రాష్ట్ర ప్రజలందరికీ 80వ స్వాతంత్ర్య దినోత్సవ శుభాకాంక్షలు

డిసిసి అధ్యక్షులు సంజీవ్ ముదిరాజ్

మహబూబ్‌నగర్ రూరల్, ఆంధ్రప్రభ : రాష్ట్ర ప్రజలందరికీ 80వ స్వాతంత్ర్య దినోత్సవ శుభాకాంక్షలు తెలుపుతూ డీసీసీ అధ్యక్షుడు సంజీవ్ ముదిరాజ్ ఒక ప్రకటనలో పేర్కొన్నారు. ముఖ్యమంత్రి ఎ. రేవంత్‌రెడ్డి నాయకత్వంలో, రాహుల్‌గాంధీ ఆశయాలకు అనుగుణంగా ప్రజా ప్రభుత్వం పేదలు, విద్యార్థులు, కార్మికులకు సామాజిక, ఆర్థిక స్వాతంత్ర్యం కల్పించే దిశగా పలు సంక్షేమ కార్యక్రమాలు అమలు చేస్తోందని ఆయన తెలిపారు. స్వాతంత్ర్య దినోత్సవాన్ని పురస్కరించుకుని ప్రభుత్వం చేపడుతున్న పలు కార్యక్రమాలను సంజీవ్ ముదిరాజ్ వివరించారు.

స్మార్ట్ రేషన్ కార్డుల పంపిణీ

ఆగస్టు 15న ముఖ్యమంత్రి రేవంత్‌రెడ్డి సంగారెడ్డి నుంచి రాష్ట్రవ్యాప్తంగా స్మార్ట్ రేషన్ కార్డుల పంపిణీ కార్యక్రమాన్ని ప్రారంభించనున్నారని సంజీవ్ ముదిరాజ్ తెలిపారు. 119 అసెంబ్లీ నియోజకవర్గాలు, 33 జిల్లాల కేంద్రాల్లో ప్రజాప్రతినిధులు, అధికారుల ఆధ్వర్యంలో పంపిణీ కార్యక్రమం జరుగుతుందని పేర్కొన్నారు.

క్యూఆర్ కోడ్‌తో కూడిన ఆధునిక కార్డుల ద్వారా రేషన్ పంపిణీలో మరింత పారదర్శకత తీసుకురావచ్చని తెలిపారు. రాష్ట్రంలో కోట్లాది మంది లబ్ధిదారులకు సన్నబియ్యం అందిస్తున్నామని చెప్పారు. తెలంగాణలో రేషన్ కార్డుల సంఖ్య 2026 జూలై నాటికి 1.06 కోట్లకు పైగా ఉన్నట్లు ప్రభుత్వ ప్రజాపంపిణీ వ్యవస్థ గణాంకాలు వెల్లడిస్తున్నాయి.

గిగ్ కార్మికులకు భద్రత

స్విగ్గీ, జొమాటో, ఓలా, ఉబెర్ తదితర సంస్థల్లో పనిచేస్తున్న గిగ్ కార్మికుల సంక్షేమం కోసం చట్టపరమైన రక్షణ కల్పించేందుకు ప్రభుత్వం చర్యలు చేపట్టిందని సంజీవ్ ముదిరాజ్ తెలిపారు. అయితే, తెలంగాణ ప్రభుత్వం అధికారికంగా 2025లో గిగ్, ప్లాట్‌ఫామ్ కార్మికుల నమోదు, సామాజిక భద్రత, సంక్షేమానికి సంబంధించిన ముసాయిదా బిల్లును విడుదల చేసింది. అది ప్రభుత్వం నోటిఫికేషన్ ద్వారా అమల్లోకి వచ్చేలా ముసాయిదాలో పేర్కొన్నారు.

విద్యార్థులకు ఫీజు రీయింబర్స్‌మెంట్

ఎస్సీ, ఎస్టీ, బీసీ, మైనారిటీ, ఈబీసీ విద్యార్థులకు ఫీజు రీయింబర్స్‌మెంట్, ఉపకార వేతనాల నిధులను నేరుగా బ్యాంకు ఖాతాల్లో జమ చేసే ప్రక్రియను ప్రారంభించనున్నట్లు ఆయన తెలిపారు.

ఇందిరమ్మ ఇళ్లకు దరఖాస్తుల గడువు

పట్టణ పేదల సొంతింటి కలను నెరవేర్చేందుకు ఇందిరమ్మ ఇళ్ల పథకాన్ని అమలు చేస్తున్నామని సంజీవ్ ముదిరాజ్ పేర్కొన్నారు. హైదరాబాద్ పరిధిలోని డీలక్స్ ఫ్లాట్లకు సంబంధించిన దరఖాస్తుల గడువును ఆగస్టు 15 వరకు పొడిగించినట్లు తెలిపారు.

బీఆర్‌ఎస్, బీజేపీ నేతలకు సవాల్

గత పదేళ్ల బీఆర్‌ఎస్ పాలనలో పేదల సంక్షేమం మాటలకే పరిమితమైందని సంజీవ్ ముదిరాజ్ విమర్శించారు. పదేళ్లుగా పేదలకు కొత్త రేషన్ కార్డులు ఇవ్వలేదని ఆరోపిస్తూ బీఆర్‌ఎస్, బీజేపీ నాయకులు ఇప్పుడు ఏ ముఖంతో మాట్లాడుతున్నారని ప్రశ్నించారు.

“రాహుల్ గాంధీ గారు దేశానికి ఇచ్చిన గ్యారెంటీలను, సీఎం రేవంత్ రెడ్డి గారి నాయకత్వంలో తెలంగాణ నేలపై అక్షరాలా అమలు చేసి చూపిస్తున్నాం. ఈ ఆగస్టు 15 తెలంగాణలోని ప్రతీ పేద కుటుంబానికి, ప్రతీ కష్టజీవికి నిజమైన స్వేచ్ఛా సంబరం!”