కోతుల దాడితో మహిళకు గాయాలు.
గత కొన్ని రోజులుగా గ్రామంలో కోతుల బెడద
పెద్దపల్లి రూరల్ : కోతులు… గ్రామాలు, పట్టణాల్లో ఇళ్లపైకి ఎక్కి స్వైరవిహారం చేస్తున్నాయి. ఇంటి ముందు పని చేసుకుంటున్న మహిళపై ఒక్కసారిగా గుంపులుగా దాడి చేయడం, చిన్నపిల్లలు, వృద్ధులు బయటకు రావాలంటే భయపడే పరిస్థితి ఏర్పడటం ఆందోళన కలిగిస్తోంది. అటవీ ప్రాంతాలు కుదించుకుపోవడం, ఆహారం కోసం కోతులు జనావాసాల్లోకి రావడం, ప్రజలు వాటికి ఆహారం వేయడం వంటి కారణాలతో ఈ సమస్య రోజురోజుకూ తీవ్రమవుతోంది.
పెద్దపల్లి మండలం పెద్దబోంకూర్ గ్రామంలో శనివారం చోటుచేసుకున్న ఘటన ఈ సమస్య తీవ్రతకు నిదర్శనంగా నిలిచింది. ఇంటి ముందు పనిలో నిమగ్నమైన కలవేన కమల అనే మహిళపై కోతుల గుంపు ఒక్కసారిగా దాడి చేసింది. కోతులు తీవ్రంగా కరవడంతో ఆమె చేతులకు గాయాలయ్యాయి. వెంటనే కుటుంబ సభ్యులు ఆమెను పెద్దపల్లి ప్రభుత్వ ఆసుపత్రికి తరలించగా వైద్యులు చికిత్స అందించారు.
ఈ ఘటనతో గ్రామస్థులు తీవ్ర భయాందోళనకు గురయ్యారు. గత కొన్ని రోజులుగా గ్రామంలో కోతుల బెడద రోజురోజుకూ పెరుగుతోందని వారు చెబుతున్నారు. ఉదయం ఇంటి తలుపులు తెరిచిన వెంటనే కోతుల గుంపులు కనిపిస్తున్నాయని, మహిళలు, చిన్నారులు బయటకు రావడానికే భయపడుతున్నారని ఆవేదన వ్యక్తం చేస్తున్నారు. కొన్నిసార్లు చేతిలో ఉన్న సంచులు లాక్కోవడం, ఇళ్లలోకి చొరబడి ఆహార పదార్థాలు ఎత్తుకెళ్లడం, ఎదురుతిరిగితే దాడులకు దిగడం నిత్యకృత్యంగా మారిందని వాపోతున్నారు.
ఇది ఒక్క పెద్దబోంకూర్ గ్రామ సమస్య మాత్రమే కాదు. రాష్ట్రంలోని అనేక గ్రామాలు, పట్టణాల్లో ఇదే పరిస్థితి కనిపిస్తోంది. కోతుల దాడులతో గాయపడుతున్న వారి సంఖ్య పెరుగుతుండగా, సమస్యకు శాశ్వత పరిష్కారం మాత్రం కనిపించడం లేదు. అటవీశాఖ, స్థానిక పాలన యంత్రాంగం సమన్వయంతో శాస్త్రీయ పద్ధతుల్లో కోతులను జనావాసాల నుంచి తరలించడం, ప్రజలకు అవగాహన కల్పించడం వంటి చర్యలు తీసుకోవాలని గ్రామస్థులు కోరుతున్నారు.
ప్రాణాలకు ముప్పుగా మారుతున్న కోతుల బెడదను చిన్న సమస్యగా కాకుండా, ప్రజల భద్రతకు సంబంధించిన అంశంగా అధికారులు పరిగణించి వెంటనే చర్యలు చేపట్టాల్సిన అవసరం ఉందనే అభిప్రాయం వ్యక్తమవుతోంది.
