నేడు బిజీ ‘పెయిడ్ అడ్వైజర్’..
యూకే ప్ర‌ధాన మంత్రి గా చేసిన భార‌త సంత‌తికి చెందిన రిషి సునక్.. ఇప్పుడేం చేస్తున్నాడో తెలుసా.. ఆయన ఇప్పుడు బిలియన్ డాలర్ల టెక్ ప్రపంచంలో అడుగుపెట్టారు. మాజీ ప్రధానమంత్రి రిషి సునక్ తన రాజకీయ పరాజయాన్ని పక్కనపెట్టి, ఒకవైపు తన పార్లమెంటరీ సీటును నిలబెట్టుకుంటూనే, ఇప్పుడు మైక్రోసాఫ్ట్, ఆంథ్రోపిక్‌ల ‘పెయిడ్ అడ్వైజర్’గా మారారు.
జూలై 2024 ఎన్నికల ఓటమి తర్వాత ఆయన రాజకీయ సన్యాసం తీసుకుంటారని ఊహించిన వారందరికీ షాక్ ఇచ్చారు. సునాక్ తన ఆర్థిక నేపథ్యాన్ని, టెక్నాలజీపై ఉన్న ఆసక్తిని పెట్టుబడిగా మార్చుకున్నారు. ఇప్పుడు ఆయనకు మైక్రోసాఫ్ట్, ప్రముఖ AI సంస్థ ఆంథ్రోపిక్, గోల్డ్‌మ్యాన్ సాక్స్‌లలో పార్ట్-టైమ్ అడ్వైజరీ పాత్రలు లభించాయి.
మైక్రోసాఫ్ట్..
ప్రపంచ టెక్ దిగ్గజం మైక్రోసాఫ్ట్ మాజీ యూకే ప్రధానమంత్రి రిషి సునక్ నుండి కొత్త తరహా సలహాలు పొందేందుకు సిద్ధమైంది. సీఈఓ సత్య నాదెళ్ల నాయకత్వంలోని ఈ కంపెనీ, సునక్ నుండి “భూగోళ-రాజకీయ ట్రెండ్‌లపై ఉన్నతస్థాయి వ్యూహాత్మక అవగాహన”ను ఆశిస్తోంది.
యూకేలో భారీ పెట్టుబడులు పెట్టిన మైక్రోసాఫ్ట్‌కు, చైనా–అమెరికా–యూరప్‌ల మధ్య మారుతున్న టెక్ పోటీ పరిస్థితులపై సునక్ విశ్లేషణ ఎంతో విలువైనదిగా భావిస్తున్నారు. ఆయన అందించే గ్లోబల్‌ దృక్పథం ఆధారంగా కంపెనీ తన బిలియన్ డాలర్ల వ్యాపార ప్రణాళికలను సర్దుబాటు చేసుకునే అవకాశం ఉంది.
ఆంథ్రోపిక్…
ఆంథ్రోపిక్, ఆర్టిఫిషియల్ ఇంటెలిజెన్స్ భద్రతపై దృష్టి పెట్టిన సంస్థ. ఈ సంస్థలో సునక్ పాత్రను “అంతర్గత థింక్ ట్యాంక్”గా పేర్కొన్నారు. ప్రధానిగా ఉన్నప్పుడు AI రెగ్యులేషన్‌ను ప్రోత్సహించిన సునాక్, AI సేఫ్టీ సమ్మిట్ (2023) నిర్వహించిన అనుభవంతో, భవిష్యత్తులో వచ్చే కొత్త AI చట్టాలు, నియంత్రణలు ఏ దిశగా వెళ్తాయో ముందుగానే అంచనా వేసి సంస్థకు మార్గదర్శనం చేయనున్నారని చెబుతున్నారు.
ACOBA నియమాలు
యూకే ప్రభుత్వ పర్యవేక్షణ సంస్థ ACOBA (Advisory Committee on Business Appointments) సునక్ నియామకాలను ఆమోదిస్తూ కొన్ని కఠినమైన నిబంధనలను విధించింది. రెండు సంవత్సరాల పాటు మైక్రోసాఫ్ట్ లేదా ఆంథ్రోపిక్ తరపున ఏ యూకే మంత్రి లేదా ప్రభుత్వ అధికారిని స్వంత ప్ర‌యోజ‌నాల‌కోసం ప్రభావితం చేయడం లేదా ఒప్పించడానికి ప్రయత్నించవద్దని తెలిపింది. ప్రధానమంత్రిగా పనిచేస్తున్నప్పుడు పొందిన రహస్య సమాచారాన్ని వ్యక్తిగత లాభం కోసం ఉపయోగించడంపై కూడా ఆంక్షలు విధించింది.
అయితే, ఈ నియమాల పరిధిలో, సునక్ తన అనుభవాన్ని ఉపయోగించి సాంకేతిక విధానాల రూపకల్పనను పరోక్షంగా ప్రభావితం చేయవచ్చని విశ్లేషకులు భావిస్తున్నారు. ఈ సలహాదారు పాత్రల ద్వారా వచ్చే ఆదాయాన్ని సునక్, ఆయన భార్య స్థాపించిన ‘ది రిచ్‌మండ్ ప్రాజెక్ట్’ అనే చారిటీకి విరాళంగా ఇస్తారని ప్రకటించారు. ఈ స్వచ్ఛంద సంస్థ UKలో అక్షరాస్యత విద్యపై దృష్టి పెడుతుంది.
