గ్రాండ్ మాస్టర్ చిక్కలే !!
- వడ్లమూడిలో ఆసక్తికర గేమ్
- నేషనల్ చెస్ చాంపియన్ షిప్ టోర్నీ ప్రారంభం
గుంటూరు బ్యూరో, ఆంధ్రప్రభ : వడ్లమూడి విజ్ఞాన్ యూనివర్సిటీలో శుక్రవారం 62వ జాతీయ స్థాయి చదరంగ పోటీలు ఘనంగా ప్రారంభమయ్యాయి. ఈ పోటీలు ఆంధ్రప్రదేశ్ చదరంగ సంఘం ఆధ్వర్యంలో, విజ్ఞాన్ యూనివర్సిటీ సహకారంతో నిర్వహించబడుతున్నాయి. దేశవ్యాప్తంగా వివిధ రాష్ట్రాల నుంచి వచ్చిన చెస్ క్రీడాకారులు ఈ పోటీలలో తమ సత్తా చాటేందుకు సిద్ధంగా ఉన్నారు.
అయితే, ఈ సందర్భంలో అందరి దృష్టిని ఆకర్షించిన ఒక ఆసక్తికర సన్నివేశం జరిగింది. కేంద్ర సహాయ మంత్రి డాక్టర్ పెమ్మసాని చంద్రశేఖర్, గ్రాండ్ మాస్టర్ ఎం.ఆర్. లలిత్ బాబుతో కలిసి చెస్ బోర్డు ముందు కాసేపు చెస్ ఆడారు
మంత్రి బిజీ షెడ్యూల్లో కూడా..
కేంద్ర గ్రామీణాభివృద్ధి, కమ్యూనికేషన్ శాఖ సహాయ మంత్రిగా ఎప్పుడూ బిజీగా ఉండే డాక్టర్ పెమ్మసాని, చెస్ పట్ల తనకున్న మక్కువను ఈ సందర్భంగా చాటుకున్నారు. గ్రాండ్ మాస్టర్ లలిత్ బాబుతో చెస్ బోర్డు మీద సరదాగా కాసేపు తలపడ్డారు. ఈ ఆటలో మంత్రి చూపిన ఉత్సాహం, ఆట పట్ల అభిరుచి అందరినీ ఆకట్టుకున్నాయి.
క్రీడలకు ప్రోత్సాహం
ఈ సందర్భంగా మాట్లాడిన డాక్టర్ పెమ్మసాని, విజ్ఞాన్ యూనివర్సిటీ, ఆంధ్ర చదరంగ సంఘం సంయుక్తంగా ఈ జాతీయ స్థాయి చెస్ పోటీలను నిర్వహిస్తున్నందుకు సంతోషం వ్యక్తం చేశారు. “క్రీడలకు ప్రోత్సాహం అందించడంలో కేంద్ర, రాష్ట్ర ప్రభుత్వాలు ఎల్లప్పుడూ ముందుంటాయి. రాబోయే మూడేళ్లలో రాష్ట్ర ప్రభుత్వం క్రీడాభివృద్ధి కోసం ప్రత్యేక బడ్జెట్ కేటాయిస్తుంది,” అని ఆయన హామీ ఇచ్చారు. ఆంధ్రప్రదేశ్లో క్రీడలను ప్రోత్సహించేందుకు ముఖ్యమంత్రి నారా చంద్రబాబు నాయుడు చేస్తున్న కృషిని కూడా ఆయన కొనియాడారు.
ఈ జాతీయ స్థాయి చదరంగ పోటీలు యువ క్రీడాకారులకు తమ ప్రతిభను చాటుకునే గొప్ప వేదికగా నిలుస్తాయని ఆయన అన్నారు. విజ్ఞాన్ యూనివర్సిటీ వేదికగా జరుగుతున్న ఈ పోటీలు, చదరంగంలో ఆంధ్రప్రదేశ్ యొక్క ప్రతిష్ఠను మరింత పెంచుతాయని అన్నారు. గ్రాండ్ మాస్టర్తో మంత్రి ఆడిన చెస్ ఆట ఈ కార్యక్రమానికి ఒక ప్రత్యేక ఆకర్షణగా నిలిచింది.
