ప్రాణాంతకమైన గర్భాశయ చీలిక కేసు

ప్రాణాంతకమైన గర్భాశయ చీలిక కేసు

సకాలంలో మెరుగైన చికిత్స చేసి మహిళ ప్రాణాలు కాపాడిన వైద్యులు

​చౌటుప్పల్, ఆంధ్రప్రభ : అత్యంత అరుదైన, ప్రాణాంతకమైన “ప్లాసెంటా పర్‌క్రెటా” (Placenta Percreta) వ్యాధితో గర్భాశయం చీలిపోయి, తీవ్ర ప్రాణాపాయ స్థితిలో ఉన్న ఒక 27 ఏళ్ల గర్భిణికి వైద్య బృందం విజయవంతంగా అత్యవసర శస్త్రచికిత్స అందించి ప్రాణాలు కాపాడారు. యాదాద్రి భువనగిరి జిల్లా చౌటుప్పల్ పట్టణంలో శుక్రవారం ఏర్పాటు చేసిన మీడియా సమావేశంలో గైనకాలజిస్ట్ డాక్టర్ ఎం.వి. జ్యోత్స్న, క్రిటికల్ కేర్ నిపుణులు డాక్టర్ కలాధర్ ఎస్, సీనియర్ ఫిజీషియన్ డాక్టర్ గుత్తా శశిధర్ రెడ్డిలు ఈ ప్రాణరక్షక చికిత్సకు సంబంధించిన వివరాలను వెల్లడించారు.

వైద్యుల కథనం ప్రకారం.. 28 వారాల 6 రోజుల గర్భంతో ఉన్న సదరు మహిళ తీవ్రమైన కడుపునొప్పి, గుండెదడ, రక్తపోటు పడిపోవడం (హేమరేజిక్ షాక్) మరియు శ్వాసకోశ వైఫల్యంతో అత్యవసర స్థితిలో మలక్‌పేట్ యశోద ఆసుపత్రిలో చేరారు. వైద్యులు తక్షణమే సీటీ స్కాన్ (CT Scan), ఇతర అత్యవసర పరీక్షలు నిర్వహించగా, ప్లాసెంటా పర్‌క్రెటా కారణంగా గర్భాశయం ఎడమ భాగంలో 4×4 సెం.మీ మేర చీలిక ఏర్పడినట్లు గుర్తించారు. దీనివల్ల ఆమె పొత్తికడుపులో సుమారు 3 లీటర్ల మేర అంతర్గత రక్తస్రావం జరిగింది. అయితే, అప్పటికే గర్భంలోని శిశువు మరణించినట్లు వైద్యులు నిర్ధారించారు.

సమగ్ర మల్టీడిసిప్లినరీ చికిత్స:

పరిస్థితి తీవ్రతను గమనించిన కన్సల్టెంట్ గైనకాలజిస్ట్ డాక్టర్ ఎం.వి. జ్యోత్స్న నేతృత్వంలో క్రిటికల్ కేర్ నిపుణులు డాక్టర్ కలాధర్ ఎస్, సీనియర్ ఫిజీషియన్ డాక్టర్ గుత్తా శశిధర్ రెడ్డి, అనస్తీషియా మరియు బ్లడ్ బ్యాంక్ నిపుణుల బృందం తక్షణమే రంగంలోకి దిగింది. రోగిని ముందుగా ఐవీ ఫ్లూయిడ్స్, నోరాడ్రినలిన్ ఇన్ఫ్యూషన్, ఆక్సిజన్ సపోర్ట్ మరియు అత్యవసర రక్త మార్పిడి (Blood Transfusion) ద్వారా స్థిరపరిచారు. ఆ తర్వాత జనరల్ అనస్తీషియా క్రింద అత్యవసరంగా లాపరోటమీ (Laparotomy) శస్త్రచికిత్స నిర్వహించి, మృత శిశువును బయటకు తీశారు. అనంతరం ప్రాణాంతకంగా మారిన గర్భాశయ చీలికను విజయవంతంగా మరమ్మతు చేసి, రక్తస్రావాన్ని పూర్తిగా నియంత్రించారు.

పూర్తిగా కోలుకున్న రోగి:

శస్త్రచికిత్స అనంతరం ఐసీయూ (ICU)లో నిరంతర పర్యవేక్షణ, ఐవీ యాంటీబయోటిక్స్, అత్యాధునిక క్రిటికల్ కేర్ మేనేజ్‌మెంట్‌తో రోగి క్రమంగా కోలుకున్నారు. హేమరేజిక్ షాక్, శ్వాస సమస్యలు పూర్తిగా తగ్గడంతో రోగిని ఆరోగ్యకరమైన, స్థిరమైన స్థితిలో ఆసుపత్రి నుండి డిశ్చార్జ్ చేశారు.

ఇలాంటి హై-రిస్క్ ప్రసూతి అత్యవసర పరిస్థితుల్లో సకాలంలో సరైన నిర్ణయం తీసుకోవడం, బహుళ విభాగాల వైద్యుల సమన్వయం ఎంతో కీలకమని వైద్యులు పేర్కొన్నారు. ఆసుపత్రిలో ఉన్న అత్యాధునిక సాంకేతికత, నిపుణులైన వైద్యులు, సమగ్ర ఐసీయూ సదుపాయాల వల్లే ఈ అసాధ్యమైన ప్రాణరక్షక చికిత్స సాధ్యమైందని ఆసుపత్రి డైరెక్టర్ గోరుకంటి పవన్, యూనిట్ హెడ్ కె. శ్రీనివాస్ రెడ్డి, అసోసియేట్ వైస్ ప్రెసిడెంట్ శ్రీనివాస్ చిదుర, ఎ. వాసుకిరణ్ రెడ్డిలు తెలిపారు. ప్రజలకు నాణ్యమైన, సురక్షితమైన అత్యవసర వైద్య సేవలు అందించడానికి తాము ఎల్లప్పుడూ కట్టుబడి ఉంటామని వారు స్పష్టం చేశారు.