ఇంద్రకీలాద్రిపై వైభవంగా సూర్యోపాసన సేవ

ఇంద్రకీలాద్రిపై వైభవంగా సూర్యోపాసన సేవ

లోకకల్యాణం కోసం శాస్త్రోక్తంగా ప్రత్యేక పూజలు
అరుణ, మహాసౌర పారాయణాలతో మార్మోగిన ఆలయ ప్రాంగణం
ఆరోగ్యం, తేజస్సు ప్రసాదించే ఆదిత్యారాధన
భక్తులకు తీర్థప్రసాదాల పంపిణీ

ఆంధ్రప్రభ ఇంద్రకీలాద్రి : విజయవాడ లోని ఇంద్రకీలాద్రిపై వెలసిన శ్రీ దుర్గా మల్లేశ్వర స్వామి వార్ల దేవస్థానంలో ఆదివారం ఉదయం సూర్యోపాసన సేవ భక్తిశ్రద్ధల మధ్య అత్యంత వైభవంగా నిర్వహించారు. లోకకల్యాణం, ప్రజల ఆయురారోగ్యాలు, సర్వజన సుఖశాంతుల కోసం నిర్వహించిన ఈ ఆధ్యాత్మిక కార్యక్రమంలో ఆలయ వేదపండితులు శాస్త్రోక్తంగా పూజా కార్యక్రమాలు నిర్వహించారు. సూర్య భగవానుడికి ప్రత్యేకంగా నిర్వహించిన ఈ సేవలో వేదపండితులు అరుణ పారాయణం, మహాసౌర పారాయణం, సూర్య అష్టోత్తర శతనామావళి పఠనాలతో ఆలయ ప్రాంగణాన్ని ఆధ్యాత్మిక వాతావరణంతో నింపారు. మంత్రోచ్ఛారణల మధ్య నిర్వహించిన అర్చనలు భక్తులను విశేషంగా ఆకట్టుకున్నాయి. జ్యోతిష్య శాస్త్రం ప్రకారం సూర్యోపాసన ఆరోగ్యం, తేజస్సు, ఆత్మవిశ్వాసం, మానసిక ప్రశాంతతను ప్రసాదిస్తుందని వేదపండితులు వివరించారు.

ఆదివారం సూర్య భగవానుడికి ప్రీతికరమైన దినంగా భావించబడుతున్న నేపథ్యంలో ఈ సేవకు ప్రత్యేక ప్రాధాన్యత నెలకొంది. సూర్యోపాసన అనంతరం కనకదుర్గమ్మ వారికి ప్రత్యేక హారతులు సమర్పించి భక్తులకు తీర్థప్రసాదాలు అందజేశారు. కార్యక్రమంలో పాల్గొన్న భక్తులు ఆధ్యాత్మిక అనుభూతిని పొందినట్లు తెలిపారు. భక్తుల సౌకర్యార్థం దేవస్థానం ప్రత్యేక ఏర్పాట్లు చేసినట్లు అధికారులు తెలిపారు. సూర్యోపాసన వంటి ఆర్జిత సేవల్లో పాల్గొనదలచిన భక్తులు దేవస్థానం అధికారిక వెబ్‌సైట్ ద్వారా లేదా మనమిత్ర వాట్సాప్ సేవలు, ఆలయ టికెట్ కౌంటర్ల ద్వారా ముందస్తుగా టికెట్లు పొందవచ్చని సూచించారు. ఈ కార్యక్రమంలో దేవస్థానం అధికారులు, అర్చక బృందం, వేదపండితులు, పెద్ద సంఖ్యలో భక్తులు పాల్గొని ఆదిత్యుని అనుగ్రహాన్ని పొందారు.