క్రికెట్ దిగ్గజం సర్ గార్ఫీల్డ్ సోబర్స్ కన్నుమూత..
- 89 ఏళ్ల వయసులో బార్బడోస్లో తుదిశ్వాస.. ప్రపంచ క్రికెట్ శోకసంద్రం
- ‘సర్వకాలాల అత్యుత్తమ ఆల్రౌండర్’కు క్రికెట్ ప్రపంచం నివాళి
బ్రిడ్జ్టౌన్ (బార్బడోస్), ఆంధ్రప్రభ : ప్రపంచ క్రికెట్ చరిత్రలో అత్యుత్తమ ఆల్రౌండర్గా గుర్తింపు పొందిన వెస్టిండీస్ దిగ్గజం సర్ గార్ఫీల్డ్ గ్యారీ సోబర్స్ (89) శుక్రవారం కన్నుమూశారు. కొంతకాలంగా అనారోగ్యంతో బాధపడుతున్న ఆయన బార్బడోస్లోని తన నివాసంలో తుదిశ్వాస విడిచారు. ఆయన మరణంతో ప్రపంచ క్రికెట్ ఒక మహానుభావుడిని కోల్పోయిందని మాజీ, ప్రస్తుత క్రికెటర్లు, క్రికెట్ సంస్థలు సంతాపం వ్యక్తం చేస్తున్నాయి.
క్రికెట్ వెస్టిండీస్ సామాజిక మాధ్యమాల్లో స్పందిస్తూ.. “ఒక గొప్ప ఇన్నింగ్స్ ముగిసింది. మా హృదయాల్లో సర్ గార్ఫీల్డ్ సోబర్స్ ఎప్పటికీ చిరస్థాయిగా నిలిచిపోతారు” అని నివాళి అర్పించింది. ఇంగ్లండ్ కౌంటీ క్లబ్ నాటింగ్హామ్షైర్ కూడా ఆయన మరణం పట్ల తీవ్ర దిగ్భ్రాంతి వ్యక్తం చేస్తూ, క్రికెట్ చరిత్రలోనే అత్యుత్తమ ఆల్రౌండర్ను కోల్పోయామని పేర్కొంది.
రెండు దశాబ్దాల అద్భుత కెరీర్
1954లో టెస్టు అరంగేట్రం చేసిన సోబర్స్.. 1974 వరకు రెండు దశాబ్దాలపాటు అంతర్జాతీయ క్రికెట్లో తనదైన ముద్ర వేశారు. ఎడమచేతి బ్యాటర్గా అద్భుత ప్రతిభ కనబరిచిన ఆయన, వేగం, ఎడమచేతి స్పిన్, చైనామన్ బౌలింగ్లను సమర్థంగా చేయగల అరుదైన బహుముఖ ప్రజ్ఞాశాలి. స్లిప్లో అసాధారణ క్యాచింగ్తోనూ అభిమానులను అలరించారు. 1965 నుంచి 1972 వరకు వెస్టిండీస్ జట్టుకు కెప్టెన్గా సేవలందించారు.
93 టెస్టుల్లో సోబర్స్ 57.78 సగటుతో 8,032 పరుగులు చేశారు. ఇందులో 26 సెంచరీలు, 30 అర్ధసెంచరీలు ఉన్నాయి. బౌలింగ్లో 235 వికెట్లు పడగొట్టగా, ఫీల్డింగ్లో 109 క్యాచ్లు అందుకున్నారు. అంతర్జాతీయ క్రికెట్లో బ్యాటింగ్, బౌలింగ్, ఫీల్డింగ్ మూడు విభాగాల్లోనూ సమానంగా రాణించిన అరుదైన క్రికెటర్గా ఆయన గుర్తింపు పొందారు.
చరిత్ర సృష్టించిన రెండు ఘనతలు
1958లో పాకిస్థాన్పై అజేయంగా 365 పరుగులు చేసి అప్పటి వరకు టెస్టు క్రికెట్లో అత్యధిక వ్యక్తిగత స్కోరు నమోదు చేశారు. ఈ రికార్డు 36 సంవత్సరాల పాటు చెక్కుచెదరలేదు. అనంతరం 1994లో బ్రియాన్ లారా 375 పరుగులతో దాన్ని అధిగమించారు. 1968లో నాటింగ్హామ్షైర్ తరఫున ఆడుతూ గ్లామోర్గాన్ బౌలర్ మాల్కమ్ నాష్ వేసిన ఒకే ఓవర్లో ఆరు బంతులకు ఆరు సిక్సర్లు బాదిన తొలి ఫస్ట్క్లాస్ క్రికెటర్గా సోబర్స్ చరిత్ర సృష్టించారు. ఫస్ట్క్లాస్ క్రికెట్లో 383 మ్యాచ్లు ఆడిన సోబర్స్ 28,314 పరుగులు, 1,043 వికెట్లు సాధించారు. నాటింగ్హామ్షైర్ తరఫున 7,041 పరుగులు చేసి, 281 వికెట్లు పడగొట్టి ఆ జట్టు విజయాల్లో కీలక పాత్ర పోషించారు.
బార్బడోస్ అత్యున్నత పౌర పురస్కారమైన ‘నేషనల్ హీరో’ బిరుదును అందుకున్న కొద్దిమందిలో సోబర్స్ ఒకరు. 1975లో క్రికెట్కు చేసిన విశిష్ట సేవలకు గాను బ్రిటన్ రాణి ఎలిజబెత్-2 ఆయనకు నైట్హుడ్ ప్రదానం చేశారు. 2000లో విస్డెన్ క్రికెటర్స్ ఆఫ్ ది సెంచరీ జాబితాలో స్థానం సంపాదించారు. 2004 నుంచి ఐసీసీ ప్రతి ఏడాది ప్రకటించే పురుషుల అత్యుత్తమ క్రికెటర్ పురస్కారానికి ‘సర్ గార్ఫీల్డ్ సోబర్స్ ట్రోఫీ’గా ఆయన పేరు పెట్టడం ఆయనకు లభించిన అత్యున్నత గౌరవాల్లో ఒకటి.
సోబర్స్ మరణంతో క్రికెట్ ప్రపంచం ఒక శకానికి వీడ్కోలు పలికింది. ఆయన సాధించిన ఘనతలు, నెలకొల్పిన ప్రమాణాలు భావితరాల క్రికెటర్లకు చిరస్థాయిగా స్ఫూర్తిగా నిలిచిపోతాయి.
