- ముగ్గురు అరెస్ట్
మెదక్, ఆంధ్రప్రభ : మెదక్ జిల్లా వడియారం గ్రామంలో బైక్ దొంగలతో సంబంధం ఉన్న ఒక తీవ్రమైన ఘటన చోటుచేసుకుంది. బైక్ దొంగతనం చేసి పారిపోతున్న ఇద్దరిని గ్రామస్తులు పట్టుకుని దేహశుద్ధి చేయడంతో పాటు, వారిలో ఒకరి జేబులో ఉన్న పెట్రోల్‌ను వారిపైనే పోసి నిప్పంటించారు.
దర్యాప్తులో అస‌లు నిజం…
ఈ ఘటనపై సమాచారం అందుకున్న వెంటనే తూప్రాన్ డీఎస్పీ నరేందర్ గౌడ్ ఆధ్వర్యంలో పోలీసులు వడియారం గ్రామానికి చేరుకుని విచారణ చేపట్టారు. ఆయనతో పాటు రామాయంపేట సీఐ వెంకటరాజా గౌడ్, చేగుంట ఎస్సై చైతన్య కుమార్ రెడ్డిలు కూడా గ్రామస్థుల నుండి వివరాలు సేకరించారు.
పట్టుబడిన వారిని జంగరాయి గ్రామానికి చెందిన మోహన్, ఎర్రోల్ల మహిపాల్గా గుర్తించారు. ఇక ఆదివారం చేగుంట పోలీస్ స్టేషన్‌లో ఏర్పాటు చేసిన మీడియా సమావేశంలో సీఐ మాట్లాడుతూ, జంగరాయి గ్రామానికి చెందిన మోహన్, ఎర్రోల్ల మహిపాల్ వడియారం గ్రామంలో మహిపాల్ అత్తగారి ఇంటికి వచ్చారని, తిరిగి వెళ్తున్న సమయంలో గుండ్ల రమేశ్ బైక్‌పై వెళ్తుండటాన్ని గ్రామస్తులు చూసి వారిని దొంగలుగా భావించారని తెలిపారు.
గ్రామస్థుల ఆగ్రహంతో దొంతి రామకృష్ణ, గుండ్ల రమేశ్, మరికుక్కల అనిల్లు.. మోహన్ జేబులో ఉన్న పెట్రోల్ బాటిల్‌ను తీసుకుని అతడిపై పోసి నిప్పంటించారని, అయితే ఇతరులు అప్రమత్తమై మంటలను ఆర్పివేశారని వివరించారు. అనంతరం పోలీసులు అక్కడికి చేరుకుని గాయపడిన మోహన్‌ను గాంధీ ఆసుపత్రికి తరలించారు.
ఈ ఘటనపై కేసు నమోదు చేసుకున్న పోలీసులు, మోహన్ స్టేట్‌మెంట్ ఆధారంగా దొంతి రామకృష్ణ, గుండ్ల రమేశ్, మరికుక్కల అనిల్‌లను అరెస్టు చేశారు. ఈ ఘటనలో ఇతరులు ప్రమేయం ఉంటే వారిని కూడా అరెస్టు చేస్తామని, చట్ట ప్రకారం కఠిన చర్యలు తీసుకుంటామని పోలీసులు స్పష్టం చేశారు.
