Water Crisis India | రుతుపవనాల ఆలస్యంతో పెరుగుతున్న ఆందోళనలు
Water Crisis India | రుతుపవనాల ఆలస్యంతో పెరుగుతున్న ఆందోళనలు
Water Crisis India | సూపర్ ఎల్నినో ముప్పును ఎదుర్కొనే సిద్ధత ఎంత?
నీటి నిర్వహణలో భారత్కు అతిపెద్ద సవాలు
ముందస్తు హెచ్చరికలే కాదు.. ముందస్తు చర్యలూ అవసరం
Water Crisis India | 2026 జూన్ 4న నైరుతి రుతుపవనాలు కేరళ తీరాన్ని తాకడం వ్యవసాయం, తాగునీరు, సాగునీరు, జీవనోపాధి కోసం వర్షాలపై ఆధారపడే కోట్లాది భారతీయులకు ఉపశమనం కలిగించాల్సింది. కానీ, అది ఆందోళనలను మరింత పెంచింది. సాధారణ తేదీ కంటే మూడు రోజులు ఆలస్యంగా, భారత వాతావరణ శాఖ అంచనా వేసిన తేదీ కంటే తొమ్మిది రోజులు ఆలస్యంగా రుతుపవనాలు ప్రవేశించాయి. అంతకంటే ముఖ్యంగా, దేశవ్యాప్తంగా వర్షపాత నమూనాలను తీవ్రంగా ప్రభావితం చేసే అవకాశం ఉన్న శక్తివంతమైన ఎల్నినో ప్రభావం నీడలో ఇవి ప్రారంభమయ్యాయి.
ఐఎండీ తన రుతుపవనాల అంచనాను దీర్ఘకాల సగటులో 90 శాతానికి తగ్గించింది. లోటు లేదా తీవ్ర లోటు వర్షపాతం నమోదయ్యే అవకాశం 60 శాతంగా పేర్కొంది. అమెరికా జాతీయ సముద్ర, వాతావరణ సంస్థ సహా అంతర్జాతీయ వాతావరణ సంస్థలు అభివృద్ధి చెందుతున్న ఎల్నినో చరిత్రలోనే అత్యంత బలమైన వాటిలో ఒకటిగా మారే అవకాశం ఉందని, 2026-27 శీతాకాలం వరకు కొనసాగవచ్చని హెచ్చరించాయి. ఈ నేపథ్యంలో ఒక కీలక ప్రశ్న ముందుకొస్తోంది. సూపర్ ఎల్నినోను ఎదుర్కొనేందుకు భారత్ తగినంతగా సిద్ధమైందా?
1987, 2002, 2009, 2015 సంవత్సరాల్లో భారత్ తీవ్ర ఎల్నినో కరువును ఎదుర్కొంది. ఆ సందర్భాల్లో వ్యవసాయ ఉత్పత్తి తగ్గింది. నీటి వనరులు క్షీణించాయి. గ్రామీణ ఆర్థిక వ్యవస్థ దెబ్బతింది. ఆహార ధరలు పెరిగాయి. అయినప్పటికీ విపత్తు నిర్వహణలో ముందస్తు చర్యల కంటే ప్రతిస్పందనాత్మక విధానాలే ఇప్పటికీ ఎక్కువగా కనిపిస్తున్నాయి. కరువు పరిస్థితులు ఏర్పడిన తర్వాత చర్యలు తీసుకోవడం జరుగుతోంది. కానీ, ముందస్తు ప్రణాళికలు అమలు కావడం లేదు. సూపర్ ఎల్నినో అనేది ఊహించని విపత్తు కాదు. ఆధునిక శాస్త్రీయ పరిశీలనల ద్వారా దాని ప్రభావాలను నెలల ముందే అంచనా వేయవచ్చు. అందువల్ల సిద్ధతలో వైఫల్యం కేవలం వాతావరణ సమస్య మాత్రమే కాదు, పాలనా వైఫల్యంగా పరిగణించాల్సి ఉంటుంది.
భారత్ ఎదుర్కొంటున్న అతిపెద్ద బలహీనతల్లో నీటి నిర్వహణ ఒకటి. దశాబ్దాలుగా సాగునీటి ప్రాజెక్టులు, వాటర్షెడ్ అభివృద్ధి కార్యక్రమాలు, నీటి సంరక్షణ పథకాలపై భారీ పెట్టుబడులు పెట్టినా, దేశం ఇప్పటికీ రుతుపవనాలపై అత్యధికంగా ఆధారపడుతోంది. దేశంలోని సాగుభూమిలో సగానికి పైగా ఇప్పటికీ వర్షాధారంగానే ఉంది. అనేక ప్రాంతాల్లో భూగర్భ జలమట్టాలు నిరంతరం పడిపోతున్నాయి. వర్షపాతం గణనీయంగా తగ్గితే జలాశయాలు నిండకపోవచ్చు. దీంతో అనేక రాష్ట్రాల్లో తాగునీటి కొరత తీవ్రమయ్యే ప్రమాదం ఉంది. పట్టణ ప్రాంతాల్లో వర్షపు నీటి సంరక్షణ అమలు కావడం లేదు. సంప్రదాయ చెరువులు, కుంటలు ఆక్రమణలు, నిర్లక్ష్యంతో నశిస్తున్నాయి.
బలహీనమైన రుతుపవనాల ప్రభావాన్ని వ్యవసాయ రంగమే అత్యధికంగా అనుభవించాల్సి ఉంటుంది. ఖరీఫ్ పంటల విజయవంతమైన సాగు సమయానికి, సమానంగా కురిసే వర్షాలపై ఆధారపడి ఉంటుంది. రుతుపవనాల ఆలస్యం, దీర్ఘకాలిక పొడి విరామాలు, అస్థిర వర్షపాతం కారణంగా వరి, పప్పుధాన్యాలు, నూనెగింజలు, చెరకు, పత్తి వంటి పంటల దిగుబడులు తగ్గే ప్రమాదం ఉంది.
మరో ప్రధాన ఆందోళన తీవ్రమైన వడగాలుల ప్రమాదం. బలమైన ఎల్నినో పరిస్థితులు సాధారణంగా అధిక ఉష్ణోగ్రతలు, దీర్ఘకాలిక వేడి తరంగాలకు కారణమవుతాయి. కొన్ని నగరాలు హీట్ యాక్షన్ ప్లాన్లను రూపొందించినప్పటికీ, వాటి అమలు దేశవ్యాప్తంగా సమానంగా లేదు. ఈ పరిస్థితులను ఎదుర్కోవడానికి కేవలం సహాయక ప్యాకేజీలు సరిపోవు. బలమైన సరఫరా వ్యవస్థలు, మెరుగైన ఆహార నిల్వలు, వ్యూహాత్మక ధాన్య నిల్వలు, ముందస్తు మార్కెట్ జోక్యాలు అవసరం. లేకపోతే సూపర్ ఎల్నినో భారం దేశ ఆర్థిక వ్యవస్థ మొత్తంపైనా పడుతుంది.
అత్యంత ఆందోళనకర అంశం ఏమిటంటే, దేశవ్యాప్తంగా అమలు చేయదగిన సమగ్ర సన్నద్ధత వ్యూహం కనిపించకపోవడం. శాస్త్రీయ సంస్థలు పదేపదే హెచ్చరికలు జారీ చేస్తున్నప్పటికీ, నీటి సంరక్షణ, వ్యవసాయ అనుసరణ, వడగాలి నిర్వహణ, ప్రజారోగ్య సన్నద్ధత, విపత్తు ప్రమాద తగ్గింపు వంటి అంశాల్లో సమన్వయపూర్వక చర్యలు కనిపించడం లేదు. భారత్ అత్యాధునిక వాతావరణ అంచనా సామర్థ్యాలను అభివృద్ధి చేసుకున్నప్పటికీ, అంచనాలు మాత్రమే ప్రజలను రక్షించలేవు. ముందస్తు హెచ్చరికలను ముందస్తు చర్యలతో అనుసంధానం చేయాలి. విపత్తులు సంభవించే ముందు చర్యలు తీసుకోవడం, తర్వాత సహాయక చర్యలు చేపట్టడం కంటే మరింత సమర్థవంతమైనది. రాబోయే నెలలు భారతదేశ సామర్థ్యాన్ని పరీక్షించబోతున్నాయి.
కేంద్ర, రాష్ట్ర ప్రభుత్వాలు నీటి సంరక్షణ కార్యక్రమాలను బలోపేతం చేయాలి, వర్షపు నీటి సేకరణను ప్రోత్సహించాలి. కరువు నిరోధక వ్యవసాయాన్ని విస్తరించాలి. హీట్ యాక్షన్ ప్లాన్లను అమలు చేయాలి. వాతావరణ హెచ్చరికలను సమర్థవంతంగా ప్రజలకు చేరవేయాలి. 2026 రుతుపవనాలు మరో వర్షాకాలం ప్రారంభం మాత్రమే కాదు.. అవి ఒక హెచ్చరిక. భారత్ ఒక నియంత్రించగల వాతావరణ సవాలును ఎదుర్కొంటుందా? లేక పెద్ద సామాజిక, ఆర్థిక సంక్షోభాన్ని ఎదుర్కొంటుందా? అనేది నేడు తీసుకునే సన్నద్ధత చర్యలపై ఆధారపడి ఉంటుంది. ఇప్పుడు సూపర్ ఎల్నినో వస్తుందా అనేది ప్రశ్న కాదు. దాన్ని ఎదుర్కొనేందుకు భారత్ సిద్ధంగా ఉందా? అనేదే అసలు ప్రశ్న.
– డా. ముచ్చుకోట సురేష్ బాబు
9989988912
