9 తులాల బంగారం, 80 తులాల వెండి, రూ. 2 లక్షల నగదు అపహరణ.
రావల్ కోల్ పట్టణంలో దొంగల హల్ చల్.
కన్నీరుమున్నీరవుతున్న బాధితులుఇంటికి తాళం వేసి వెళ్లడమే ఆలస్యం..
చొరబడి దోచేసిన దుండగులు….
మేడ్చల్, ఆంధ్రప్రభ : మేడ్చల్ జిల్లా మేడ్చల్ మండలం ఎల్లంపేట మున్సిపాలిటీ పరిధిలోని రావల్ కోల్ పట్టణంలో శనివారం రోజు భారీ చోరీ చోటుచేసుకుంది. రావల్ కోల్ పట్టణానికి చెందిన బందెల ముత్యాలు కుటుంబ సభ్యులతో కలిసి బయటకు వెళ్లిన సమయంలో దుండగులు ఈ ఘాతుకానికి ఒడిగట్టారు.
ఇంటికి తాళం వేసి ఉన్న విషయాన్ని గమనించిన దొంగలు, తలుపులు పగులగొట్టి లోపలికి చొరబడ్డారు. బెడ్రూమ్లోని అల్మారాలను, లాకర్లను ధ్వంసం చేసి లోపల ఉన్న నగదు, బంగారు ఆభరణాలను దొంగిలించారు. బాధితులు తెలిపిన వివరాల ప్రకారం.. ఇంట్లో దాచి ఉంచిన 9 తులాల బంగారం, 80 తులాల వెండి ఆభరణాలతో పాటు రూ. 2 లక్షల నగదును దుండగులు అపహరించుకుపోయారు.
తిరిగి వచ్చి చూసేసరికి ఇంటి తలుపుల తాళాలు పగులగొట్టి ఉండటం, అల్మారిలోని బట్టలు, వస్తువులు చెల్లాచెదురుగా పడి ఉండటంతో బాధితులు తీవ్ర దిగ్భ్రాంతికి గురయ్యారు. సర్వస్వం కోల్పోయామని కన్నీరుమున్నీరవుతున్నారు. ఈ ఘటనపై సమాచారం అందుకున్న పోలీసులు సంఘటనా స్థలానికి చేరుకుని పరిశీలించారు. కేసు నమోదు చేసి, క్లూస్ టీమ్ డాగ్ స్క్వాడ్ సాయంతో దొంగల కోసం గాలింపు చర్యలు చేపట్టారు.
