అమ్మ‌వారికి మొక్కులు చెల్లించేదెలా?
హైద‌రాబాద్‌, ఆంధ్ర‌ప్ర‌భ : ఒక వైపు సంప్ర‌దాయం.. మ‌రో వైపు జాతిపిత‌ను గౌర‌వించ‌డం.. ఈ ఏడాది విజ‌య‌ద‌శ‌మి పండ‌గ ఎలా చేయాలి అనే ప్ర‌జ‌లు త‌ల‌లు ప‌ట్టుకుంటున్నారు. విజ‌య‌ద‌శ‌మి రోజున అమ్మ‌వారికి కోళ్లు, మేక‌లు, పొట్టెల్లు బ‌లి ఇస్తూ.. ర‌క్తం చూపించి మొక్కులు తీరుస్తారు. మిష‌న‌రీ వినియోగించేవారు ద‌స‌రా రోజున ప్ర‌త్యేక పూజ‌లు చేసి కోళ్లు, మేక‌లు, పొట్టెల్లు బ‌లి ఇవ్వ‌డం సంప్ర‌దాయం. అదే రోజు బంధువులు, స్నేహితుల‌తో క‌క్కా, ముక్క‌తో విందులు చేసుకుంటారు. కానీ ఈ ఏడాది విచిత్ర ప‌రిస్థితి నెల‌కొంది.
అక్టోబర్ 2న గాంధీ జయంతి. అహింస మార్గాన్ని ఎంచుకున్నమ‌న జాతిపిత మ‌హాత్మ గాంధీని గౌర‌వ విస్తూ ఆ రోజు మాంసం, చికెన్ దుకాణాలు, చివ‌ర‌కు చేప‌ల దుకాణాలు కూడా మూసి వేసి ప్ర‌జ‌లు గౌర‌విస్తున్నారు. ఇందుకు భార‌త ప్ర‌భుత్వం కూడా చట్టం చేసింది. ఆ చ‌ట్టానికి అనుగుణంగా ప్ర‌తి మున్సిపాల్టీలో చ‌ట్టాలు చేసుకున్నాయి.
జీహెచ్ఎంసీ చట్టం 1955లోని విభాగం 533(B)తో పాటు ఈనెల 24న జరిగిన స్టాండింగ్ కమిటీ సమావేశంలో ఆమోదించిన 172వ తీర్మానం ఆధారంగా అక్టోబర్ 2న ద‌స‌రా ఉన్న‌ప్ప‌టికీ మాంసం దుకాణాలు మూసి వేయాల‌ని మున్సిప‌ల్ యంత్రాంగం ఆదేశాలు జారీ చేసింది. ఈ ఆదేశాల మేర‌కు మాంసం దుకాణాలు తెరువకూడ‌దు.
ఒక‌వైపు సంప్ర‌దాయం.. మ‌రోవైపు జాతిపిత‌ను గౌర‌వించ‌డం.. ఈ రెండింటి మ‌ధ్య ప్ర‌జ‌లు న‌లిగిపోతున్నారు. అమ్మ‌వారికి ర‌క్తం చూపించాల‌ని, ఒక వేళ అలా చేస్తే మ‌హాత్ముడిని అగౌర ప‌రిచిన‌ట్లు అవుతుందని ఏమి చేయాలో అటు దైవ‌భ‌క్తి, ఇటు దేశ‌భ‌క్తి ఉన్న వారు స‌త‌మ‌త‌మ‌వుతున్నారు.
