసులు గుర్తించారు.

అదే జిల్లాలోని అంబలత్తూరు తాలూకా పడి గ్రామానికి చెందిన వేలు గోపీనాథ్ అలియాస్ గుండు గోపి (27)పై 25 పాత క్రిమినల్ కేసులు ఉన్నట్లు దర్యాప్తులో తేలింది. తిరువళ్లూరు జిల్లా పొన్నేరి తాలూకా ఎడపాల్యం గ్రామానికి చెందిన బి. శ్రీధర్ అలియాస్ రెడ్డి (26)పై నాలుగు పాత కేసులు ఉన్నట్లు పోలీసులు తెలిపారు. పుత్తూరు పట్టణంలోని గాంధీనగర్‌కు చెందిన మునస్వామి సూర్య (19)పై తమిళనాడులో రెండు పాత కేసులు ఉన్నట్లు గుర్తించారు.

పీడీ యాక్ట్‌కు చర్యలు
ఈ కేసులో అరెస్టయిన నిందితులపై పీడీ యాక్ట్ నమోదు చేసేందుకు చర్యలు చేపడుతున్నట్లు జిల్లా పోలీసులు తెలిపారు. నేరచరిత్ర కలిగిన వ్యక్తుల కదలికలపై నిరంతర నిఘా కొనసాగిస్తామని వెల్లడించారు. సాంకేతిక ఆధారాలను సమర్థవంతంగా ఉపయోగించుకుని నేరాలను అరికట్టేందుకు చర్యలు తీసుకుంటామని, ప్రజల భద్రతకు అత్యంత ప్రాధాన్యత ఇస్తామని స్పష్టం చేశారు.

దర్యాప్తు బృందాలకు ఎస్పీ అభినందనలు
సంచలనాత్మక హత్య కేసును సాంకేతిక ఆధారాలతో వేగంగా ఛేదించి నిందితులను అరెస్ట్ చేయడంలో ప్రతిభ చూపిన అదనపు ఎస్పీ రవి మనోహరాచారి, శ్రీకాళహస్తి డీఎస్పీ కె. నరసింహమూర్తి, సీఐలు, ఎస్‌ఐలు, ప్రత్యేక దర్యాప్తు బృందాల సిబ్బందిని జిల్లా ఎస్పీ ఎల్. సుబ్బరాయుడు అభినందించారు. పరారీలో ఉన్న మరో నిందితుడిని కూడా త్వరలో అరెస్ట్ చేసేందుకు చర్యలు కొనసాగుతున్నాయని పోలీసులు తెలిపారు.