Lokesh | రామ్ లాల్ జీతో మంత్రి నారా లోకేష్ భేటీ
Lokesh | రామ్ లాల్ జీతో మంత్రి నారా లోకేష్ భేటీ
- ఆర్ఎస్ఎస్ శతాబ్ది కార్యక్రమాలపై చర్చ
మంగళగిరి, ఆంధ్రప్రభ : రాష్ట్రీయ స్వయంసేవక్ సంఘ్ (RSS) అఖిల భారతీయ సంపర్క్ ప్రముఖ్ రామ్ లాల్ జీతో విద్య, ఐటీ శాఖల మంత్రి నారా లోకేష్ మర్యాదపూర్వకంగా భేటీ అయ్యారు. 2006–19 మధ్య రామ్ లాల్ బీజేపీ జాతీయ ప్రధాన కార్యదర్శి (సంస్థ)గా, అలాగే ఆర్ఎస్ఎస్లో వివిధ ఉన్నత హోదాల్లో బాధ్యతలు నిర్వహించారు.
ఆర్ఎస్ఎస్ శతాబ్ది ఉత్సవాల సందర్భంగా దేశవ్యాప్తంగా వివిధ రంగాల ప్రముఖులతో ఆయన సమావేశాలు నిర్వహిస్తున్నారు. ఈ నేపథ్యంలో ఉండవల్లిలోని నివాసంలో మంత్రి లోకేష్తో పాటు పలువురు రాష్ట్ర మంత్రులతో రామ్ లాల్ భేటీ అయ్యారు. మంత్రి నారా లోకేష్ స్వయంగా వెళ్లి రామ్ లాల్కు స్వాగతం పలికారు.
దేశవ్యాప్తంగా ఆర్ఎస్ఎస్ చేపట్టిన కార్యక్రమాలు, సంస్థ ప్రత్యేకతలను ఈ సందర్భంగా రామ్ లాల్ వివరించారు. అనంతరం మంగళగిరి శాలువాతో రామ్ లాల్ను మంత్రి లోకేష్ సత్కరించి, బాలల రాజ్యాంగ పుస్తకాన్ని బహూకరించారు.
ఈ కార్యక్రమంలో మంత్రులు కె. అచ్చెన్నాయుడు, కొల్లు రవీంద్ర, ఎన్ఎండీ ఫరూఖ్, వంగలపూడి అనిత, గుమ్మడి సంధ్యారాణి, ఎస్. సవిత, కొండపల్లి శ్రీనివాస్, మండిపల్లి రాంప్రసాద్ రెడ్డి, డోలా బాలవీరాంజనేయస్వామి, సత్యకుమార్ యాదవ్, ఆనం రాంనారాయణరెడ్డి, కొలుసు పార్థసారథి, వాసంశెట్టి సుభాష్ తదితరులు పాల్గొన్నారు.
