భారత పురుషుల, మహిళల క్రికెట్ జట్లు (మంగళవారం) లండన్‌లోని క్లారెన్స్ హౌస్‌లో కింగ్ చార్లెస్ IIIను కలిశాయి. ఈ సందర్భంగా టీమిండియా కెప్టెన్ శుభమన్ గిల్.. జస్ప్రీత్ బుమ్రా, రిషబ్ పంత్, వంటి ప్రముఖ ఆటగాళ్లతో కింగ్ చార్లెస్ III స్నేహపూర్వకంగా మాట్లాడారు.
తాజాగా లార్డ్స్‌లో జరిగిన మూడో భారత్-ఇంగ్లాండ్ టెస్ట్ మ్యాచ్‌ను కింగ్ ప్రత్యేకంగా ప్రస్తావించారు. ఆ మ్యాచ్ హైలైట్స్ చూశానని, చివరి వికెట్ భారత్ కు దురదృష్టకరమని ఆయన అన్నారు. షోయబ్ బషీర్ బౌలింగ్ లో బంతి స్టంప్స్ కు తగిలి చివరి ఆటగాడు మహ్మద్ సిరాజ్ అవుట్ కావడంతో భారత్ 22 పరుగుల తేడాతో ఓడిపోయిందని కింగ్ అన్నారు.
శుభమన్ గిల్ స్పందన
ఈ సందర్భంగా శుభమన్ గిల్ మాట్లాడుతూ, “కింగ్ చార్లెస్ IIIని కలవడం నిజంగా గొప్ప అనుభవం. ఆయన మమ్మల్ని ఆత్మీయంగా ఆహ్వానించారు. టెస్ట్ మ్యాచ్ గురించి కూడా విశేషంగా మాట్లాడారు. ఆ మ్యాచ్‌లో చివరి వికెట్ దురదృష్టవశాత్తూ పడింది అని గుర్తు చేశారు. ఇది మాకు కూడా తక్కువ దూరంలో చేజారిపోయిన విజయం అని ఆయనతో పంచుకున్నాం. వచ్చే రెండు మ్యాచ్‌ల్లో మేము పూర్ణంగా రాణిస్తామన్న నమ్మకం ఉందని చెప్పాం” అని అన్నారు.
లార్డ్స్ టెస్ట్ మ్యాచ్ సారాంశం
ఆ మ్యాచ్‌లో భారత్ చివరి రోజు 58/4తో ఇన్నింగ్స్‌ కొనసాగించింది. ఇంగ్లాండ్ బౌలర్లు విజృంభించి త్వరగా వికెట్లు తీసినప్పటికీ, రవీంద్ర జడేజా అద్భుతంగా పోరాడాడు. జడేజా 181 బంతుల్లో 61 (నాటౌట్), నితీష్ రెడ్డి (30), జస్ప్రీత్ బుమ్రా (35), మొహమ్మద్ సిరాజ్ (23)తో కీలక భాగస్వామ్యాలు నెలకొల్పాడు. కానీ చివరి వరకు భారత్ ఆత్మస్థైర్యంగా పోరాడినప్పటికీ 74.5 ఓవర్లలో 170 పరుగులకు ఆలౌట్ అయి, విజయానికి కొద్ది దూరంలో నిలిచిపోయింది.
