- అధికారులతో కలిసి
- ఎంపీ శివనాథ్ పర్యవేక్షణ
(ఆంధ్రప్రభ, ఎన్టీఆర్ బ్యూరో) : విజయవాడ (Vijayawada) కు మణిహారం గాంధీ హిల్ మరింత ఆకర్షణీయంగా రూపుదిద్దుకుంటోంది. అక్టోబర్ 2న ముఖ్యమంత్రి నారా చంద్రబాబు నాయుడు పర్యటన సందర్భంగా కొండపై జరుగుతున్న అభివృద్ధి పనులను వేగవంతం చేశారు. ఈ నేపథ్యంలో కలెక్టర్ డాక్టర్ జి.లక్ష్మీశా, వీఎంసీ కమిషనర్ ధ్యాన్ చంద్‌లతో కలిసి ఎంపీ కేశినేని శివనాథ్ (Kesineni Sivanath) అక్కడి పనులను పర్యవేక్షించారు. పర్యాటకులకు సౌకర్యవంతంగా, ఆకర్షణీయంగా తీర్చిదిద్దే దిశగా ఆధునిక సదుపాయాల ఏర్పాటుకు ప్రణాళికలు సిద్ధమయ్యాయి. కొండపైకి వెళ్లే రోడ్ విస్తరణ, లిఫ్ట్ నిర్మాణం, రైల్వే ట్రాక్ అభివృద్ధి, పార్క్ సౌకర్యాలు వంటి పనుల పురోగతిని ఎంపీ సమీక్షించారు.
సౌకర్యాలు పూర్తి స్థాయిలో సిద్ధం చేయాలని అధికారులకు ఆయన సూచించారు. గాంధీ స్మారక స్థూపం పరిసర ప్రాంతాలను శుభ్రంగా, అందంగా తీర్చిదిద్దే పనులు జరుగుతున్నాయని ఎంపీ వెల్లడించారు. హరిత వన కార్యక్రమాలు, లైటింగ్ ఏర్పాట్లతో గాంధీ హిల్‌కు కొత్త కళ రానుందని చెప్పారు. ఇది కేవలం పర్యాటక స్థలం మాత్రమే కాదు, సాంస్కృతిక కార్యకలాపాలకు కూడా వేదిక కావాలి” అని ఎంపీ కేశినేని శివనాథ్ అన్నారు.
అభివృద్ధి పనులను తక్షణం పూర్తి చేయాలని అధికారులకు సూచించిన ఎంపీ, ముఖ్యమంత్రి పర్యటన (Chief Minister’s visit) లో గాంధీ హిల్ ప్రత్యేక ఆకర్షణగా నిలవాలని ఆదేశించారు. “గాంధీ హిల్ అభివృద్ధి పనులు విజయవాడ గౌరవానికి ప్రతీకగా ఉండాలి. నగర ప్రజలందరికీ గర్వకారణంగా మారేలా తీర్చిదిద్దుతున్నట్లు ఎంపీ స్పష్టం చేశారు. ఈ కార్యక్రమంలో గాంధీ హిల్ అభివృద్ధి కమిటీ చైర్మన్ కేపీసీ గాంధీ, వైస్ చైర్మన్ జంద్యాల శంకర్, పాల్గొన్నారు.
