cc camera | మెహదీపట్నం రైతుబజార్ వద్ద స్కైవాక్ నిర్మాణం

cc camera |ఆంధ్ర‌ప్ర‌భ వెబ్‌డెస్క్ : హైదరాబాద్‌లోని మెహదీపట్నం రైతుబజార్ ప్రాంతంలో స్కైవాక్ నిర్మాణ పనులు కొనసాగుతున్న నేపథ్యంలో ట్రాఫిక్ ఆంక్షలు అమల్లోకి వచ్చాయి. భారీ ట్రాఫిక్ రద్దీకి పేరుగాంచిన ఈ ప్రాంతంలో వాహనాల రాకపోకలను సులభతరం చేయడంతో పాటు నిర్మాణ పనులను వేగవంతం చేయడానికి హైదరాబాద్ ట్రాఫిక్ పోలీసులు ప్రత్యేక మార్గమళ్లింపులు ప్రకటించారు.

పోలీసుల ప్రకారం, ఆదివారం సాయంత్రం 4 గంటల నుంచి సోమవారం ఉదయం 6 గంటల వరకు ఈ ఆంక్షలు అమల్లో ఉంటాయి. రైతుబజార్ వద్ద స్కైవాక్ నిర్మాణంతో పాటు PVNR ఎక్స్‌ప్రెస్‌వేపై సీసీ కెమెరా పోల్స్ ఏర్పాటు పనులు కూడా చేపడుతున్నందున ఈ నిర్ణయం తీసుకున్నారు.

ఎక్కడ ఎలాంటి మార్గమళ్లింపులు?

మసాబ్‌ట్యాంక్, NMDC, సరోజినీదేవి కంటి ఆసుపత్రి వైపు నుంచి రేతిబౌలి–నానల్‌నగర్ వైపు వెళ్లే వాహనాలను PVNR ఎక్స్‌ప్రెస్‌వే పిల్లర్ నంబర్లు 2, 3 వద్ద ఉన్న అజీజియా మసీదు సమీపంలో మళ్లిస్తున్నారు. అక్కడి నుంచి మెరాజ్ కేఫ్ మార్గంగా మెహదీపట్నం వైపు పంపించి, పిల్లర్ నంబర్ 15 వద్ద తిరిగి సాధారణ మార్గంలోకి అనుమతిస్తున్నారు.

టోలిచౌకి, లంగర్‌హౌజ్, అత్తాపూర్ ప్రాంతాల నుంచి మసాబ్‌ట్యాంక్ వైపు వచ్చే వాహనాలను కూడా ప్రత్యేక యూటర్న్‌ల ద్వారా మళ్లిస్తున్నారు. విమానాశ్రయం వైపు వెళ్లే వాహనాలకు లక్ష్మీనగర్ ర్యాంప్ మార్గాన్ని సూచించారు.

ప్రజలకు పోలీసుల సూచనలు

ఈ మార్గాల్లో భారీ ట్రాఫిక్ జామ్‌లు ఏర్పడే అవకాశం ఉండటంతో ప్రత్యామ్నాయ రహదారులు ఉపయోగించాలని పోలీసులు సూచించారు. అత్యవసర పరిస్థితులు కాకపోతే మెహదీపట్నం–రేతిబౌలి కారిడార్‌ను వీలైనంతవరకు దూరంగా ఉండాలని విజ్ఞప్తి చేశారు. ట్రాఫిక్ అప్డేట్స్ కోసం హైదరాబాద్ ట్రాఫిక్ పోలీసుల సోషల్ మీడియా ఖాతాలను పరిశీలించాలని కోరారు.

స్కైవాక్ ప్రాజెక్ట్ ప్రత్యేకత

మెహదీపట్నం రైతుబజార్ వద్ద నిర్మిస్తున్న ఈ స్కైవాక్ నగరంలో అత్యంత రద్దీ ప్రాంతాల్లో ఒకటైన PVNR ఎక్స్‌ప్రెస్‌వే కారిడార్‌లో పాదచారుల భద్రత కోసం రూపొందిస్తున్నారు. దాదాపు 390 మీటర్ల పొడవుతో నిర్మిస్తున్న ఈ స్కైవాక్‌లో లిఫ్టులు, మెట్లు, బస్‌బే కనెక్టివిటీ వంటి సదుపాయాలు ఉండనున్నాయి. ఈ ప్రాజెక్ట్ పూర్తయితే ట్రాఫిక్ రద్దీ తగ్గడంతో పాటు పాదచారులకు సురక్షిత రాకపోకలు అందుబాటులోకి రానున్నాయి