Maktal | డిసెంబర్ 1న మక్తల్ కు సీఎం రేవంత్..
- 410 కోట్ల పనులకు శంకుస్థాపన చేయనున్న సీఎం
మక్తల్, ఆంధ్రప్రభ : రాష్ట్ర ముఖ్యమంత్రి రేవంత్ రెడ్డి డిసెంబర్ 1న నారాయణపేట జిల్లా మక్తల్ నియోజకవర్గానికి రానున్నారని కాంగ్రెస్ పార్టీ సీనియర్ నాయకుడు, బికేఆర్ ఫౌండేషన్ చైర్మన్ గవినోళ్ళ బాలకృష్ణ రెడ్డి తెలిపారు. ఆదివారం సాయంత్రం మక్తల్‌లో ఏర్పాటు చేసిన విలేకరుల సమావేశంలో ఆయన మాట్లాడారు.
స్థానిక ఎమ్మెల్యే, రాష్ట్ర పశుసంవర్ధక–క్రీడల శాఖ మంత్రి డాక్టర్ వాకిటి శ్రీహరి సమక్షంలో ముఖ్యమంత్రి రేవంత్ రెడ్డి రూ.200 కోట్ల వ్యయంతో నిర్మించబోయే యంగ్ ఇండియా ఇంటిగ్రేటెడ్ స్కూల్ భవనానికి శంకుస్థాపన చేయనున్నారని తెలిపారు.
అదేవిధంగా, మక్తల్ నుండి జిల్లా కేంద్రం నారాయణపేట వరకు నాలుగు లైన్ల రహదారి నిర్మాణానికి రూ.210 కోట్లతో చేపట్టే పనులకు కూడా సీఎం పునాది వేయనున్నట్లు వివరించారు.
రూ.400 కోట్ల రూపాయల చెక్కులను మక్తల్ నారాయణపేట కోడంగల్ ఎత్తిపోతల పధకం నిర్వాసితులకు ముఖ్యమంత్రి అందజేయనున్నట్లు ఆయన తెలిపారు. అదే విధంగా వివిధ అభివృద్ధి పనులకు ముఖ్యమంత్రి శంకుస్థాపన చేస్తున్నారని ఆయన తెలిపారు. అనంతరం భారీ బహిరంగ సభలో ముఖ్యమంత్రి పాల్గొంటారన్నారు.
ముఖ్యమంత్రి బహిరంగ సభకు మక్తల్ నియోజకవర్గంలోని అన్ని మండలాల నుండి భారీ ఎత్తున కాంగ్రెస్ నాయకులు కార్యకర్తలు తరలివచ్చి కార్యక్రమాన్ని విజయవంతం చేయవలసిందిగా బాలకృష్ణారెడ్డి విజ్ఞప్తి చేశారు.
ఈ విలేఖరుల సమావేశంలో కాంగ్రెస్ నాయకులు జి .లక్ష్మారెడ్డి ,జి.రవికుమార్ యాదవ్, బి. గణేష్ కుమార్ ,కట్టా సురేష్ కుమార్, బోయ రవికుమార్ ,మేదరి శ్రీనివాసులు తదితరులు పాల్గొన్నారు. అనంతరం ముఖ్యమంత్రి బహిరంగ సభ వేదికను వారు పరిశీలించారు.
