రోహిత్ శర్మ భవితవ్యంపై భిన్న కథనాలు..
- కొనసాగుతారన్న ప్రచారం
- తప్పుకుంటారన్న ఊహాగానాలు
- బీసీసీఐ, రోహిత్ అధికారిక ప్రకటన కోసం ఎదురుచూపులు
ఆంధ్రప్రభ, ముంబై : భారత క్రికెట్ జట్టు సీనియర్ ఆటగాడు రోహిత్ శర్మ అంతర్జాతీయ కెరీర్పై భిన్న కథనాలు వెలువడుతున్నాయి. ఒకవైపు ఆయన ఇంకా భారత జట్టుకు ఆడాలనే లక్ష్యంతో ఉన్నారని కొన్ని మీడియా సంస్థలు పేర్కొంటుండగా, మరోవైపు యువ ఆటగాళ్లకు అవకాశం కల్పించాలనే ఉద్దేశంతో స్వచ్ఛందంగా తప్పుకునే అవకాశం ఉందని మరికొన్ని నివేదికలు చెబుతున్నాయి. దీంతో క్రికెట్ వర్గాల్లో చర్చ జోరందుకుంది.
కొన్ని మీడియా కథనాల ప్రకారం, రోహిత్ శర్మ ప్రస్తుతం రిటైర్మెంట్పై ఎలాంటి తుది నిర్ణయం తీసుకోలేదని తెలుస్తోంది. వ్యక్తిగత లక్ష్యాలతో పాటు భారత జట్టుకు మరికొంతకాలం సేవలందించాలని ఆయన భావిస్తున్నట్లు సమాచారం. అయితే, మరోవైపు జట్టు ఎంపిక విషయంలో సెలెక్టర్లు, ప్రధాన కోచ్ గౌతమ్ గంభీర్ వైఖరిపై రోహిత్ అసంతృప్తిగా ఉన్నట్లు క్రిక్బజ్ పేర్కొంది. 2027 వన్డే ప్రపంచకప్ ఆడాలన్నది తన లక్ష్యమని రోహిత్ శర్మ ఇప్పటికే స్పష్టం చేసినప్పటికీ, జట్టు భవిష్యత్ ప్రణాళికల్లో యువ ఆటగాళ్లకు ప్రాధాన్యం ఇస్తున్న నేపథ్యంలో స్వచ్ఛందంగా తప్పుకునే అవకాశాన్ని కూడా పరిశీలిస్తున్నట్లు ఆ నివేదిక తెలిపింది.
అలాగే, రోహిత్–సెలెక్టర్ల మధ్య జరిగిన చర్చలు కొత్తవి కావని, కొంతకాలంగా ఈ అంశంపై చర్చలు సాగుతున్నాయని ఆ నివేదిక పేర్కొంది. ఒకవేళ ప్రస్తుతం ఇంగ్లాండ్ తో జరుగున్న వన్డే సిరీస్ లోని… లార్డ్స్ వన్డే అనంతరం రోహిత్ రిటైర్మెంట్ ప్రకటిస్తే, అది పూర్తిగా ఆయన స్వతంత్ర నిర్ణయం కాదనే అభిప్రాయాన్ని కూడా వ్యక్తం చేసింది.
అయితే, ఇప్పటివరకు భారత క్రికెట్ నియంత్రణ మండలి (బీసీసీఐ) గానీ, రోహిత్ శర్మ గానీ ఆయన భవిష్యత్తుపై ఎలాంటి అధికారిక ప్రకటన చేయలేదు. దీంతో ప్రస్తుతం ప్రచారంలో ఉన్న సమాచారం అంతా మీడియా కథనాలు, ఇన్ సైడ్ రూమర్స్ ఆధారంగానే ఉందని చెప్పాలి.
అధికారిక ప్రకటన వెలువడేంత వరకు రోహిత్ శర్మ రిటైర్మెంట్కు సంబంధించిన వార్తలను ఖచ్చితమైన సమాచారంగా పరిగణించలేమని క్రికెట్ వర్గాలు పేర్కొంటున్నాయి. అందువల్ల ఆయన అంతర్జాతీయ భవితవ్యంపై స్పష్టత రావాలంటే బీసీసీఐ లేదా రోహిత్ శర్మ అధికారిక ప్రకటన కోసం వేచి చూడాల్సిందే.
రోహిత్ రీప్లేస్మెంట్ దొరికిందా.. !!
భారత జట్టు సీనియర్ ఓపెనర్ రోహిత్ శర్మ అంతర్జాతీయ భవిష్యత్తుపై ఊహాగానాలు కొనసాగుతున్న వేళ, ఆయన తప్పుకుంటే ఓపెనర్గా ఎవరు వస్తారనే అంశంపై చర్చ జోరందుకుంది. యశస్వి జైస్వాల్ తొలి ఎంపికగా పరిగణించబడుతున్నప్పటికీ, అతడితో పాటు మరో ముగ్గురు యువ ఆటగాళ్ల పేర్లు కూడా బలంగా వినిపిస్తున్నాయి. రోహిత్ శర్మ తప్పుకుంటే ఓపెనర్గా యశస్వి జైస్వాల్ తొలి ఎంపికగా నిలిచే అవకాశాలు ఎక్కువగా ఉన్నాయని క్రికెట్ వర్గాలు భావిస్తున్నాయి. అయితే జైస్వాల్తో పాటు మరో ముగ్గురు యువ ఆటగాళ్ల పేర్లు కూడా చర్చలోకి వస్తున్నాయి.
అభిషేక్ శర్మ : లెఫ్ట్ హ్యాండ్ ఓపెనర్ అభిషేక్ శర్మ ప్రస్తుతం భారత టీ20 జట్టులో కీలక ఆటగాడిగా కొనసాగుతున్నాడు. ఆరంభం నుంచే దూకుడుగా బ్యాటింగ్ చేయగల సామర్థ్యం అతనికి ఉంది. ఇప్పటివరకు వన్డేల్లో అరంగేట్రం చేయకపోయినా, లిస్ట్-ఏ క్రికెట్లో 68 మ్యాచ్ల్లో 2,196 పరుగులు చేసి తన సత్తా చాటాడు. సగటు 33.78, స్ట్రైక్రేట్ 100కు పైగా ఉండటం అతని బలాన్ని తెలియజేస్తోంది. అవసరమైతే ఎడమచేతి స్పిన్ బౌలింగ్తో కూడా జట్టుకు ఉపయోగపడగలడు.
వైభవ్ సూర్యవంశీ : కేవలం 15 ఏళ్ల వయసులోనే ఐపీఎల్-2026లో సంచలన ప్రదర్శనతో వైభవ్ సూర్యవంశీ అందరి దృష్టిని ఆకర్షించాడు. స్టార్ బౌలర్లపై కూడా నిర్భయంగా బ్యాటింగ్ చేసి 776 పరుగులు సాధించాడు. అతని స్ట్రైక్రేట్ 237.31గా నమోదైంది. ఈ ప్రదర్శనతో భారత టీ20 జట్టులో చోటు దక్కించుకున్న అతడు, భవిష్యత్తులో వన్డే జట్టులోనూ అవకాశం అందుకునే అవకాశముందని విశ్లేషకులు అభిప్రాయపడుతున్నారు.
దేవదత్ పడిక్కల్ : కర్ణాటక బ్యాటర్ దేవదత్ పడిక్కల్ గత మూడు విజయ్ హజారే ట్రోఫీ సీజన్లలో దాదాపు 1,500 పరుగులు చేసి నిలకడైన ప్రదర్శన కనబర్చాడు. లిస్ట్-ఏ క్రికెట్లో 41 ఇన్నింగ్స్ల్లో 2,796 పరుగులతో 82.23 అద్భుత సగటును నమోదు చేశాడు. 14 అర్ధశతకాలు, 13 శతకాలతో ఆకట్టుకున్నాడు. ప్రస్తుతం రాయల్ ఛాలెంజర్స్ బెంగళూరు తరఫున కూడా మంచి ఫామ్లో ఉన్నాడు. టెస్టులు, టీ20ల్లో ఇప్పటికే భారత్కు ప్రాతినిధ్యం వహించిన పడిక్కల్కు వన్డే జట్టులో అవకాశం లభిస్తుందా లేదా అన్నది ఆసక్తికరంగా మారింది.
ఇప్పటికి ఊహాగానాలే…
రోహిత్ శర్మ రిటైర్మెంట్పై ఇప్పటివరకు బీసీసీఐ లేదా రోహిత్ నుంచి అధికారిక ప్రకటన వెలువడలేదు. కాబట్టి ఆయన స్థానాన్ని ఎవరు భర్తీ చేస్తారనే చర్చ ప్రస్తుతం ఊహాగానాలకే పరిమితమైంది. అయితే భవిష్యత్తు దృష్ట్యా అభిషేక్ శర్మ, వైభవ్ సూర్యవంశీ, దేవదత్ పడిక్కల్ వంటి యువ ఆటగాళ్లు భారత వన్డే జట్టులో అవకాశాల కోసం బలమైన పోటీదారులుగా కనిపిస్తున్నారు.
రోహిత్ శర్మ భవిష్యత్తుపై అధికారిక స్పష్టత వచ్చిన తర్వాతే భారత్ ఓపెనింగ్ జోడీకి సంబంధించిన నిర్ణయం తీసుకునే అవకాశం ఉంది. అప్పటి వరకు, ఈ పేర్లను కేవలం సంభావ్య ప్రత్యామ్నాయాలుగానే పరిగణించాలని క్రికెట్ వర్గాలు పేర్కొంటున్నాయి.
