Kerala | తొలి ట్రాన్స్ జండర్ జంటకు ఊరట … సంచలన తీర్పు ఇచ్చిన కేరళ హైకోర్టు
తిరువనంతపురం – సమాజంలో ట్రాన్స్జెండర్ల హక్కుల పరిరక్షణ దిశగా కేరళ హైకోర్టు ఒక చరిత్రాత్మక తీర్పును వెలువరించింది. ఓ ట్రాన్స్జెండర్ దంపతుల అభ్యర్థన మేరకు వారి బిడ్డ జనన ధృవీకరణ పత్రంలో ‘తల్లి’, ‘తండ్రి’ అనే పదాలకు బదులుగా లింగ రహితంగా పేరెంట్స్ అని నమోదు చేయడానికి అనుమతించింది. ఈ మేరకు జస్టిస్ జియాద్ రెహమాన్ ఏఏ నేతృత్వంలోని ధర్మాసనం కీలక ఉత్తర్వులు జారీ చేసింది. రాష్ట్రంలో ఇలాంటి తీర్పు వెలువడటం ఇదే ప్రప్రథమం.
వివరాల్లోకి వెళితే, కేరళకు చెందిన ట్రాన్స్జెండర్ దంపతులు జహాద్ (ట్రాన్స్మ్యాన్), జియా పావల్ (ట్రాన్స్వుమన్). వీరు రాష్ట్రంలో తొలి ట్రాన్స్జెండర్ తల్లిదండ్రులుగా గుర్తింపు పొందారు. తమకు జన్మించిన బిడ్డ జనన ధృవీకరణ పత్రంలో తమను తల్లి, తండ్రిగా కాకుండా, ఇద్దరినీ కేవలం పేరెంట్స్ గా, వారి లింగాలను ప్రస్తావించకుండా నమోదు చేయాలని వారు కోరారు. ఈ మేరకు సవరించిన సర్టిఫికెట్ను జారీ చేయాలని అధికారులను ఆదేశిస్తూ హైకోర్టు తీర్పు చెప్పింది. “పిటిషనర్ల పేర్లను వారి లింగాలను ప్రస్తావించకుండా, తండ్రి, తల్లి పేర్ల కాలమ్స్ను తొలగించి, వారిని తల్లిదండ్రులుగా (పేరెంట్స్గా) పొందుపరుస్తూ జనన ధృవీకరణ పత్రాలను జారీ చేయాలని ఐదవ ప్రతివాదిని ఆదేశిస్తూ ఈ రిట్ పిటిషన్ పరిష్కరించామని కోర్టు తన ఉత్తర్వుల్లో పేర్కొంది.
గతంలో, కోజికోడ్ కార్పొరేషన్ అధికారులు బిడ్డకు జనన ధృవీకరణ పత్రాన్ని జారీ చేస్తూ, అందులో జహాద్ను ‘తల్లి (ట్రాన్స్జెండర్)’ గా, జియాను ‘తండ్రి (ట్రాన్స్జెండర్)’ గా పేర్కొన్నారు. అయితే, తమ బిడ్డకు భవిష్యత్తులో ఎలాంటి గందరగోళం లేదా వివక్ష ఎదురుకాకుండా ఉండాలనే ఉద్దేశంతో, దంపతులు ఈ లింగ-నిర్దిష్ట పదాలను వ్యతిరేకించారు. తమను కేవలం ‘పేరెంట్’ గానే పేర్కొనాలని పట్టుబట్టారు.
ఈ మార్పు కోసం వారు 2023లోనే అధికారులను సంప్రదించారు. అయితే, అధికారులు వారి అభ్యర్థనను పట్టించుకోకపోవడంతో, దంపతులు కేరళ హైకోర్టును ఆశ్రయించారు. సర్టిఫికెట్ను సవరించడానికి నిరాకరించడం తమ ప్రాథమిక హక్కులను, తమ బిడ్డ హక్కులను ఉల్లంఘించడమేనని వారు తమ పిటిషన్లో వాదించారు. వారి వాదనలతో ఏకీభవించిన న్యాయస్థానం, వారి అభ్యర్థనను మన్నిస్తూ తాజాగా ఈ ఉత్తర్వులు జారీ చేసింది. ఈ తీర్పు ట్రాన్స్జెండర్ల హక్కుల సాధనలో ఒక మైలురాయిగా నిలుస్తుందని పలువురు హర్షం వ్యక్తం చేస్తున్నారు.
