ఈసీ అధికారులు పచ్చి అబద్ధాలు చెప్తున్నారు

నా ఓటు తొలగించలేదన్న అధికారుల ప్రకటనపై నటుడి తీవ్ర ఆగ్రహం..
పొరపాటు జరిగిందని అధికారులు తనకు ఫోన్ చేశారని వెల్లడి..
త్వరలో ఆధారాలతో మీడియా ముందుకు వస్తానని ప్రకటన

బెంగళూరు, ఆంధ్ర‌ప్ర‌భ : తన ఓటు తొలగింపు వ్యవహారంపై ఎన్నికల అధికారులు ఇచ్చిన వివరణపై సినీ నటుడు ప్రకాశ్ రాజ్ తీవ్రంగా స్పందించారు. తన ఓటు తొలగించలేదని అధికారులు చెబుతున్న మాటలు పచ్చి అబద్ధాలని ఆయన ఆరోపించారు. తాను ఓటు జాబితా నుంచి పేరు తొలగించారంటూ వీడియో విడుదల చేసిన అనంతరం అధికారులు తనకు ఫోన్ చేసి పొరపాటు జరిగిందని చెప్పారని ప్రకాశ్ రాజ్ పేర్కొన్నారు. ఇందుకు సంబంధించిన ఫోన్ సంభాషణల రికార్డులు తన వద్ద ఉన్నాయని తెలిపారు.

తన ఓటు జాబితాలో కనిపించకపోవడంపై వీడియో విడుదల చేసిన తర్వాత అధికారులు తనను సంప్రదించారని ప్రకాశ్ రాజ్ చెప్పారు. “పొరపాటు జరిగింది.. దయచేసి సోషల్ మీడియాలో పెట్టిన వీడియోను తొలగించండి. మళ్లీ మరో వీడియో పెట్టండి” అంటూ అధికారులు తనను కోరారని ఆయన ఆరోపించారు. ఈ వ్యవహారానికి సంబంధించిన ఆధారాలు తన వద్ద ఉన్నాయని తెలిపారు.

అయితే ఈ ఆరోపణలను ఎన్నికల అధికారులు ఇప్పటికే ఖండించారు. ప్రకాశ్ రాజ్ ఓటును ఏకపక్షంగా తొలగించలేదని స్పష్టం చేశారు. ఆయన ఓటరు గుర్తింపు కార్డులో నమోదైన చిరునామాలో ప్రస్తుతం నివసించడం లేదని, అక్కడి పరిశీలనలో ఆయన సుమారు నాలుగేళ్ల క్రితమే అక్కడి నుంచి మారిపోయినట్లు పొరుగువారు, ఆస్తి యజమాని, నిర్వాహకులు తెలిపారని అధికారులు వెల్లడించారు. ఈ వివరాల ఆధారంగా ఆయన పేరును ‘షిఫ్టెడ్’ (చిరునామా మారిన వ్యక్తి)గా గుర్తించినట్లు తెలిపారు.

అధికారుల వివరణ ప్రకారం, 2026 జూన్ 16న ఎన్నికల సమాచారం గడ్డకట్టే సమయానికి ప్రకాశ్ రాజ్ పేరు శాంతినగర్ నియోజకవర్గంలోని ఓటర్ల జాబితాలోనే ఉంది. అనంతరం ప్రత్యేక ఓటర్ల జాబితా సవరణ ప్రక్రియలో నమోదిత చిరునామా వద్ద పరిశీలన నిర్వహించి, ఆయన అక్కడ నివసించడం లేదని నిర్ధారించిన తర్వాత ‘షిఫ్టెడ్’గా గుర్తించినట్లు బెంగళూరు సెంట్రల్ సిటీ కార్పొరేషన్ అధికారులు తెలిపారు.

ఈ నేపథ్యంలోనే ప్రకాశ్ రాజ్ అధికారుల వివరణను తప్పుబట్టారు. తన వీడియో బయటకు వచ్చిన తర్వాత పరిస్థితిని మార్చేందుకు ప్రయత్నించారని ఆయన ఆరోపించారు. “హడావిడిగా వెబ్‌సైట్‌లో ‘షిఫ్టెడ్’ అని మార్చి.. కొన్ని మీడియా సంస్థలకు ఆ సమాచారాన్ని పంపించి నేను అబద్ధం చెప్పినట్లు చిత్రీకరించారు” అని విమర్శించారు.

ఓటు హక్కు విషయంలో సాధారణ పౌరులు ఇబ్బందులు ఎదుర్కోవాల్సి వస్తోందని ప్రకాశ్ రాజ్ ఆవేదన వ్యక్తం చేశారు. “దేశ పౌరులు లైన్లో నిలబడి మా ఓటు మాకు కావాలి అని అడుక్కోవాలా?” అని ప్రశ్నించారు.

ఈ వ్యవహారంపై త్వరలో పూర్తి వివరాలతో మీడియా సమావేశం నిర్వహిస్తానని ప్రకాశ్ రాజ్ ప్రకటించారు. తన ఆరోపణలకు సంబంధించిన కాల్ రికార్డులు, ఇతర ఆధారాలను బయటపెడతానని చెప్పారు.

మరోవైపు, ప్రకాశ్ రాజ్ ఆరోపణలపై అధికారులు ఇచ్చిన వివరణ, ఆయన తాజాగా చేస్తున్న ఆరోపణలు పరస్పరం భిన్నంగా ఉన్నాయి. దీంతో అసలు ఏం జరిగిందనే అంశంపై ఇప్పుడు మరింత చర్చ మొదలైంది. ప్రకాశ్ రాజ్ చెబుతున్న కాల్ రికార్డులు, ఇతర ఆధారాలు బయటకు వస్తే ఈ వివాదంపై మరింత స్పష్టత వచ్చే అవకాశం ఉంది. ప్రస్తుతానికి అధికారుల వాదన ఒకటి.. ప్రకాశ్ రాజ్ వాదన మరొకటిగా కొనసాగుతోంది.