అత్యవసరమైతే తప్ప ప్రజలు బయటకి రావద్దు…
అత్యవసరమైతే తప్ప ప్రజలు బయటకి రావద్దు…
- ఎస్ఐ బి. శ్రీకాంత్ గౌడ్ హెచ్చరిక
గరిడేపల్లి, ఆంధ్రప్రభ : గరిడేపల్లి మండలంలో ఎండల తీవ్రత రోజురోజుకూ మిన్నంటుతోంది. భానుడి భగభగలకు తోడు తీవ్రమైన వడగాల్పులు వీస్తుండటంతో ప్రజలు తీవ్ర ఇబ్బందులు పడుతున్నారు. ఈ నేపథ్యంలో మండల ప్రజలంతా వాతావరణ పరిస్థితులను గమనించి తీవ్ర అప్రమత్తంగా ఉండాలని గరిడేపల్లి సబ్ ఇన్స్పెక్టర్ బి. శ్రీకాంత్ గౌడ్ శనివారం ఒక ప్రకటనలో సూచించారు. అత్యవసర పనులు ఉంటే తప్ప మధ్యాహ్నం సమయంలో ప్రజలు ఎవరూ ఇళ్ల నుంచి బయటకు రాకూడదని ఆయన స్పష్టం చేశారు.
ఎండ తీవ్రత దృష్ట్యా ప్రజలు తమ ఆరోగ్యంపై స్వయంగా శ్రద్ధ వహించాలని కోరారు. ముఖ్యంగా చిన్నపిల్లలు, వృద్ధులు, గర్భిణీలు ఎండలో ఎక్కువసేపు తిరగకుండా ఇంట్లోనే సురక్షితంగా ఉండాలని హెచ్చరించారు. ద్రవపదార్థాలు ఎక్కువగా తీసుకోవాలి: శరీరంలో నీటి శాతం తగ్గకుండా ఉండటానికి రోజుకు సరిపడా నీరు తాగాలి. వీటితో పాటు మజ్జిగ, కొబ్బరినీళ్లు, నిమ్మరసం లేదా ఓఆర్ఎస్ (ORS) ద్రావణాన్ని ఎక్కువగా తీసుకోవాలి. ఒకవేళ తప్పనిసరి పరిస్థితుల్లో మధ్యాహ్నం వేళ బయటకు వెళ్లాల్సి వస్తే.. తలకు టోపీ, రుమాలు లేదా గొడుగు వంటివి ఉపయోగించాలి.
ఉపాధి హామీ, వ్యవసాయ కూలీలకు సూచన ఎండ తీవ్రత పెరగకముందే (ఉదయం వేళల్లోనే) పనులను ముగించుకునేలా ప్రణాళిక చేసుకోవాలి. పనుల ప్రదేశంలో నీడ, తాగునీటి సదుపాయం ఉండేలా చూసుకోవాలి. విపరీతమైన అలసట, తలనొప్పి, వాంతులు, ఒళ్లు కాలడం లేదా తల తిరగడం వంటి వడదెబ్బ లక్షణాలు కనిపిస్తే నిర్లక్ష్యం చేయకుండా వెంటనే సమీపంలోని ప్రభుత్వ ఆసుపత్రి లేదా వైద్యులను సంప్రదించి చికిత్స తీసుకోవాలని సూచించారు. మండలంలో ఎండల తీవ్రత తగ్గే వరకు ప్రజలందరూ పోలీసు, ఆరోగ్య శాఖల సూచనలను తప్పనిసరిగా పాటించి, సురక్షితంగా ఉండాలని ఎస్ఐ బి. శ్రీకాంత్ గౌడ్ విజ్ఞప్తి చేశారు.
