AP | రెండోసారి రాజ్యసభలో సానా సతీష్ బాబు
AP | రెండోసారి రాజ్యసభలో సానా సతీష్ బాబు
- ప్రజాసేవ, క్రీడాాభివృద్ధి, సామాజిక రంగాల్లో విశిష్ట ముద్ర
- యువత ఉపాధి, ఆరోగ్య రంగాలపై ప్రత్యేక దృష్టి
- తూర్పుగోదావరి రాజకీయ సమీకరణాల్లో కీలక నేతగా ఎదుగుదల
- విపత్తు సహాయక చర్యల్లో చురుకైన పాత్ర
- అభివృద్ధి కార్యక్రమాల్లో నిరంతర కొనసాగింపు
- ప్రజాసేవలో స్థిరమైన ప్రస్థానం
- మరోసారి రాజ్యసభకు ఎన్నిక
ఆంధ్రప్రభ విజయవాడ : రాష్ట్ర రాజకీయాల్లో, సామాజిక సేవా రంగంలో క్రీడా అభివృద్ధి వ్యవస్థలో నిరంతరంగా సేవలు అందిస్తున్న సానా సతీష్ బాబు రెండోసారి రాజ్యసభ సభ్యుడిగా ఎన్నిక కావడం రాజకీయ వర్గాల్లో ప్రాధాన్యతను సంతరించుకుంది. ప్రజా సేవలో ఆయన కొనసాగిస్తున్న నిరంతర పాత్రకు ఇది కీలక గుర్తింపుగా భావించబడుతోంది.
కాకినాడలో మొదలైన ప్రస్థానం..
1972లో కాకినాడలో జన్మించిన ఆయన, సాంకేతిక విద్య అనంతరం ఆంధ్రప్రదేశ్ స్టేట్ ఎలక్ట్రిసిటీ బోర్డులో సబ్ ఇంజనీర్గా తన వృత్తి జీవితాన్ని ప్రారంభించారు. అనంతరం వ్యాపార రంగంలోకి ప్రవేశించి, అదే సమయంలో విద్య, వైద్యం, ఉపాధి రంగాల్లో స్వంత నిధులతో అనేక సామాజిక సేవా కార్యక్రమాలు చేపట్టారు. క్రీడా రంగ అభివృద్ధిలో ఆయన పాత్ర ప్రత్యేకంగా నిలుస్తోంది.
ఈస్ట్ గోదావరి జిల్లా క్రికెట్ అసోసియేషన్ కార్యదర్శిగా, బీసీసీఐ మ్యూజియం కమిటీ సభ్యునిగా సేవలందించారు. ప్రస్తుతం ఆంధ్ర క్రికెట్ అసోసియేషన్ గౌరవ కార్యదర్శిగా కొనసాగుతూ విశాఖపట్నం అంతర్జాతీయ క్రికెట్ స్టేడియం అభివృద్ధి, అంతర్జాతీయ మ్యాచ్ల నిర్వహణలో కీలక బాధ్యతలు నిర్వహిస్తున్నారు. ఈ ప్రయత్నాలు రాష్ట్రంలో క్రీడా మౌలిక సదుపాయాల విస్తరణకు దోహదపడినట్లు క్రీడా వర్గాలు అభిప్రాయపడుతున్నాయి.
రాజకీయ ప్రవేశం నుంచి పార్లమెంటు వరకు..
రాజకీయ రంగంలోకి ప్రవేశించిన అనంతరం నారా లోకేష్ నాయకత్వంలో నిర్వహించిన యువగళం పాదయాత్రలో చురుకైన పాత్ర పోషించారు. ఉమ్మడి తూర్పుగోదావరి జిల్లా ఎన్నికల సమన్వయకర్తగా పార్టీ విజయానికి వ్యూహాత్మకంగా పనిచేశారు. నారా చంద్రబాబు నాయుడు మార్గదర్శకత్వంలో రాజ్యసభ సభ్యుడిగా కొనసాగుతూ పార్లమెంట్ వేదికపై రాష్ట్ర అభివృద్ధి అంశాలను ప్రస్తావిస్తున్నారు. యువతకు నైపుణ్యాభివృద్ధి (స్కిల్ డెవలప్మెంట్) కార్యక్రమాలపై ప్రత్యేక దృష్టి పెట్టి ఉద్యోగ అవకాశాల కల్పనకు ప్రయత్నాలు చేపట్టారు.
కాకినాడ జీజీహెచ్ వంటి ప్రభుత్వ ఆసుపత్రుల అభివృద్ధి, ఆధునిక వైద్య సదుపాయాల విస్తరణలోనూ ఆయన పాత్ర కొనసాగుతోంది. ఈ చర్యలు ప్రాంతీయ స్థాయిలో వైద్య సేవల నాణ్యత పెంపుకు దోహదపడుతున్నాయి. విపత్తు పరిస్థితుల సమయంలో ఆయన సేవలు ప్రాధాన్యతను సంతరించుకున్నాయి. నేపాల్ సంక్షోభ సమయంలో భారతీయులను సురక్షితంగా తరలించడంలో భాగస్వామ్యం, తుఫానుల సమయంలో సహాయక చర్యల్లో పాల్గొనడం వంటి అంశాలు ఆయన సేవా దృక్పథాన్ని ప్రతిబింబిస్తున్నాయి.
అభివృద్ధి కోసం మరో అవకాశం..
రెండోసారి రాజ్యసభకు ఎన్నిక కావడం ద్వారా సానా సతీష్ బాబు పాత్ర మరింత విస్తరించే అవకాశం ఉందని రాజకీయ, సామాజిక వర్గాలు అంచనా వేస్తున్నాయి. క్రీడలు, ఉపాధి, ఆరోగ్యం, విపత్తు నిర్వహణ వంటి రంగాల్లో ఆయన కొనసాగుతున్న కృషి రాష్ట్ర అభివృద్ధి ప్రణాళికల్లో ప్రాధాన్యంగా మారుతోంది.
