Basara | టెట్ పై టెన్ష‌న్ వ‌ద్దు….
- ఎస్టీయూ రాష్ట్ర ప్రధాన కార్యదర్శి జుట్టు గజేందర్
బాసర (నిర్మల్ జిల్లా) ఆంధ్రప్రభ : టెట్ తప్పనిసరి అంశంపై ఉపాధ్యాయులు ఎవ్వరూ ఆందోళన చెందాల్సిన అవసరం లేదని ఎస్టీయూ–టీఎస్ రాష్ట్ర ప్రధాన కార్యదర్శి జుట్టు గజేందర్ స్పష్టం చేశారు. ఇటీవల రాష్ట్ర ప్రధాన కార్యదర్శిగా ఎన్నికైన అనంతరం ఆయన ఆదివారం బాసర అమ్మవారిని దర్శించుకుని, అనంతరం మండల శాఖ ఆధ్వర్యంలో జరిగిన సన్మాన కార్యక్రమంలో పాల్గొన్నారు.
ఈ సందర్భంగా మాట్లాడుతూ… ఇన్‌సర్వీస్ ఉపాధ్యాయులకు టెట్ నుండి మినహాయింపు కల్పించే దిశగా కేంద్రంపై ఒత్తిడి తీసుకువస్తామని తెలిపారు. ఉపాధ్యాయ–విద్యారంగ సమస్యల పరిష్కారానికి ప్రభుత్వం‌తో నిరంతర చర్చలు కొనసాగిస్తున్నామని చెప్పారు.
ఉమ్మడి సర్వీస్ రూల్స్ సాధించడం, పదోన్నతుల మంజూరు వంటి అంశాలను ప్రాధాన్యతగా తీసుకుని సంఘం పోరాడుతుందన్నారు. సిపిఎస్ రద్దు కోసం ఉపాధ్యాయులు ఉద్యమానికి సిద్ధం కావాలని పిలుపునిచ్చారు. పీఆర్సీపై ముఖ్యమంత్రి సానుకూల ప్రకటన చేయాలని డిమాండ్ చేశారు.
కార్యక్రమంలో జిల్లా అధ్యక్షుడు ఎస్. భూమన్న యాదవ్, రాష్ట్ర బాధ్యులు ఎ. బాజా రెడ్డి, పల్సీకర్ శ్రీనివాస్, జిల్లా మాజీ అధ్యక్షుడు డి. రామారావు, జిల్లా ఆర్థిక కార్యదర్శి బి. వెంకటేశ్వర్‌రావు, బాసర మండల నాయకులు నరేందర్‌రావు, రవీందర్ తదితరులు పాల్గొన్నారు.
