38 ఏళ్ల సేవా ప్రస్థానం..

• రోగి చిరునవ్వే మా అసలైన అవార్డు
• ఆరోగ్య సేవల్లో ఆవిష్కరణలు..
• ఆధునిక సాంకేతికతతో వైద్యాన్ని మరింత చేరువ చేసిన ఆస్టర్ రమేష్ హాస్పిటల్స్
• 5 వేలకుపైగా ఉచిత వైద్య శిబిరాలు..
• లక్ష మందికిపైగా బీఎల్‌ఎస్‌ శిక్షణ..
• అవయవ మార్పిడిలోనూ కీలక మైలురాళ్లు
• యువతరంతో కలిసి ముందుకు..
• రాబోయే రెండు దశాబ్దాల్లో సంస్థను మరింత ఉన్నత స్థాయికి తీసుకెళ్తాం
• డాక్టర్ పోతినేని రమేష్ బాబు

విజయవాడ, ఆంధ్రప్రభ: ప్రజలు గత 38 ఏళ్లుగా తమపై ఉంచిన విశ్వాసమే తమకు లభించిన అతిపెద్ద అవార్డని ఆస్టర్ రమేష్ హాస్పిటల్స్ మేనేజింగ్ డైరెక్టర్ డాక్టర్ పోతినేని రమేష్ బాబు అన్నారు. ప్రతి రోగిని కుటుంబ సభ్యుడిగా భావిస్తూ సురక్షితమైన, నాణ్యమైన, రోగి కేంద్రిత వైద్య సేవలు అందించడమే తమ సంస్థ సేవా ప్రస్థానానికి మూలసూత్రమని తెలిపారు. ఆస్టర్ రమేష్ హాస్పిటల్స్ 38వ వార్షికోత్సవ వేడుకలు శుక్రవారం విజయవాడలోని ప్రముఖ హోటల్‌లో ఘనంగా నిర్వహించారు.

1988 ఆగస్టు 15న కేవలం ఆరు పడకలతో ప్రత్యేక గుండె వైద్య ఆసుపత్రిగా ప్రారంభమైన రమేష్ హాస్పిటల్స్, నేడు ఆంధ్రప్రదేశ్‌లో ప్రముఖ బహుళ వైద్య విభాగాల ఆరోగ్య సంస్థగా ఎదిగింది. ప్రపంచ స్థాయి వైద్య సేవలను ప్రజలకు వారి స్వస్థలానికే చేరువ చేయాలనే సంకల్పంతో ప్రారంభమైన ఈ సేవా ప్రస్థానం, లక్షలాది మంది రోగుల విశ్వాసాన్ని సొంతం చేసుకుంది. ప్రస్తుతం విజయవాడ, గుంటూరు, ఒంగోలు తదితర కేంద్రాల ద్వారా అత్యవసర వైద్యం, అత్యంత క్లిష్టమైన రోగుల సంరక్షణ, అవయవ మార్పిడి, డిజిటల్ ఆరోగ్య సేవలు, గ్రామీణ ఆరోగ్య సేవలు, వైద్య విద్య, పరిశోధన తదితర రంగాల్లో సేవలు అందిస్తోంది. వార్షికోత్సవ వేడుకలకు పద్మశ్రీ పురస్కార గ్రహీత, ప్రముఖ హృద్రోగ నిపుణులు డాక్టర్ బి. సోమరాజు ముఖ్య అతిథిగా హాజరై ప్రసంగించారు.

సీనియర్ వైద్య నిపుణులు డాక్టర్ కామినేని పట్టాభి రామయ్య, ప్రముఖ వైద్యులు డాక్టర్ సమరం విశిష్ట అతిథులుగా పాల్గొన్నారు. ఈ సందర్భంగా ప్రజలకు నాణ్యమైన ఆరోగ్య సేవలను రాయితీలతో మరింత చేరువ చేయాలనే లక్ష్యంతో రూపొందించిన రమేష్ ప్రీమియం హెల్త్ కార్డును ప్రముఖ విద్యావేత్త డాక్టర్ ఎం.సి. దాస్ చేతుల మీదుగా ప్రారంభించారు. గుండె వైద్య రంగంలో ఆస్టర్ రమేష్ హాస్పిటల్స్ అనేక నూతన వైద్య విధానాలకు శ్రీకారం చుట్టింది.

రాష్ట్రంలో తొలి డిజిటల్ క్యాథ్ ల్యాబ్, అత్యాధునిక ఇంటర్వెన్షనల్ కార్డియాలజీ సేవలు, రోబోటిక్, అతి తక్కువ కోతతో నిర్వహించే గుండె శస్త్రచికిత్సలు, ఎకమో వంటి ప్రాణరక్షక చికిత్సలను అందుబాటులోకి తీసుకువచ్చి వేలాది మంది రోగులకు సేవలు అందించినట్లు సంస్థ తెలిపింది. నాణ్యమైన వైద్యం నగరాలకే పరిమితం కాకూడదనే లక్ష్యంతో గ్రామీణ ప్రాంతాలకు సైతం నిపుణుల వైద్య సేవలను చేరువ చేసింది. 24 గంటల గుండె రిపోర్టింగ్ సేవ ద్వారా గ్రామాల్లో తీసిన ఈసీజీలను నిపుణులైన కార్డియాలజిస్టులు తక్కువ సమయంలో పరిశీలించి అవసరమైన వైద్య సూచనలు అందించే విధానాన్ని అభివృద్ధి చేసింది. గుండెపోటు వంటి అత్యవసర పరిస్థితుల్లో కీలకమైన ‘గోల్డెన్ అవర్’లోనే చికిత్స ప్రారంభించే అవకాశం కల్పిస్తూ అనేక మంది ప్రాణాలను కాపాడగలిగామని సంస్థ పేర్కొంది.

టెలీమెడిసిన్, టెలీ-ఐసీయూ, ఎలక్ట్రానిక్ వైద్య రికార్డులు, క్లౌడ్ ఆధారిత ఆరోగ్య వ్యవస్థలు, రిమోట్ మానిటరింగ్, 5జీ ఈ-అంబులెన్స్ సేవలను అందుబాటులోకి తీసుకువచ్చింది. రోగి ఆసుపత్రికి చేరుకునేలోపే వైద్య బృందానికి అవసరమైన సమాచారం అందేలా వ్యవస్థను అభివృద్ధి చేసి అత్యవసర వైద్య సేవల్లో కొత్త ప్రమాణాలను నెలకొల్పినట్లు తెలిపింది. అవయవ మార్పిడి వైద్య రంగంలోనూ సంస్థ కీలక విజయాలు సాధించింది. 2016లో గుంటూరులో సమగ్ర అవయవ మార్పిడి కార్యక్రమాన్ని ప్రారంభించి కిడ్నీ, కాలేయం, గుండె మార్పిడి శస్త్రచికిత్సలను నిర్వహిస్తోంది. 2017లో తొలి కిడ్నీ, కాలేయ మార్పిడి శస్త్రచికిత్సలు, 2026లో తొలి గుండె మార్పిడి శస్త్రచికిత్సను విజయవంతంగా నిర్వహించి మరో చారిత్రక మైలురాయిని చేరుకుంది.

ఇప్పటివరకు 40కుపైగా అవయవ మార్పిడి శస్త్రచికిత్సలు విజయవంతంగా నిర్వహించినట్లు సంస్థ వెల్లడించింది. వైద్య సేవలతో పాటు వైద్య విద్య, పరిశోధనలకు కూడా సంస్థ సమాన ప్రాధాన్యం ఇస్తోంది. జాతీయ పరీక్షా మండలి గుర్తింపు పొందిన డీఎన్‌బీ కార్డియాలజీ కార్యక్రమంతోపాటు వివిధ ప్రత్యేక వైద్య విభాగాల్లో శిక్షణ అందిస్తోంది. ఆర్‌.హెచ్‌. కాలేజ్ ఆఫ్ నర్సింగ్ ద్వారా భవిష్యత్ వైద్యులు, నర్సింగ్ నిపుణులను తీర్చిదిద్దుతోంది. దేశ, విదేశాలకు చెందిన ప్రముఖ నిపుణులతో కలిసి 100కుపైగా నిరంతర వైద్య విద్యా కార్యక్రమాలు నిర్వహించి వైద్యులకు ఆధునిక పరిజ్ఞానాన్ని అందిస్తోంది. రోగి ఆసుపత్రి నుంచి డిశ్చార్జి అయిన తర్వాత కూడా టెలీమెడిసిన్, టెలీ-ఐసీయూ, గృహ వైద్యం, డిజిటల్ ఫాలోఅప్ సేవల ద్వారా నిరంతర వైద్య సహాయాన్ని అందిస్తోంది. చికిత్స పూర్తయ్యే వరకు మాత్రమే కాకుండా రోగి పూర్తిగా కోలుకునే వరకు అండగా నిలవాలనే సేవా తత్వాన్ని అమలు చేస్తోంది.

ఈ సందర్భంగా డాక్టర్ పోతినేని రమేష్ బాబు మాట్లాడుతూ గత 38 సంవత్సరాలుగా ప్రజలు తమపై ఉంచిన విశ్వాసమే తమకు లభించిన అతిపెద్ద అవార్డని అన్నారు. జేసీఐ, నాబ్‌హెచ్‌, నాబ్‌ఎల్‌, నర్సింగ్ ఎక్సలెన్స్, ఫార్మా డీ క్వాలిటీ వంటి జాతీయ, అంతర్జాతీయ గుర్తింపులతో పాటు స్థానిక సంస్థల నుంచి స్వచ్ఛ సర్వేక్షణ్ వంటి పురస్కారాలు లభించాయని తెలిపారు. అయితే రోగి ఆరోగ్యంగా కోలుకుని చిరునవ్వుతో కుటుంబ సభ్యుల వద్దకు చేరుకోవడమే తమ దృష్టిలో అత్యంత గొప్ప అవార్డని స్పష్టం చేశారు. నివారణాత్మక గుండె వైద్య కార్యక్రమాల్లో భాగంగా ఇప్పటివరకు 5,000కుపైగా ఉచిత వైద్య శిబిరాలు నిర్వహించామని, వేలాది మందికి ఉచిత ఈసీజీ పరీక్షలు చేశామని డాక్టర్ రమేష్ బాబు తెలిపారు.

లక్ష మందికిపైగా విద్యార్థులకు ప్రాథమిక ప్రాణరక్షణ శిక్షణ అందించామని, 100కుపైగా నిరంతర వైద్య విద్యా కార్యక్రమాల ద్వారా వైద్యులకు అత్యాధునిక వైద్య పరిజ్ఞానాన్ని అందిస్తున్నామని వివరించారు. గిన్నీస్ వరల్డ్ రికార్డు, లిమ్కా బుక్ ఆఫ్ రికార్డ్స్, డాక్టర్ శరణ్ ఎక్సలెన్స్ అవార్డు, బెస్ట్ ఏషియన్ హెల్త్‌కేర్ ప్రొవైడర్ అవార్డు వంటి ప్రతిష్ఠాత్మక గుర్తింపులు లభించినప్పటికీ రోగి ఆరోగ్యంగా కోలుకోవడమే తమకు అత్యంత ముఖ్యమని ఆయన అన్నారు. ప్రస్తుతం సంస్థలో సుమారు 3,000 మంది సిబ్బంది పనిచేస్తున్నారని, వారిలో దాదాపు 80 శాతం మంది 40 ఏళ్లలోపు యువతరానికి చెందినవారని తెలిపారు.

ఈ యువతరం రాబోయే రెండు దశాబ్దాల పాటు సంస్థ విలువలు, నైతికత, పారదర్శకత, సేవాదృక్పథాన్ని కొనసాగిస్తూ సంస్థను మరింత ఉన్నత స్థాయికి తీసుకెళ్తుందని అన్నారు. ఆధునిక సాంకేతిక పరిజ్ఞానాన్ని అందిపుచ్చుకుంటూ సాంకేతిక అత్యుత్తమతతోపాటు వైద్య సేవల్లో క్లినికల్ ఎక్సలెన్స్‌ను సాధించడమే తమ లక్ష్యమని డాక్టర్ పోతినేని రమేష్ బాబు స్పష్టం చేశారు. కార్యక్రమంలో ఆస్టర్ రమేష్ హాస్పిటల్స్ ఛైర్మన్ ఎం.ఎస్. రామమోహనరావు, డైరెక్టర్ మధుస్మిత, డిప్యూటీ మేనేజింగ్ డైరెక్టర్ డాక్టర్ మమత, యూనిట్ హెడ్‌లు డాక్టర్ సుమ, డాక్టర్ సుదర్శన్, డాక్టర్ నితిన్, సీనియర్ వైద్యులు, కన్సల్టెంట్లు, ఉద్యోగులు, ఆరోగ్య రంగ ప్రముఖులు, ఆహ్వానితులు పాల్గొన్నారు.