థలసేమియాకు బోన్మ్యారోతో శాశ్వత విముక్తి…
థలసేమియాకు బోన్మ్యారోతో శాశ్వత విముక్తి…
డా. అశోక్ కుమార్.
450కు పైగా విజయవంతమైన ట్రాన్స్ప్లాంట్లు.. చిన్నారులకు భరోసా ఇస్తున్న యశోద.
ఏలూరులో ప్రతి మూడో శనివారం ప్రత్యేక వైద్య సేవలు: యశోద మార్కెటింగ్ మేనేజర్.
ఏలూరు, ఆంధ్రప్రభ : చిన్నారులను పట్టిపీడిస్తున్న థలసేమియా, సికిల్ సెల్ అనీమియా వంటి రక్త సంబంధిత వ్యాధులకు బోన్ మ్యారో ట్రాన్స్ప్లాంటేషన్తో శాశ్వత పరిష్కారం చూపవచ్చని యశోద హాస్పిటల్స్ సోమాజిగూడ సీనియర్ హెమటో ఆంకాలజిస్ట్, బోన్ మ్యారో ట్రాన్స్ప్లాంట్ నిపుణులు డా. అశోక్ కుమార్ తెలిపారు. శనివారం హోటల్ గ్రాండ్ ఆర్యాలో నిర్వహించిన మీడియా సమావేశంలో ఆయన మాట్లాడారు.
వైద్య రంగంలో విప్లవాత్మక మార్పులు.
బోన్ మ్యారో ట్రాన్స్ప్లాంటేషన్ రంగంలో గత కొన్నేళ్లుగా విప్లవాత్మక మార్పులు వచ్చాయని డా. అశోక్ కుమార్ అన్నారు. యశోద హాస్పిటల్స్లో ఇప్పటివరకు 450కి పైగా విజయవంతమైన ట్రాన్స్ప్లాంట్లు చేశామని వెల్లడించారు. థలసేమియా, సికిల్ సెల్ వ్యాధులు పిల్లల ఎదుగుదలపై తీవ్ర ప్రభావం చూపుతాయని, అయితే తొలిదశలోనే గుర్తించి ట్రాన్స్ప్లాంటేషన్ చేస్తే వారు సంపూర్ణ ఆరోగ్యంతో సాధారణ జీవితం గడపవచ్చని వివరించారు.
ఆధునిక సాంకేతికతతో మరింత సురక్షితం.
ప్రస్తుతం అత్యాధునిక సాంకేతిక పరిజ్ఞానంతో బోన్ మ్యారో ట్రాన్స్ప్లాంటేషన్ మరింత సురక్షితంగా మారిందని తెలిపారు. కుటుంబ సభ్యుల్లో HLA మ్యాచ్ అయ్యే డోనర్ లభిస్తే విజయావకాశాలు 90% పైనే ఉంటాయని స్పష్టం చేశారు. మ్యాచ్ కాని పక్షంలో హ్యాప్లోఐడెంటికల్ ట్రాన్స్ప్లాంట్, కార్డ్ బ్లడ్ ట్రాన్స్ప్లాంట్ వంటి ప్రత్యామ్నాయాలు కూడా అందుబాటులో ఉన్నాయని చెప్పారు.
జిల్లాలకు చేరువైన యశోద సేవలు.
అధునాతన వైద్య సేవలను ప్రజలకు చేరువ చేసే లక్ష్యంతో యశోద హాస్పిటల్స్ ప్రతి నెల మూడవ శనివారం ఏలూరులో, రెండవ బుధవారం కాకినాడ, రాజమండ్రిలో ప్రత్యేక ఓపీ సేవలు అందిస్తున్నట్లు ఆంధ్రప్రదేశ్ మార్కెటింగ్ మేనేజర్ నల్లం బాల వీరభద్రం తెలిపారు. అవసరమైన వారు ఈ అవకాశాన్ని సద్వినియోగం చేసుకోవాలని కోరారు.
నిర్లక్ష్యం వద్దు: డాక్టర్ సూచన.
పిల్లల్లో తరచూ జ్వరం, తీవ్ర నీరసం, ఎదుగుదల లోపించడం, రక్తహీనత వంటి లక్షణాలు కనిపిస్తే నిర్లక్ష్యం చేయవద్దని డా. అశోక్ కుమార్ సూచించారు. వెంటనే హెమటాలజిస్ట్ను సంప్రదించి పూర్తి పరీక్షలు చేయించుకోవాలన్నారు. ప్రజల్లో అవగాహన పెరిగితే ఈ వ్యాధులను జయించడం సులభమని అభిప్రాయపడ్డారు. ఈ సమావేశంలో మార్కెటింగ్ ఎగ్జిక్యూటివ్ పి. ప్రవీణ్ తదితరులు పాల్గొన్నారు.
