Rahul | ప్రధాని మోదీ ప్రసంగంలో పసలేదు:
Rahul | ప్రధాని మోదీ ప్రసంగంలో పసలేదు:
రాహుల్ గాంధీ ఘాటు విమర్శలు!
నేను సైన్యాన్ని అనలేదు..
బీజేపీని మాత్రమే విమర్శించా:
లోక్సభలో కాంగ్రెస్ అగ్రనేత సంచలన వ్యాఖ్యలు!
ఆంధ్రప్రభ వెబ్డెస్క్ : పార్లమెంట్ సాక్షిగా కేంద్ర ప్రభుత్వం ప్రవేశపెట్టిన బిల్లుపై కాంగ్రెస్ అగ్రనేత రాహుల్ గాంధీ నిప్పులు చెరిగారు. ఈ బిల్లు ఏమాత్రం ఆమోదయోగ్యం కాదని, చర్చ మొదలైన అరగంటలోనే ఇది వీగిపోవడం ఖాయమని ఆయన జోస్యం చెప్పారు. శుక్రవారం సభలో మాట్లాడిన రాహుల్, ప్రధాని నరేంద్ర మోదీ లక్ష్యంగా విమర్శనాస్త్రాలు సంధించారు.
ప్రధాని ప్రసంగంలో పసలేదు:
నిన్న సభలో ప్రధాని మోదీ చేసిన ప్రసంగంపై రాహుల్ గాంధీ తీవ్ర అసంతృప్తి వ్యక్తం చేశారు. “ప్రధాని ప్రసంగంలో కంటెంట్ ఏమాత్రం లేదు, అందులో పసలేదు. ఈ బిల్లుపై వివరణ ఇచ్చే క్రమంలో ప్రధాని మోదీ తడబడ్డారు” అని రాహుల్ ఎద్దేవా చేశారు. క్లిష్టమైన ప్రశ్నలకు సమాధానం చెప్పలేక ప్రభుత్వం మౌనం వహిస్తోందని ఆయన ఆరోపించారు.
బీజేపీ అంటే దేశం కాదు:
బీజేపీ తన రాజకీయ ప్రయోజనాల కోసం దేశాన్ని వాడుకుంటోందని రాహుల్ మండిపడ్డారు. “బీజేపీ అంటే దేశం.. దేశం అంటే బీజేపీ అనేలా తప్పుడు ప్రచారానికి తెరలేపారు. ఇది ప్రజాస్వామ్యానికి గొడ్డలిపెట్టు” అని ఆయన విమర్శించారు. గత పార్లమెంట్ సమావేశాలను ప్రభుత్వం ఉద్దేశపూర్వకంగా పూర్తిగా వృథా చేసిందని, ప్రజా సమస్యలపై చర్చ జరగకుండా అడ్డుకుందని ధ్వజమెత్తారు.
సైన్యంపై విమర్శల వార్తలపై స్పష్టత:
తాను భారత సైన్యాన్ని విమర్శించినట్లు వస్తున్న వార్తలపై రాహుల్ గాంధీ ఘాటుగా స్పందించారు. “నేను ఎప్పుడూ మన సైన్యాన్ని విమర్శించలేదు. కేవలం బీజేపీ అనుసరిస్తున్న తప్పుడు విధానాలను మాత్రమే విమర్శించాను. నా వ్యాఖ్యలను వక్రీకరించడం బీజేపీకి అలవాటుగా మారింది” అని ఆయన స్పష్టం చేశారు. ఈ సందర్భంగా రాహుల్ చేసిన వ్యాఖ్యలతో సభలో అధికార, ప్రతిపక్షాల మధ్య మరోసారి మాటల యుద్ధం మొదలైంది.
