Onion Farmers | ఉల్లి ధర క్వింటాల్కు 13 శాతం పెంపు
బఫర్ స్టాక్ కోసం కేంద్ర ప్రభుత్వం నిర్ణయం
రూ.2,125కు చేరిన కొనుగోలు ధర
గతంలో క్వింటాల్కు రూ.1,875గా ఉన్న మద్దతు ధర
ఈ సీజన్లో ఐదోసారి పెంచిన కేంద్రం
Onion Farmers | ఆంధ్రప్రభ వెబ్డెస్క్ : ఉల్లి రైతులకు కేంద్ర ప్రభుత్వం మరోసారి ఊరటనిచ్చింది. బఫర్ స్టాక్ కోసం ఉల్లి కొనుగోలు ధరను క్వింటాల్కు 13 శాతం పెంచుతూ కీలక నిర్ణయం తీసుకుంది. దీంతో గతంలో రూ.1,875గా ఉన్న కొనుగోలు ధర రూ.2,125కు చేరింది. ప్రస్తుత సీజన్లో కేంద్రం కొనుగోలు ధరను సవరించడం ఇది ఐదోసారి కావడం గమనార్హం.
దేశవ్యాప్తంగా ఉల్లి రైతులకు మద్దతుగా కేంద్ర ప్రభుత్వం మరో కీలక నిర్ణయం తీసుకుంది. బఫర్ స్టాక్ కోసం రైతుల నుంచి కొనుగోలు చేసే ఉల్లి ధరను క్వింటాల్కు రూ.1,875 నుంచి రూ.2,125కు పెంచింది. అంటే క్వింటాల్కు రూ.250 అదనంగా, సుమారు 13 శాతం పెంపు లభించింది. ఉల్లి ధరల్లో హెచ్చుతగ్గులు తరచూ చోటుచేసుకునే నేపథ్యంలో రైతులకు గిట్టుబాటు ధర కల్పించడంతో పాటు వినియోగదారులకు కూడా ధరలను నియంత్రించేందుకు కేంద్ర ప్రభుత్వం ప్రతి ఏడాది బఫర్ స్టాక్ను ఏర్పాటు చేస్తోంది. ఈ నిల్వలను అవసరమైన సమయంలో మార్కెట్లో విడుదల చేయడం ద్వారా ధరలను స్థిరీకరించే చర్యలు చేపడుతోంది.
ఈ నేపథ్యంలో రైతుల నుంచి నాణ్యమైన ఉల్లిని మరింత ఎక్కువగా కొనుగోలు చేయడానికి ప్రోత్సాహకంగా కొనుగోలు ధరను పెంచినట్లు అధికారులు తెలిపారు. ఈ నిర్ణయంతో మార్కెట్లో ధరలు తగ్గి ఇబ్బందులు ఎదుర్కొంటున్న రైతులకు కొంత ఉపశమనం లభించనుంది. ప్రస్తుత కొనుగోలు సీజన్లో కేంద్ర ప్రభుత్వం ఉల్లి కొనుగోలు ధరను ఐదోసారి సవరించడం విశేషం. ఉత్పత్తి వ్యయం పెరగడం, రైతుల నుంచి వస్తున్న విజ్ఞప్తులు, మార్కెట్ పరిస్థితులను పరిగణనలోకి తీసుకుని ఈ నిర్ణయం తీసుకున్నట్లు తెలుస్తోంది.
కొత్త కొనుగోలు ధర అమలులోకి రావడంతో కేంద్ర సంస్థల ద్వారా చేపట్టే బఫర్ స్టాక్ కొనుగోళ్లు మరింత వేగవంతం కానున్నాయి. దీంతో రైతులకు గిట్టుబాటు ధర లభించడంతో పాటు, భవిష్యత్తులో మార్కెట్లో ఉల్లి ధరల స్థిరీకరణకు కూడా ఈ చర్య దోహదపడుతుందని వ్యవసాయ రంగ నిపుణులు అభిప్రాయపడుతున్నారు.
