TG20 League | టీజీ20 క్రికెట్‌ లీగ్‌ ఆటగాళ్ల వేలం

TG20 League | ఆంధ్రప్రభ, వెబ్‌డెస్క్‌: హైదరాబాద్‌ క్రికెట్‌ అసోసియేషన్‌ ప్రతిష్టాత్మకంగా నిర్వహిస్తున్న తొలి టీజీ20 క్రికెట్‌ లీగ్‌ ఆటగాళ్ల వేలం ఆసక్తికరంగా సాగింది. ఐకాన్‌ ప్లేయర్ల విభాగంలో టీమిండియా క్రికెటర్లు తిలక్‌ వర్మ, మహ్మద్‌ సిరాజ్‌ల కోసం ఫ్రాంచైజీలు పోటీపడ్డాయి. వేలంలో తిలక్‌ వర్మకు భారీ ధర పలికింది. ఆయనను మెదక్‌ ఫాల్కన్స్‌ రూ.33 లక్షలకు సొంతం చేసుకుంది. మరో స్టార్‌ పేసర్‌ మహ్మద్‌ సిరాజ్‌ను వరంగల్‌ వారియర్స్‌ రూ.14 లక్షలకు దక్కించుకుంది. అలాగే అమన్‌ రావును రూ.12 లక్షలకు ఫ్రాంచైజీ సొంతం చేసుకున్నట్లు సమాచారం. తిలక్‌ వర్మను మెదక్‌ ఫాల్కన్స్‌, సిరాజ్‌ను వరంగల్‌ వారియర్స్‌ దక్కించుకున్నట్లు తాజా క్రీడా కథనాలు వెల్లడించాయి.

తెలంగాణ క్రికెట్‌లో తొలి ఫ్రాంచైజీ ఆధారిత టోర్నీగా టీజీ20 లీగ్‌ ప్రారంభం కానుంది. హైదరాబాద్‌ క్రికెట్‌ అసోసియేషన్‌ ప్రకటించిన ఈ లీగ్‌కు బీసీసీఐ అనుమతి ఇచ్చినట్లు హెచ్‌సీఏ అధికారికంగా వెల్లడించింది. ఈ టోర్నీకి సంబంధించిన ఆటగాళ్ల వేలంలో 1,300 మందికిపైగా హెచ్‌సీఏ రిజిస్టర్డ్‌ క్రికెటర్లు పాల్గొనేలా ప్లేయర్‌ పూల్‌ రూపొందించారు. ఎనిమిది ఫ్రాంచైజీలు తమ జట్లను సిద్ధం చేసుకుంటున్నాయి. ఒక్కో జట్టుకు ఆటగాళ్ల కొనుగోలుకు రూ.60 లక్షల పర్స్‌ కేటాయించినట్లు ముందస్తు నివేదికలు పేర్కొన్నాయి.

టీజీ20 తొలి సీజన్‌ జూన్‌ 21న ఉప్పల్‌లోని రాజీవ్‌ గాంధీ అంతర్జాతీయ క్రికెట్‌ స్టేడియంలో ప్రారంభం కానుంది. రాష్ట్రంలోని యువ, ప్రతిభావంతులైన క్రికెటర్లకు ఈ లీగ్‌ మంచి వేదికగా మారుతుందని నిర్వాహకులు భావిస్తున్నారు.