- పాన్ ఇండియా స్టార్ ప్రభాస్ తో సాహో చిత్రం
- పవర్ స్టార్ పవన్ కళ్యాణ్ తో ఓ జి చిత్రం
- తాజాగా నానితో కొత్త చిత్రం
శ్రీ సత్య సాయి బ్యూరో , ఆంధ్రప్రభ : శ్రీ సత్య సాయి జిల్లా కదిరి ప్రాంతానికి చెందిన ఎద్దుల సుజిత్ రెడ్డి తెలుగు సినీ సముద్రంలో ఉవ్వెత్తిన ఎగిసిన కెరటంలా మారాడు. 2014లో తొలిసారిగా రన్ రాజా చిత్రానికి దర్శకత్వం వహించారు. అనంతరం 2019లో పాన్ ఇండియా స్టార్ ప్రభాస్ హీరోగా నటించిన సాహో చిత్రాన్ని తెలుగు, హిందీ, తమిళ్, మలయాళం భాషల్లో తీశారు.
అదేవిధంగా పవర్ స్టార్ పవన్ కళ్యాణ్ ను హీరోగా పెట్టి ఓజి చిత్రాన్ని నిర్మించి సక్సెస్ అందుకున్నాడు. తాజాగా ఫ్యామిలీ స్టార్ నాని హీరోగా మరో సరికొత్త చిత్రానికి దర్శకత్వం వహిస్తున్నారు.
1990 అక్టోబర్ 25వ తేదీన డబుల్ వారి పల్లి, ఓబుల దేవర చెరువు మండలం శ్రీ సత్యసాయి జిల్లాలో సుజిత్ రెడ్డి జన్మించారు. సినిమాలపై ఆసక్తితో సుజీత్ రెడ్డి ఆది నుంచి దర్శకత్వం వైపు మొగ్గు చూపాడు. ఎవరి దగ్గర ఎలాంటి సహాయక దర్శకునిగా పని చేయకుండానే ఏకంగా దర్శకత్వం వహించడం సుజిత్ ప్రత్యేకత.
మొదటిసారిగా 2014లో రన్ రాజా చిత్రానికి దర్శకత్వం వహించి సినీ పరిశ్రమలో పలువురు దృష్టిలో పడ్డారు. ఇందులో భాగంగా పాన్ ఇండియా స్టార్ ప్రభాస్ సుజిత్ తో సాహో చిత్రాన్ని హాలీవుడ్ స్థాయిలో తెరకెక్కించారు.
ఈ చిత్రం నాలుగు భాషల్లో విశేష ఆదరణ పొందింది ముఖ్యంగా హాలీవుడ్ స్థాయిలో సాంకేతిక పరమైన పరిజ్ఞానాన్ని వినియోగించడం విశేషం. అనంతరం పవర్ స్టార్ పవన్ కళ్యాణ్ తో ఇటీవలనే ఓజి సినిమాను తీసి అవురా అనిపించారు.
ఇలా సినీ సముద్ర ప్రపంచంలో ఎగిసిన కెరటంలా కదిరి కుర్రాడు నిలవడం శ్రీ సత్య సాయి జిల్లాకే గర్వకారణం అని చెప్పుకోవచ్చు. తాజాగా ఫ్యామిలీ స్టార్ నానితో మరో కొత్త చిత్రానికి దర్శకత్వం వహిస్తూ సినీ పరిశ్రమలో మరో సంచలనానికి నాంది పలుకుతున్నారని భావించవచ్చు.
