- నేలకొరిగిన చెట్లు
- విద్యుత్ సరఫరాకు అంతరాయం
నిజామాబాద్ నగరంలో సోమవారం సాయంత్రం ఒక్కసారిగా తుఫాను వాతావరణం ఏర్పడింది. దాదాపు 30 నిమిషాల పాటు కొనసాగిన భారీ ఈదురుగాలులతో కూడిన వర్షం నగరాన్ని అతలాకుతలం చేసింది. ముఖ్య కూడళ్లలో చెట్లు నేలకొరిగాయి, విద్యుత్ తీగలు తెగిపోయాయి. ముఖ్యంగా గంగాస్థాన్, కంటేశ్వర్, పాలిటెక్నిక్ కళాశాల, పులాంగ్ ప్రాంతాల్లో భారీ వృక్షాలు కూలిపోయాయి.
విద్యుత్ అంతరాయం – అంధకారంలో నగరం :
ఈదురుగాలులతో విద్యుత్ తీగలు తెగిపోవడంతో పలు ప్రాంతాల్లో విద్యుత్ సరఫరా నిలిచిపోయింది. దీనివల్ల నగరమంతా అంధకారంలో మునిగిపోయింది. ప్రజలు తీవ్ర అసౌకర్యానికి గురయ్యారు.
ట్రాఫిక్ కు అంతరాయం – వెంటనే స్పందించిన పోలీస్ అధికారులు:
చెట్ల కొమ్మలు విరిగిపడి రోడ్లపై పడటంతో ట్రాఫిక్ తీవ్రంగా ప్రభావితమైంది. పరిస్థితిని అదుపులోకి తేవడంలో ట్రాఫిక్ సిబ్బంది చురుకుగా వ్యవహరించారు. ట్రాఫిక్ సీఐ ప్రసాద్ ఆధ్వర్యంలో పోలీసులు వర్షం మధ్యలోనూ రోడ్డుపై చెట్లు, కొమ్మలను తొలగిస్తూ ట్రాఫిక్‌ను పునరుద్ధరించే పనిలో నిమగ్నమయ్యారు.
అసౌకర్యాలు తలెత్తినప్పటికీ, అధికారులు తక్షణ స్పందనతో సహాయక చర్యలు చేపట్టిన తీరు ప్రశంసించదగ్గది. పునరుద్ధరణ పనులు కొనసాగుతున్నాయి.
