ముదిగొండలో అభివృద్ధి పనులకు భట్టి శ్రీకారం

ముదిగొండలో అభివృద్ధి పనులకు భట్టి శ్రీకారం

రూ. 33 కోట్ల జాతీయ రహదారుల అనుసంధాన ప్రాజెక్టుకు శంకుస్థాపన

రూ. 3.15 కోట్లతో 33/11 కేవీ సబ్‌స్టేషన్ నిర్మాణం ప్రారంభం

ఆంధ్రప్రభ, ఖమ్మం బ్యూరో: ఖమ్మం జిల్లా మధిర నియోజకవర్గంలోని ముదిగొండ మండలంలో ఆదివారం రాష్ట్ర ఉప ముఖ్యమంత్రి మల్లు భట్టి విక్రమార్క విస్తృతంగా పర్యటించారు. ఈ సందర్భంగా మండల వ్యాప్తంగా కోట్లాది రూపాయలతో చేపట్టనున్న పలు అభివృద్ధి కార్యక్రమాలకు శంకుస్థాపనలు, ప్రారంభోత్సవాలు చేశారు. గ్రామీణ ప్రాంతాల్లో మౌలిక సదుపాయాల కల్పనే లక్ష్యంగా ప్రభుత్వం పనిచేస్తోందని ఆయన పేర్కొన్నారు.

నూతన గ్రామ పంచాయతీ కార్యాలయం ప్రారంభం

మండలంలోని ఎడవల్లి లక్ష్మీపురం గ్రామంలో మహాత్మా గాంధీ జాతీయ ఉపాధి హామీ పథకం (ఎన్‌ఆర్‌ఈజీఎస్) నిధులతో రూ.20 లక్షల వ్యయంతో నిర్మించిన నూతన గ్రామ పంచాయతీ కార్యాలయాన్ని ఉప ముఖ్యమంత్రి ప్రారంభించారు. ఈ భవనం ద్వారా గ్రామస్తులకు పరిపాలనా సేవలు మరింత చేరువ అవుతాయని తెలిపారు.

నాణ్యమైన విద్యుత్ కోసం సబ్‌స్టేషన్

రైతులు, గృహ మరియు వాణిజ్య వినియోగదారులకు నిరంతర నాణ్యమైన విద్యుత్ సరఫరా లక్ష్యంగా ఎడవల్లి గ్రామంలో రూ.3.15 కోట్ల వ్యయంతో నిర్మించనున్న 33/11 కేవీ సబ్‌స్టేషన్‌కు భట్టి విక్రమార్క శంకుస్థాపన చేశారు.

అదే విధంగా ముదిగొండ మండల కేంద్రంలో ప్రజల సౌకర్యార్థం రూ.25 లక్షలతో నిర్మించనున్న ఈఆర్‌వో (ERO) కార్యాలయ భవనానికి కూడా ఆయన భూమిపూజ నిర్వహించారు.

రహదారుల విస్తరణకు శ్రీకారం

గ్రామీణ ప్రాంతాల మధ్య రవాణా సౌకర్యాలు మెరుగుపర్చేందుకు ప్రభుత్వం ప్రత్యేక ప్రాధాన్యత ఇస్తోందన్నారు. ఇందులో భాగంగా ఎడవల్లి నుంచి తల్లంపాడు వరకు రహదారి విస్తరణ పనులు, ఎడవల్లి–లక్ష్మీపురం–తెల్దారుపల్లి రహదారి నిర్మాణ పనులకు శంకుస్థాపన చేశారు.

రూ.33 కోట్లతో జాతీయ రహదారుల అనుసంధానం

ఎన్‌హెచ్-365ఏ (కోదాడ–ఖమ్మం–కురివి) మరియు ఎన్‌హెచ్-365బీబీ (సూర్యాపేట–అశ్వారావుపేట) జాతీయ రహదారులను అనుసంధానం చేసే రూ.33 కోట్ల విలువైన ప్రాజెక్టు పనులకు ఉప ముఖ్యమంత్రి శంకుస్థాపన చేశారు.

ఈ ప్రాజెక్టు పూర్తయితే రవాణా సౌకర్యాలు మెరుగుపడటంతో పాటు వ్యవసాయ, పారిశ్రామిక రంగాల అభివృద్ధికి కూడా దోహదపడుతుందని స్థానికులు ఆశాభావం వ్యక్తం చేస్తున్నారు.

50 పడకల ఆసుపత్రి పనుల పరిశీలన

ముదిగొండ మండల కేంద్రంలో నిర్మాణంలో ఉన్న 50 పడకల ప్రభుత్వ ఆసుపత్రి పనులను కూడా ఉప ముఖ్యమంత్రి పరిశీలించారు. నిర్మాణ పనుల్లో నాణ్యతకు అత్యంత ప్రాధాన్యత ఇవ్వాలని, ఎలాంటి నిర్లక్ష్యానికి తావివ్వొద్దని అధికారులను ఆదేశించారు.

ఈ కార్యక్రమాల్లో జిల్లా కలెక్టర్ దివాకర టీఎస్, జాయింట్ కలెక్టర్ శ్రీనివాసరెడ్డి, రాష్ట్ర గిడ్డంగుల సంస్థ చైర్మన్ రాయల నాగేశ్వరరావు, హస్తకళల అభివృద్ధి సంస్థ చైర్మన్ నాయుడు సత్యనారాయణ, సుడా చైర్మన్ పువ్వాళ్ల దుర్గాప్రసాద్, స్థానిక ప్రజాప్రతినిధులు, అధికారులు, ప్రజలు పాల్గొన్నారు.