విద్యార్థులకు పరీక్షా సామాగ్రి పంపిణీ…
విద్యార్థులకు పరీక్షా సామాగ్రి పంపిణీ…
జిల్లా కలెక్టర్ ఎ. శ్యామ్ ప్రసాద్ ప్రోత్సాహం
శ్రీ సత్యసాయి బ్యూరో, ఆంధ్రప్రభ : పబ్లిక్ పరీక్షలకు సిద్ధమవుతున్న విద్యార్థుల్లో ఆత్మవిశ్వాసం పెంపొందించేందుకు జిల్లా పరిపాలన ప్రత్యేక చర్యలు చేపడుతోంది. ఇందులో భాగంగా పుట్టపర్తి పట్టణంలోని స్థానిక జిల్లా పరిషత్ ఉన్నత పాఠశాలలో ఆదివారం ఉదయం జిల్లా కలెక్టర్ ఎ. శ్యామ్ ప్రసాద్ విద్యార్థులకు పరీక్షా సామాగ్రిని పంపిణీ చేశారు. రాబోయే SSC మార్చి–2026 పబ్లిక్ పరీక్షలకు హాజరవుతున్న విద్యార్థులకు ఎగ్జామ్ ప్యాడ్లు (Exam Pads), పెన్నులు అందజేశారు. అనంతరం విద్యార్థులతో ముఖాముఖిగా మాట్లాడిన కలెక్టర్, భయాందోళనలకు లోనుకాకుండా ఆత్మవిశ్వాసంతో పరీక్షలు రాయాలని సూచించారు.
ఈ పాఠశాలను తాను దత్తత తీసుకున్న నేపథ్యంలో విద్యార్థులందరూ క్రమశిక్షణతో చదివి జిల్లాలోనే ఉత్తమ ఫలితాలు సాధించి పాఠశాల ప్రతిష్ఠను నిలబెట్టాలని ఆకాంక్షించారు. పరీక్షల ఫలితాలు వచ్చిన తరువాత పాఠశాలను మరోసారి సందర్శించి, అగ్రస్థానాల్లో నిలిచిన విద్యార్థులను ప్రత్యేకంగా సత్కరిస్తామని తెలిపారు. ఈ సందర్భంగా జిల్లా విద్యాశాఖ అధికారి (DEO) మాట్లాడుతూ పరీక్షల సమయంలో విద్యార్థులు పాటించాల్సిన జాగ్రత్తలను వివరించారు. ప్రశ్నాపత్రాన్ని పూర్తిగా అర్థం చేసుకుని సమాధానాలు రాయడం, సమయపాలన పాటించడం, సమాధానాలను స్పష్టంగా, ఆకర్షణీయంగా ప్రదర్శించడం వంటి అంశాలపై సూచనలు ఇచ్చారు.
అదేవిధంగా ఒత్తిడికి లోనుకాకుండా ప్రశాంతంగా పరీక్షలు రాయాలని విద్యార్థులకు మార్గనిర్దేశం చేశారు. ఈ కార్యక్రమంలో పాఠశాల ప్రధానోపాధ్యాయులు, ఉపాధ్యాయ బృందం, విద్యార్థులు పాల్గొని ఉత్సాహం వ్యక్తం చేశారు. జిల్లా పరిపాలన చేపడుతున్న ఈ చర్య విద్యార్థుల్లో పరీక్షల పట్ల ధైర్యాన్ని పెంపొందిస్తోందని ఉపాధ్యాయులు అభిప్రాయం వ్యక్తం చేశారు.
